1 इहअ करै बझ़ैल़ै पिलातुसै सपाही का ईशू लै कोल़ै* बाहणैं। 2 तेखअ बणाअं तिन्‍नैं सपाही गुंदी करै एक झ़रीलै कांडैओ मुगट। सह लाअ ईशूए मुंडै अर तेऊ का बन्हैऊंऐं बैंज़णीं रंगे झिकल़ै। 3 तेखअ लागै तेऊ सेटा एछी तेऊए सुहांगा करदै, "हे यहूदी मणछे राज़ैआ, नमस्ते।" संघा लागै तेऊ लै च़ैंडै बाहंदै।

4 पिलातुस आअ तेखअ भिई बागा लै संघा बोलअ तिन्‍नां लै, "भाल़ा, मंऐं लाअ सह तम्हां सेटा लै भिई आणी, ताकि तम्हैं जाणीं सके कि तेऊ दी निं किछ़ै दोश आथी।" 5 तेखअ तिन्‍नैं ईशू मुंडै कांडैओ मुगट, घेरी दी बैंज़णीं रंगे झिकल़ै बान्हअ द तिधी आणअ, अर पिलातुसै बोलअ तिन्‍नां लै, भाल़ा, एऊ मणछा?

6 ज़ांऊं तिन्‍नैं बडै प्रोहतै अर भबने पहरी ईशू भाल़अ, तिन्‍नैं बोलअ झांशा क्रुंगा काढी, "एऊ छ़ड़ाऊआ क्रूसा दी," तेखअ बोलअ पिलातुसै तिन्‍नां लै, "तम्हैं ई छ़ड़ाऊआ एऊ क्रूसा दी, पर मुखा निं एऊ दी किछ़ै दोश शुझणअ।"

7 यहूदी सैणैं दैनअ तेऊ लै ज़बाब, "म्हारअ बी आसा एक बधान, तेऊ बधाने साबै आसा अह मारनै जोगी, किल्हैकि अह बोला आप्पू लै परमेशरो पूत।"✝

8 ज़ांऊं पिलातुसै अह गल्‍ल शूणीं, सह डरअ होर बी, 9 तेखअ डेऊअ सह राज़ भबनै भितरा लै अर ईशू का पुछ़अ, "तूह किधो आसा?" पर ईशू निं कोई ज़बाब दैनअ। 10 पिलातुसै बोलअ ईशू लै, "तूह मुखा किल्है निं बोल्दअ? मुखा आसा सारै हक, ताह हुंह छ़ाडी बी सका अर ताह हुंह क्रूसा दी बी सका छ़ड़ाऊई।"

11 ईशू दैनअ तेऊ लै ज़बाब, "ज़ै अह हक उझै का नांईं भेटदअ, तै निं मुंह दी तेरअ किछ़ै हक हणअ त। तैही ज़ुंणी मणछै हुंह ताखा दैनअ, तेऊओ पाप आसा खास्सअ।"

12 ऐहा गल्‍ला शूणीं च़ाहा त राज़पाल पिलातुस ईशू छ़ाडणअ पर यहूदी मणछै बोलअ बडअ हाल्‍लअ-गोल्‍लअ पाई, "ज़ै तूह एऊ छ़ाडे, तै समझ़णअ हाम्हां कि तेरअ साथ निं माहा राज़ै संघै आथी, ज़ुंण बी आप्पू लै राज़अ बोला सह हआ माहा राज़ैओ बरोधी।"

13 इना गल्‍ला शूणीं काढअ पिलातुसै ईशू बागा लै ज़िधी च़ौकअ थिअ, ज़ेता लै इब्रानी बोली दी गब्बतअ बोला, अर आप्पू बेठअ नसाफ करने गाद्दी दी। 14 ऐहा धैल़ी ती ऊवार्णे थैरे तैरी लागी दी ईंयां आसा दपहरा पैहलै गल्‍ला, तेखअ बोलअ पिलातुसै यहूदी लै,

"भाल़ा, इधी आसा थारअ राज़अ।"

15 पर तिन्‍नैं पाअ हाल्‍लअ-गोल्‍लअ, "निंऊं, निंऊं क्रूसा दी छ़ड़ाऊआ एऊ।"

पिलातुसै बोलअ तिन्‍नां लै, "हुंह थारै राज़ै लै क्रूसे सज़ा दैंऊं?"

बडै प्रोहतै बोलअ, "माहा राज़ै छ़ाडी निं म्हारअ कोहै राज़अ आथी।"

16 तेखअ दैनअ पिलातुसै ईशू तिन्‍नें हाथै क्रूसा दी छ़ड़ाऊई मारना लै।

तेखअ निंयं तिन्‍नैं ईशू। 17 ईशू च़कअ आपणअ क्रूस आपणीं कान्हा तैहा ज़ैगा तैणीं, ज़िधा लै खोपल़ीए ज़ैगा बोला, अर इब्रानी बोली दी बोला तै तिधा लै गुलगुता। 18 तिधी छ़ड़ाऊअ तिन्‍नैं ईशू क्रूसा दी। तेऊ संघै छ़ड़ाऊऐ दूई होर बी क्रूसा दी एक दैहणै अर एक बाऊंऐं अर तिन्‍नां मांझ़ै ईशू। 19 पिलातुसै लिखअ एकी तगती दी ईशूओ दोश अर सह टोक्‍की क्रूसा दी, तेथ त लिखअ द, "नासरत नगरीओ ईशू यहूदी मणछो राज़अ।" 20 सह तगती ती यूनानी, लतीनी अर इब्रानी बोली दी लिखी दी। तैहा तगती दी लिखअ द दोश पहल़अ कई यहूदी मणछै ताकि कई लोग पहल़ी सके। ज़िधी ईशू क्रूसा दी छ़ड़ाऊअ, सह ज़ैगा ती एरुशलेम नगरी नेल़।

21 तेखअ यहूदी मणछे कई बडै प्रोहतै बोलअ पिलातुसा सेटा डेऊई, "यहूदी मणछो राज़अ निं लिखै, पर इहअ लिख कि तेऊ बोलअ इहअ कि हुंह आसा यहूदी मणछो राज़अ।"

22 पिलातुसै ज़बाब दैनअ, "ज़ुंण मंऐं लिखी हेरअ, सह हेरअ मंऐं लिखी।"

23 ज़ांऊं सपाही ईशू क्रूसा दी छ़ड़ाऊई मुक्‍कै, तिन्‍नैं किऐ ईशूए झिकल़े च़ार भाग अर हर सपाही बांडणां लै ढाकअ कुर्तअ बी पर कुर्तअ त प्रैंदा का थाल्‍लै तैणीं एकी ज़ोल़ै बूणअ द, तेता भाल़ी बोलअ तिन्‍नैं, अह निं हाम्हां धेल़णअ आथी पर एते पाणीं हाम्हां परच़ी, अर ज़सरी परच़ी एछे, तेऊओ हणअ अह कुर्तअ। 24 तिन्‍नैं सपाही किअ तिहअ ई। अह हुअ तै कि पबित्र शास्त्रे लिखी दी गल्‍ल पूरी होए कि तिन्‍नैं बांडै मेरै झिकल़ै आप्पू मांझ़ै परच़ी पाई।✝

25 ईशूए ईज, तेसे बैहण, अर कलोपासे लाल़ी मगदल़ गराऊंए मरिअम ती तिधी क्रूसा सेटा खल़्हुई करै भाल़ी लागी दी। 26 ज़ांऊं ईशू आपणीं ईज अर आपणअ च़ेल्‍लअ ज़हा संघै ईशू झ़ूरी करा त, तिधी खल़ै भाल़ै, ईशू बोलअ आपणीं ईजा लै, "ईजै, भाल़, अह आसा तेरअ शोहरू।" 27 तेखअ बोलअ ईशू तेऊ च़ेल्‍लै लै, "अह आसा तेरी ईज।" तेखअ निंईं तेऊ च़ेल्‍लै तेभी सह आपणैं घअरा लै।

28 तेखअ ईशू ज़ांऊं थोघ लागअ कि सोभ गल्‍ला गई ऐबै हई, ईशू बोलअ, "मुंह आई चिशै" इहअ हुअ तै कि पबित्र शास्त्रा दी लिखी दी गल्‍ला पूरी होए। 29 तिधी त एक मिल्‍लै दाखे रसा करै भरअ द हांडअ, तिन्‍नैं डबेऊअ सिरकै दी शाट्टअ अर ज़ुफा नाओंए बूटे शाण्हटी दी चैल़ी करै दैनअ तेऊए खाखा च़ाखणा लै।✝ 30 सिरकै च़ाखी करै बोलअ तेऊ इहअ, "पूरअ हुअ" अर मुंडकी ढोल़ी शोटै ईशू प्राण।✝

31 सह थिई ऊवार्णे थैरे तैरी करने धैल़ी अर बशैघे धैल़ी ती शुरू हणैं आल़ी। अह बशैघे धैल़ी ती खास बी किल्हैकि ऐहा धैल़ी त ऊवार्णैओ थैर बी। यहूदी सैणैं निं च़ाहंदै तै कि बशैघे धैल़ी तिंयां ल्हासा क्रूसा दी रहे। तिन्‍नैं किई पिलातुसा का अरज़ किई कि तिन्‍नें ज़ांघा पाआ चोल़ी अर तिन्‍नां काढा क्रूसा का धरनीं।✝

32 तेखअ चोल़ी सपाही तिन्‍नां दूई डाकूए ज़ांघा ज़ुंण ईशू संघै क्रूसा दी छ़ड़ाऊऐ तै। 33 पर ज़ांऊं तिंयां ईशू सेटा एछी भाल़अ कि ईशू आसा गअ द मरी, तिन्‍नैं निं ईशूए ज़ांघा चोल़ी। 34 पर तिन्‍नां सपाही मांझ़ै बाही एकी ईशूए कुछी बर्छ़ै करै अर बर्छ़ै बाहंदी निखल़अ तिधा का लोहू अर पाणीं। 35 ज़ुंणी अह भाल़अ, तेऊ आसा शाजत दैनी दी अर तेऊए शाजत आसा शुची। तेऊ का आसा थोघ कि सह बोला शुचअ कि तम्हैं बी करा विश्वास। 36 ईंयां गल्‍ला हुई तै कि पबित्र शास्त्रा दी लिखी दी अह गल्‍ल हुई पूरी, "तेऊओ निं एक हाडकअ बी लोल़ी चोल़अ।"✝

37 पबित्र शास्त्रा दी आसा एकी होरी ज़ैगा बी लिखअ द, "हरेकी आछी भाल़णअ सह, इधी तैणीं ज़ुंणी तेऊ लै कील बर्छ़ै बी बाहै तै तिन्‍नां का बी शुझणअ सह।"✝

38 तेखअ आअ अरमतियाह गराऊंओ युसुफ नाओं एक मणछ, सह थिअ आप्पू बी ईशूओ च़ेल्‍लअ, (पर यहूदी सैणें डरै निं सह बोल्दअ कि हुंह आसा ईशूओ च़ेल्‍लअ) तेऊ किई पिलातुसा का अरज़ कि ईशूए ल्हास दै मुंह निंणै। पिलातुसै दैनी तेऊ लै ज़ाज़त। तेखअ निंईं तेऊ ईशूए ल्हास। 39 निकूदमास ज़ुंण ईशू सेटा लै एकी बारी राची आअ त, तेऊ आणअ लोवान अर खास्सअ खुशबूदार गंधरस ईशूए ल्हासा दी मल़णा लै।

40 तेखअ च़की तिन्‍नैं ईशूए ल्हास संघा पल़ेटी यहूदी मणछे दाबणे रिती-रबाज़े साबै खुशबूदार गंधरस मल़ी करै बाछे च़ादरा दी। 41 तेखअ ज़िधी ईशू क्रूसा दी मारअ त, तिधी त एक बाग अर तेऊ बागा दी थिई एक नऊंईं घोर कोती दी, तेथ निं अज़ी कोहै डाहअ त। 42 यहूदी मणछे ऊवार्णे थैरे तैरी करने धैल़ी हणें तैणीं डाही तिन्‍नैं ईशूए ल्हास तैहा घोरी दी किल्हैकि सह थिई सोभी का नेल़।