1 विश्वास आसा एतो निहंचअ कि हाम्हां भेटणीं तिंयां गल्‍ला पाक्‍कै दी ज़ेते हाम्हैं आशा डाहा अर भरोस्सअ करनअ कि ज़ुंण च़िज़ा हाम्हैं भाल़ी निं आथी तिंयां आसा असली दी। 2 म्हारै दादा-बाबो त इहअ ई विश्वास। तैही त परमेशर तिन्‍नां करै खुश।

3 विश्वासा करै ई लागा हाम्हां का थोघ कि सारअ भ्रमंड आसा बणाअं द परमेशरै आपणैं बैणा करै। ज़हा च़िज़ा हाम्हैं भाल़ा, तिंयां बणाईं परमेशरै तेता करै ज़ेता हाम्हैं भाल़ी निं सकदै।✝

4 आदमीए शोहरू आबलै किअ परमेशरा दी विश्वास, तेऊ च़ढाऊअ परमेशरा लै आपणैं बडै भाई कैना का राम्बल़अ बल़ीदान। परमेशर हुअ आबले बल़ीदाना करै खुश अर तेऊ लै बोलअ परमेशरै आप्पै कि सह थिअ धर्मीं। आबल ता नाठअ मरी पर हाम्हैं शिखल़ा आझ़ बी तेऊ का परमेशरा दी विश्वास करने बारै।✝

5 हणोक करा त परमेशरा दी विश्वास अर सह निंयं परमेशरै तेऊए ज़िऊंदी ज़िता स्वर्गा लै। तैही निं कोही तेऊए ल्हास भेटी। स्वर्गा निंणै का आजी किअ तेऊ परमेशर हर गल्‍ला दी खुश, इहअ आसा तेऊए बारै पबित्र शास्त्रा दी लिखअ द।✝

6 ज़ै लोग विश्वास करे, तेता करै सका परमेशर खुश हई, किल्हैकि परमेशरा सेटा एछणैं आल़ै लोल़ी विश्वास किअ कि सह आसा। ज़ुंण शुचै मन्‍नैं परमेशरा लोल़ै हआ लागै दै तिन्‍नां लै दैआ सह तेतो फल।

7 नूहै किअ परमेशरै खोज़ी दी तिन्‍नां गल्‍ला दी विश्वास कि आजू हणीं पाणीं करै प्रल़या ज़ुंण तेऊ ज़मानैं भाल़ी नां हेरी ती। तिन्‍नां गल्‍ला दी विश्वास करी बणाअं तेऊ परमेशरे डरा हेठै रही एक बडअ ज़हाज़ ज़ेता करै सह अर तेऊए सारै टबर बच़ै। इहअ करै संसारे होर लोग ज़ुंणी विश्वास निं किअ तिंयां मूंऐं सोभ अर नूह बणअ विश्वासा करै धर्मीं।✝

8 आबरामै बी किअ विश्वास अर तेऊ किअ तिहअ ई ज़िहअ परमेशरै तेऊ लै बोलअ त। सह लागअ परमेशरे गल्‍ला दी विश्वास करी आपणैं देशा गराऊंआं छ़ाडी तेऊ देशा बाखा लै हांढदअ ज़ुंण परमेशरै तेऊ लै दैणअ किअ त। तेऊ का निं थोघ बी त कि किधा लै डेऊणअ पर तज़ी बी लागअ सह हांढदअ।✝

9 ज़ुंण देश परमेशरै आबरामा लै दैणअ किअ त, तिधी रहअ आबराम परदेसी ज़िहअ खिम्भ खल़अ करी तेऊ डेरै दी। तिहै ई तेऊओ शोहरू इसहाक अर तेऊओ पोचअ याकब ज़हा परमेशरा का सह ई करार भेटी, तिंयां बी रहै खिम्भा दी।✝

10 किल्हैकि तिंयां थिऐ स्वर्गे तैहा सदा रहणैं आल़ी नगरी न्हैल़ै लागै दै, ज़ेते पाक्‍की आथरी आसा अर ज़ेतो कारीगीर अर बणाणैं आल़अ परमेशर आप्पै आसा।

11 आबरामै किअ विश्वास अर परमेशरै दैनअ तेऊ लै इहअ बल कि तेऊओ हुअ शोहरू तेभै गअ त सह खास्सअ प्रोढअ हई अर तेऊए लाल़ी सारा बी थिई बांढी अर प्रोढी गई दी हई। परमेशरै बोलअ तैहा लै कि तेरअ हणअ एक शोहरू अर आबरामै किअ भरोस्सअ कि परमेशरा करनअ तिहअ ई ज़ेही तेऊ करार आसा किई दी।✝

12 आबराम थिअ खास्सअ प्रोढअ हई गअ द अर सह थिअ मरनै ई आल़अ, पर सह हुअ खास्सै मणछो दाद-बाब तेऊए लुआद हुई आजू सरगे तारै, समुंदरे रेता ज़िहै खास्सै ज़ेता कुंण गणी निं सकदअ।✝

13 ईंयां सोभै ज़ुंण परमेशरा दी विश्वास करा तै, ईंयां मूंऐं सोभै तिन्‍नां गल्‍ला भेटणैं का आजी ज़ुंण परमेशरै इना लै दैणीं किई ती। तिंयां गऐ ऐहा गल्‍ला समझ़ी कि परमेशरै ज़ुंण बोलअ तेऊ करनअ तिहअ ई अर ऐहा गल्‍ला बी गऐ तिंयां समझ़ी कि तिंयां आसा पृथूई दी परदेसी अर मसाफर।✝

14 ईंयां गल्‍ला करा तिन्‍नां मणछा बाखा शारअ ज़ुंण इहअ बोला कि हाम्हैं आसा ऐहा पृथूई दी परदेसी अर किधा होरी ज़ैगा का आऐ दै। एता करै हआ अह गल्‍ल प्रगट कि तिंयां थिऐ तेऊ देशा लोल़ै लागै दै ज़ुंण तिन्‍नों आपणअ होए अर तिंयां तिधी बस्से।

15 ज़हा देशा का तिंयां आऐ तै, ज़ै तिन्‍नां तेऊ ई देशे बारै धैन हंदअ, तिंयां सका तै तेऊ देशा लै बापस फिरी। 16 पर तिंयां थिऐ एकी सोभी का बडै देशे मतलब स्वर्गे च़ाहा डाहणैं आल़ै, परमेशर हआ त तिन्‍नां लै खुश ज़ेभै सह तिन्‍नां लै इहअ बोला त कि ईंयां आसा मेरै आपणैं लोग। परमेशरै बणाईं तिन्‍नां लै एक नगरी बी।✝

17 विश्वासा करै ई आबराम ज़धू परखअ त, तेऊ निंयं आपणअ शोहरू इसहाक बल़ीदान करना लै। ज़सरै बारै परमेशरै करार ती किई दी।✝

18 ज़हा शोहरू लै परमेशरै इहअ बोलअ त, "इसहाका ई का हणीं आजू तेरी आद-लुआद।" पर सह थिअ आपणैं तेऊ कल्है शोहरूओ बल़ीदान करना लै तैर।✝

19 आबरामा त इहअ विश्वास कि, ज़ै इसहाक मरे बी, परमेशर सका तेऊ मरी करै भिई ज़िऊंदै करी। ज़ै दुजै साबै सोठे; आबरामा भेटअ आपणअ शोहरू मरी करै ज़िऊंदअ। 20 इसहाक करा त परमेशरा दी विश्वास, तैही किई तेऊ परमेशरा का प्राथणां कि मेरै मरनै का बाद दैणीं आजू मेरै दुही शोहरू एसाब अर याकबा लै तैहा करारे बर्गत।✝

21 विश्वासा करै ई दैनी याकबै मरदी बारी युसुफे दूई शोहरू लै बर्गत. याकब फिरअ मांज़े शरैहणां बाखा उटअ संघा टेक्‍कअ माथअ।✝

22 युसुफै किअ परमेशरा दी विश्वास, ज़ांऊं मिसर देशै तेऊए मरने घल़ी पुजी, तेऊ खोज़ी इज़राईलीए मिसर देशा का आज़ाद हणें गल्‍ला अर तेऊ डाहअ आपणैं लोगा का बोली कि ज़ेभै तम्हैं इधा का छ़ुटे, मेरै हस्तू बी पजैल़ै आप्पू संघा तिधी।✝

23 ज़ांऊं मिसर देशे राज़ै इहअ हुकम दैनअ कि ज़ेतरै बी इज़राईलीए शोहरू आसा ज़ल्मैं दै तिन्‍नां पाआ मारी, तेखअ डाहअ विश्वासा करै ई मोसा गूरे ईज-बाब सह पैईदा हणैं का बाद चिई भिन्‍नैं तैणीं च़ोरी। किल्हैकि तिन्‍नैं भाल़अ कि अह निं आम शोहरू ज़िहअ आथी अर तिंयां निं राज़ैए हुकमा का डरै।✝

24 मिसर देशे माहा राज़ेए देई निंयं मोसा; संघा बणाअं आपणअ शोहरू। पर ज़ांऊं सह ज़ुआन हुअ, विश्वासा ई करै किअ तेऊ नांईं कि सह आसा राज़ेए देईए लुआद।✝

25 तेऊ समझ़अ इहअ ठीक कि थोल़ै धैल़ै पापा दी सुख-भुगतणै का आसा परमेशरे लोगा संघै दुख भुगतणअ ई भलअ। 26 तेऊ समझ़अ मसीहा पिछ़ू, परमेशरा लै बेइज़ती हणअ तेऊ मिसर देशे ज़ैदात अर भढारा का खास्सअ ठीक। किल्हैकि तेऊ का थिअ थोघ कि तेऊ भेटणअ तेतो फल स्वर्गै।✝

27 किल्हैकि मोसा किअ परमेशरा दी विश्वास तैही छ़ाडअ तेऊ मिसर देश। तेऊ निं ऐहा गल्‍लो फिकर किअ कि तेऊए मिसर देशा छ़ाडणैं करै हणअ राज़अ तेऊओ दुशमण। सह लागअ हांढदअ किल्हैकि सह रहअ तेऊ परमेशरा भाल़अ लागी ज़हा कोहै निं भाल़ी सकदअ।✝

28 विश्वासा करै ई मनी तेऊ ऊवार्णे अर मिम्मूंए लोहू छ़ल़िकणें बिधी, कि ज़ेठै शोहरू मारनै आल़अ दूत इज़राईली मणछा लै कोई हान्‍नी नां करे।✝

29 विश्वासा करै ई डेऊऐ इज़राईली मणछ लाल समुंदरा बाती पारा बाखा लै इहै, ज़िहै शुक्‍की ज़ैगा बाती हांढा! अर ज़ांऊं मिसर देशे राज़े सपाही बी तिहअ ई किअ, तिंयां मूंऐं सोभ समुंदरै पाणीं दी डुबी।✝

30 किल्हैकि इज़राईली मणछ करा तै परमेशरा दी विश्वास, तिंयां रहै साता धैल़ी तैणीं जेरिहो नगरीए दुआली फेर फेरी दैंदै लागी। तेखअ ढूल़ी दुआल। ज़िहअ परमेशरै तिन्‍नां का बोलअ त।

31 राहाब ती कंज़री पर तैहा किअ विश्वास, अर तैहा दैनअ तिन्‍नां इज़राईली मणछा लै लुक्‍की रहणा लै आसरअ ज़ुंण जेरिहो नगरीए भेद लंदै तै आऐ दै। इहअ करै निं सह तिन्‍नां मणछा संघै मारी ज़ुंण परमेशरो बरोध करा तै।✝

32 ऐबै निं मुंह खास्सी गल्‍ला खोज़णें ज़रुरत आथी। मुखा निं ऐबै तिन्‍नां सोभिए बारै खोज़णेंओ बगत आथी कि पांच़ गिदोन, बराक, शिमशोन, जपताह, राज़अ दाबेद, परमेशरो गूर शमूएल अर परमेशरे होरी गूरे बारै शुरू ओर्ही बाढै खोज़ूं। 33 तिन्‍नैं किअ विश्वासा ई करै कई देश ज़िती करै तेथ राज़, तिन्‍नैं किअ भलअ अर तिन्‍नां भेटी तिंयां च़िज़ा ज़ुंण परमेशरै तिन्‍नां लै दैणीं किई ती। सिह निं तिन्‍नां खाई सकै, आग निं तिन्‍नां दहई सकी अर तलबार निं तिन्‍नां मारी सकी! 34 तिन्‍नां लै दैआ त परमेशर तेभै होर बी शगती ज़ेभै तिंयां धख कमज़ोर हआ तै, जुधा दी बी निखल़ै जोधै, तिन्‍नैं दरल़ाऊऐ दुशमणे सपाही सातै-बातै। 35 कई बेटल़ी भेटै आपणैं मूंऐं दै भिई ज़िऊंदै, कई रहै तेभै तैणीं मारा खांदै लागी ज़ेभै तैणीं तिन्‍नें मौत निं हुई, तिन्‍नां लै भेटै ईंयां दुख तै कि दुशमण बोला तै तिन्‍नां लै इहअ, "ज़ै तम्हैं परमेशरा दी विश्वास करनअ छ़ाडे तै सका हाम्हैं तम्हां लै छ़ुटकारअ दैई।"

पर तिंयां निं आपणअ विश्वास छ़ाडी कैद खानै का छ़ुटणअ च़ाहंदै तै। किल्हैकि तिन्‍नैं समझ़अ पृथूई दी ज़िऊंणै का खास्सअ परमेशरा संघै सदा लै ज़िऊंदै रहणअ ठीक। 36 कई लोग बणाऐं सुहांगा-मखौला लै, कई च़िक्‍कै कोल़ै करै, कई डाहै बान्हीं अर कई परखै कैद करी। 37 कई विश्वासी पाऐ पात्थरा करै मारी, कई च़िरै आरै करै, कई पाऐ तलबारा करै काटी। इना लोगा मांझ़ै होर लोग रहै बाझ़ी ढब्बै-धेल्‍लै दाह-दुख ज़िरदी भेडा-बाकरीए खाला बान्हीं ढेक्‍कै-डुआरै नाल़ा-धारा खोखा दी रल़ाखदै लागी। 38 तिंयां रहै पृथूई दी उज़र रेगीस्तानै, धारा, डुआरै जुहल़ी कज़िधल़ी पल़ी।

39 अह संसार त तिन्‍नां लै दुशमण, सह नांईं त तिन्‍नां विश्वासी जोगी आथी, तिन्‍नें विश्वासा भाल़ी हुअ परमेशर बी खुश, तैबी निं तिन्‍नां तिंयां गल्‍ला भेटी ज़ेते परमेशरै करार ती किई दी, 40 किल्हैकि परमेशर च़ाहा तेता का बी बधिया दैणअ, सह निं सिधअ तिन्‍नां लै आथी पर सह आसा हाम्हां लै बी। परमेशर च़ाहा त तिन्‍नां सिध्द करनअ पर सिधअ हाम्हां संघै।