1 यहूदा मुल्खै थिअ राज़ै आसाहो राज़, तेऊए राज़ा दी छत्तुई साला छ़ेल़अ इज़राईल मुल्खे राज़ै बाशा यहूदा संघै जुध। राज़ै बाशा बणाअं रामाह नगरी फेर-फिरदअ गहल़ अर बागै डाही आपणीं सैना अर तेऊ किअ यहूदा लै लोगो एछणअ डेऊणअ बंद। 2 राज़ै आसाह किअ इहअ कि बिधाते भबनै अर तेऊए मैहलै ज़ुंण सुन्‍नैं-च़ंदीए भांडै थिऐ रहै दै, तिंयां काढै तेऊ सोभ संघा दैनै आपणैं कार-करिंदे हाथै दमिश्क नगरी अराम देशे राज़ै बेन्हदादा सेटा, संघा दैनअ तेऊ लै इहअ समाद, 3 "ज़िहअ म्हारै बाबो आप्पू मांझ़ै ज़ोल़-मेल़ थिअ, हाम्हां बी करनअ आजू तिहअ ई। ईंयां सुन्‍नैं-च़ंदीए भांडै दैनै मंऐं ताल्है भैंट। ऐबै एछ तूह मुंह संघै अर इज़राईले राज़ै बाशा संघै कर आपणीं करार खतम ताकि सह मेरी देशे ज़ैगा का आपणीं सैना संघी पोर्ही निखल़े।"

4 राज़ै बेन्हदादै किअ तिहअ ई ज़िहअ राज़ै आसाहै बोलअ अर तेऊ छ़ाडै आपणीं सैने दलपति संघा छ़ेल़अ कई इज़राईली नगरी दी जुध। तिन्‍नैं किअ इजोन, दान, अबेल-बेथ-माकाहा नगरी गलील समुंदरे मुल्खै कबज़अ अर नप्ताली गोत्रे सारी नगरी ज़ेथ तिन्‍नैं ज़िणसा करै भढार थिऐ भरी डाहै दै। 5 ज़ांऊं राज़ै बाशा शूणअ कि इहअ हुअ, तेऊ पाई रामाह नगरी गहल़ा बणाणें छ़ाड संघा किअ सह काम तिधी बंद। 6 तेखअ किअ आसाह राज़ै सारै यहूदा मुल्खै सोभी लै हुकम कि ज़ुंण बाशा राज़ै रामाह नगरी गहल़ा बणाणां लै काठ पात्थर तै लाऐ दै, तिन्‍नां च़का। संघा लाऐ तिंयां काठ पात्थर बिन्यामीन गोत्रे मुल्खै गिबा अर मिज़पा नगरी गहल़ा बणाणां लै।

7 इना एतरी गल्‍ला हणैं बाद डेऊअ बिधातो गूर हनानी यहूदा मुल्खे राज़ै आसाह सेटा संघा बोलअ इहअ, "तंऐं समझ़अ आपणैं परमेशर बिधाता छ़ाडी अराम देशे राज़ै बेन्हदादो आसरअ खास्सअ! ताखा त अराम देशे सैना मारनैओ मोक्‍कअ पर ऐबै निं तूह तिन्‍नां का कधि ज़िती सकदअ।" 8 तेता कर आद कि कूश देशे सैना अर लिबिया देशे सैना केही खास्सी अर बलबान आसा ती? तेता लै रहअ तूह बिधाते आसरै संघा ज़ितअ तूह तिन्‍नां का! 9 बिधाता हआ संसारै सोभी भाल़अ लागअ द, सह दैआ तिन्‍नां लै बल ज़ुंण तेऊ लै शुचै-पाक्‍कै हआ। तंऐं किअ ऐडै ज़िहअ काम अर तैही रहणैं ऐबै ताह संघै कबल्‍लै जुध लागी। 10 ऐहा गल्‍ला लै आई राज़ै आसाहा तेऊ गूरा लै खास्सी रोश्शै अर तेऊ बझ़ैल़अ सह शांघल़ी करै बान्हणैं। तिन्‍नां ई धैल़ै थिअ आसाह राज़ परज़ा मांझ़ै होरी कई लोगा लै बी इहअ ई ज़ुल्म करदअ लागअ द।

11 आसाह राज़ै आपणैं राज़ा दी ज़ेतरै बी काम किऐ, तिंयां आसा यहूदा अर इज़राईल मुल्खे इतिहासे कताबा दी लिखी डाही दी। 12 आपणैं राज़ा दी उन्ताल़ुई साला लागी आसाह राज़ै खूरै बमारी संघा हुअ लाट्टअ। तेता लै बी रहअ सह बिधाता छ़ाडी बैईदे आसरै। 13 तेखअ हुई तेऊए दूई साला बाद मौत 14 संघा डाहअ सह दाबेदपूर नगरी तैहा घोरी दी दाबी ज़ुंण तेऊ आप्पू लै आप्पै ती कोती डाही दी। तैहा घोरी दी पाऐ खास्सै खुशबूदार मसालै अर शोभली बास्सा दैणैं आल़ै तेल। तेऊओ अदर करना लै ज़ाल़अ लोगै तिधी बडअ आगीओ कूंड।