जोहन्‍ना 20

मगदल़ गराऊंए मरिअमा लै प्रगट हणअ

11 पर मरिअम रही घोरी बागै खल़्हुई लेरदी लागी, संघा लागी लेरदी-लेरदी घोरी भितरी भाल़ी। 12 तैहा का शुझुऐ शेतै च़मकदै झिकल़ै बान्हैं दै दूई स्वर्ग दूत ज़िधी ईशूए ल्हास ती डाही दी, एक थिअ शरैहणैं अर एक खूरा सेटा बेठै दै। 13 तिन्‍नैं बोलअ तैहा लै, "हे बैहण, तूह किल्है आसा लागी दी लेरदी?" तैहा बोलअ तिन्‍नां लै,

"तिन्‍नैं निंईं म्हारै प्रभूए ल्हास इधा का च़की, ऐबै मुखा निं थोघै कि तिन्‍नैं सह किधी आसा डाही दी।"

14 इहअ बोली ज़ांऊं तैहा पिछ़ू भाल़अ, पिछ़ू त ईशू खल़्हुअ द। पर तैहा निं बछ़ैणीं कि अह आसा ईशू। 15 ईशू बोलअ तैहा लै, "हे बैहण, तूह किल्है आसा लागी दी लेरदी? तूह कहा लोल़ी आसा लागी दी?"

तैहा बोलअ बागो बेठू समझ़ी तेऊ का, "हे मालक, ज़ै तंऐं सह इधा का च़कअ, तै खोज़ मुखा कि तंऐं किधी आसा सह डाहअ द।"

16 ईशू बोलअ तैहा लै, "मरिअम"

तैहा भाल़अ पिछ़ू अर इब्रानी बोली दी बोलअ, "रबूनी," मतलब "गूरू।"

17 ईशू बोलअ तैहा लै, "मुंह निं छ़ूंऐं आथी, हुंह निं अज़ी आपणैं बाब परमेशरा सेटा लै उझै डेऊअ। पर मेरै तिन्‍नां साथी-भाई सेटा लै डेऊ अर तिन्‍नां का बोलै कि हुंह च़ाल्‍लअ आपणैं बाब अर थारै बाब अर आपणैं परमेशर अर थारै परमेशरा सेटा लै उझै डेऊई।"

18 मगदल़ गराऊंए मरिअमै खोज़ी ईंयां सारी गल्‍ला च़ेल्‍लै का, "मंऐं भाल़अ प्रभू अर तेऊ किई मुंह संघै ईंयां गल्‍ला।"