इफिसी 1

पल़सीए प्राथणां

15 किल्हैकि परमेशरै किअ तम्हां लै बतेर्हअ, मंऐं शूणअ प्रभू ईशू दी थारै पाक्‍कै विश्वासे बारै अर हर ज़ैगा सोभी विश्वासी भाई लै थारी झ़ूरी करनी। 16 हुंह करा कबल्‍लअ थारै बारै परमेशरो शूकर अर आपणीं प्राथणां दी करा हुंह हर बगत आद।

17 हुंह करा प्रतप्पा आल़ै परमेशर बाब अर म्हारै प्रभू ईशू मसीहा का प्राथणां कि सह तम्हां लै आत्मिक अक्ल दैए अर समझ़ दैए। 18 हुंह करा प्राथणां बी कि परमेशर थारै दिलै तैहा गल्‍ला प्रगट करे ज़ेता सह हाम्हां लै दैणअ च़ाहा, ताकि तम्हां का थोघ लागे कि ज़ेते हाम्हां तेऊ का आशा आसा तिंयां गल्‍ला हाम्हां लै केतरी महान आसा। अर तिन्‍नां सोभी लै बी ज़ुंण तेऊ पबित्र हणें तैणीं शादै दै आसा।

19 हुंह च़ाहा इहअ कि तम्हां का परमेशरे महान शगतीओ थोघ लागे ज़ुंण हाम्हां मसीहा दी विश्वास करनै आल़ै लै आसा डाही दी। 20 अह आसा सह ई महान शगती ज़ेता करै परमेशरै मसीहा भिई ज़िऊंदअ किअ अर सह मसीहा स्वर्गै आपणीं दैहणीं बाखा सोभी का बडी पदबी दी बशैल़अ।✝1:20 इब्रा. 10:22; भज. 110:1

21 तेऊ संसारै हणअ मसीहा सोभी प्रैंदै राज़अ। हरेक शगती आल़ी आत्मां, हर राज़ करनै आल़ै नाअं ज़ुंण बी आसा तिन्‍नां सोभी का आसा मसीहा सोभी का बडअ सदा लै राज़अ। 22 परमेशरै दैनअ तेऊ लै सोभी गल्‍लो हक अर सह आसा मसीहा ई ज़ुंण परमेशरै तिन्‍नां सोभिओ सैणअ बणाअं ज़ुंण विश्वास करा।✝1:22 कुलू. 2:10 23 हाम्हैं विश्वासी आसा मसीहे देही ज़िहै। मसीहा। सह करा सारी शगती संघै हाम्हां मांझ़ै काम ज़िहअ सह सारै भ्रमंडै काम करा।