1 तेखअ खोज़ी ईशू तिन्‍नां का एक कथ्या, "एकी मणछै लाअ एक दाखो बाग अर तेता फेर लाऐ बाल़। एक बणाईं दाखे रसा लै कोफर। बागे पहरै करना लै डाही तिधी उछ़टै एक छ़ान बणाईं।

"तेखअ डाहअ होरी कृषाणा का सह बाग ठेकै दी दैई अर आप्पू डेऊअ सह परदेसा लै।

2 "तेखअ फल़ा दैणें सिज़नै छ़ाडअ तेऊ कृषाणा सेटा आपणअ एक दास इहअ बोली कि दाखे बागा दी ज़ुंण फसल लागी दी होए तेतो हेस्सअ आणै मांगी। 3 पर तिन्‍नैं कृषाणै ढाकअ सह संघा छ़ाडअ च़िक्‍की-फणाटी रित्तअ बापस।

4 "तेखअ छ़ाडअ तिन्‍नां सेटा तेऊ एक होर दास पर तिन्‍नैं फाल़अ तेऊओ मूंड अर तेऊए निं कोई कदर किई। 5 संघा तेऊ एक होर दास बी छ़ाडअ, पर तिन्‍नैं पाअ सह बी मारी। इहै ई छ़ाडै तेऊ मालकै तिन्‍नां सेटा लै होर बी कई, पर तिन्‍नैं कृषाणै पाऐ तिंयां कोई च़िक्‍की-फणाटी अर कई पाए तिन्‍नां मांझ़ै मारी।

6 "ऐबै त तेऊओ एक्‍कै पूत रहअ द, ज़हा लै सह सोभी का खास्सी झ़ूरी करा त। खिरी छ़ाडअ तेऊ सह आपणअ शोहरू बी। तेऊ सोठअ इहअ, ‘मेरै शोहरूए हेरनी तिन्‍नां कदर करी।’

7 "तिन्‍नैं कृषाणै बोलअ आप्पू मांझ़ै जोग करी, ‘अह ई ता आजू तेऊए लुआद आसा, एछा अह पाणअ हाम्हां मारी अर फसल हणीं सोभ म्हारी।’ 8 तिन्‍नैं पाअ सह मारी अर सह डाहअ दाखे बागा का पोर्ही शोटी।"

9 ईशू पुछ़अ, "तेखअ ऐबै तेऊ बागे मालका तिन्‍नां संघै किज़ै करनअ होए? हुंह खोज़ा तम्हां का कि तेऊ एछणअ अर तिंयां कृषाण निं तेऊ ज़िऊंदै छ़ाडणैं। दाखो बाग दैणअ होरी लै।"*भज. 118:23

10 "तम्हैं कै पबित्र शास्त्रा दी पहल़अ द निं आथी?

‘ज़ुंण पात्थर राज़ मिस्त्री बृथा समझ़अ त,

सह ई बणाईं तेऊ कूणींए ज़ान।

11 ईंयां गल्‍ला हुई प्रभू बाखा अर

ईंयां गल्‍ला शुझुई हाम्हां का नुआहरी।’"

12 तिंयां च़ाहा तै ईशू ढाकणअ, किल्हैकि तिंयां गऐ तै समझ़ी कि एऊ बोली ईंयां गल्‍ला हाम्हां लै। पर तिंयां डरै लोगा का कि इहअ निं हआ कि लोग म्हारअ बरोध करे अर तिन्‍नैं निं सह ढाकअ आथी अर तिंयां लागै तिधा का हांढदै।

13 यहूदी छ़ाडै ईशू लै दोश लोल़णें तैणीं किछ़ फरीसी अर हेरोदेस राज़ेए पक्ष लणैं आल़ै लोग तेऊ सेटा लै तेऊ परखदै।

14 तिन्‍नैं बोलअ तेऊ लै, "हे गूरू, हाम्हां का आसा थोघ कि तूह आसा शुचअ, अर तूह निं कोहिए परबाह करदअ, अर नां तूह मणछे मुंहां भाल़ी गल्‍ला करदअ, पर तूह खोज़ा परमेशरा सेटा डेऊणे बात बडी सत्त संघै। पर हाम्हां का खोज़ इहअ, माहा राज़ै लै कारअ दैणअ ठीक आसा कि गलत आसा? 15 हाम्हां कारअ दैणअ लागा कि नांईं?"

ईशू हेरअ तिन्‍नें दिलो कपट समझ़ी संघा बोलअ तिन्‍नां लै, "तम्हैं मुंह परखदै किल्है आसा लागै दै? एक च़ंदीओ सिक्‍कअ आणा मुंह सेटा लै, मुंह भाल़णअ सह।" 16 तिन्‍नैं आणअ एक च़ंदीओ सिक्‍कअ, तेखअ बोलअ ईशू तिन्‍नां लै, "एथ कसरी मुहुर्ती अर नाअं आसा।"

तिन्‍नैं बोलअ, "माहा राज़ैओ नाअं अर मुहुर्ती।"

17 ईशू बोलअ तिन्‍नां लै, "ज़ुंण माहा राज़ैओ आसा, तेऊ दैआ माहा राज़ै लै, ज़ुंण आसा परमेशरो तेऊ दैआ परमेशरा लै।"

तिंयां हुऐ तेऊए गल्‍ला शूणीं रहैन।

18 तेखअ आऐ तिधी सदुकी पंथे लोग। तिंयां मना तै इहअ, "मूंऐं दै मणछो ज़िऊंदै हणैं आल़ी गल्‍ल आसा झ़ुठी।"

तिन्‍नैं पुछ़अ ईशू का, 19 "हे गूरू, परमेशरे गूर मोसा आसा हाम्हां लै इहअ लिखअ द कि, ज़ै कसरअ भाई बाझ़ी लुआदी मरे अर तेऊए लाल़ी पिछ़ू कल्ही छ़ुटे, तेऊओ भाऊ सका तैहा संघै बैह करी। सह आपणैं भाई लै लुआद बी सका पैईदा करी।✝

20 "एकी ज़मानें गल्‍ल आसा एही कि एकी बारी तै सात भाई, पैहलअ भाई मूंअ बैहा बाद अर तेऊए निं आजू लुआद हुई, 21 अर दुजै भाई किअ तेऊए बेटल़ी संघै बैह अर सह बी मूंअ तेऊए बी निं लुआद हुई, इहअ ई चिऐ भाई बी किअ अर सह बी मूंअ।

22 "इहअ करै मूंऐं तिंयां सात भाई अर लुआद निं तिन्‍नां कोहिए हुई खिरी मूंईं सह बेटल़ी बी। 23 ता, ऐबै ज़ेभै सह भिई ज़िऊंदी हणीं, सह तिन्‍नां साता भाई मांझ़ै कसरी बेटल़ी हणीं? किल्हैकि सह ता पैहलै साता ज़ण्हे बेटल़ी ती?"

24 ईशू बोलअ तिन्‍नां लै, "तम्हां का नांईं ता पबित्र शास्त्रो थोघ आथी, अर नां परमेशरे शगतीओ थोघ आथी? 25 ज़ेभै तिंयां मूंऐं दै मांझ़ै ज़िऊई उझ़णै, तेभै नां ता तिन्‍नां बैह करनअ। नां तिंयां बैहा लै दैणैं। पर स्वर्गै हणैं तिंयां स्वर्ग दूता ज़िहै।

26 "मरी करै ज़िऊंदै हणें बारै कै तम्हैं, मोसा गूरे कताबा दी ज़ल़दै झ़ाकल़ा आल़ी कथ्या निं शूणीं आथी कि परमेशरै आपणैं गूर मोसा लै किज़ै बोलअ, ‘हुंह आसा सह परमेशर ज़हा तेरै दाद-बाब आबराम, इसहाक अर याकब मना तै!’

27 "इहअ बी बोलअ ‘परमेशर निं मूंऐं दै मणछो आथी, परमेशर आसा ज़िऊंदै मणछो।’ पर तम्हैं आसा बडी भूला दी पल़ै दै।"

28 शास्त्री मांझ़ै शुणें एकी तिंयां आप्पू मांझ़ै छफल़दै कि एऊ, ईंयां बडै बधिया करै समझ़ाऊऐ अर तेऊ पुछ़अ ईशू का, "सोभी का खास हुकम किज़ै आसा?"

29 ईशू बोलअ तेऊ लै, "सोभी का खास हुकम आसा अह, इज़राईलीओ, शूणां! म्हारअ परमेशर बिधाता आसा एक्‍कै ज़ुंण असली परमेशर आसा।

30 "तम्हैं करै आपणैं परमेशर बिधाता लै आपणअ सारअ मन्‍न, प्राण अर आपणअ सारअ ज़ोर लाई झ़ूरी। 31 दुजअ हुकम आसा अह कि तूह करै आप्पू फेर रहणैं आल़ै होरी मणछा लै बी तेही झ़ूरी ज़िहअ तूह आप्पू लै झ़ूरा। एता का बडअ निं होर कोहै हुकम आथी।"

32 शास्त्री बोलअ ईशू लै, "हे गूरू, तंऐं बोली शुची गल्‍ला कि सह आसा एक्‍कै, अर तेऊ छ़ाडी निं होर कोहै परमेशर आथी।✝ 33 तेऊ संघै डाहणीं सारै दिला, मन्‍न, प्राण अर सारै कामां करै झ़ूरी।

"आपणैं साथी-संघी लै बी झ़ूरै तिहअ ई ज़िहअ तूह आप्पू लै झ़ूरा, ईंयां गल्‍ला आसा सारी भैंट, हूम बल़ी अर सोभी बल़ीदाना का खास।"✝

34 ज़ांऊं ईशू भाल़अ कि तेऊ दैनअ बडी समझ़ा संघै ज़बाब, ईशू बोलअ तेऊ लै, "तूह आसा परमेशरे राज़ा नेल़।" तेखअ निं कोही बी तेऊ का पुछ़णें हिम्मत हुई।

35 तेखअ बोलअ ईशू परमेशरे भबनै शिक्षा दैंदी बारी इहअ, "शास्त्री किल्है बोला इहअ कि मसीहा आसा दाबेद राज़ैओ शोहरू? 36 दाबेद राज़ै आसा आप्पै ई पबित्र आत्मां दी भर्हुई करै बोलअ

* भज. 110:1 ‘परमेशर बिधाता बोलअ मेरै प्रभू का,

मेरी दैहणै बेश,

ज़ेभै तैणीं हुंह तेरै दुशमणा तेरै खूरा हेठै निं करूं।’

37 "राज़अ दाबेद ता आप्पू बी तेऊ लै प्रभू बोला त! तेखअ मसीहा तेऊओ शोहरू केऊ साबै हुअ? अर लोग शूणां तै तेऊए गल्‍ला बडै धैन दैई करै।"

38 ईशू दैनी तिन्‍नां लै शिक्षा, "इना शास्त्री का रहै चतैन, ज़ुंणी ईंयां लोगा रहैऊंणा लै लाम्मै च़ोल़ै हआ बान्हैं दै। कि तिंयां किहै महान आसा। ईंयां च़ाहा कि लोगै लोल़ी तिन्‍नां सेटा हाथ ज़ोल़ै। 39 सभागृहा लोल़ी इना खास-खास ज़ैगा बेशणा लै। धामा दी च़ाहा तिंयां ज़ुदै ज़िहै खास ज़ैगा बेशणअ। 40 ईंयां लुटा च़लाकी करै बिधबा बेटल़ीए घअर। होरी का रहैऊंणा लै फिरा ईंयां खास्सी घल़ी प्राथणां करदै। इना लै भेटणीं सोभी का खास्सी सज़ा।"

41 ईशू लागअ भबने भढारा सेटा भाल़अ कि ईंयां भबने भढारै ढब्बै-धेल्‍लै केऊ साबै पाआ, बडै-बडै सेठ मणछै पाऐ आपणैं साबै खास्सै ढब्बै। 42 तेतरी आई एक गरीब बिधबा, सह भाल़ी ईशू दूई चाम्बे सिक्‍कै पांदी ज़ेते खास्सी किम्मत निं हंदी।

43 तेखअ शादै ईशू आपणैं च़ेल्‍लै आप्पू सेटा लै। तेऊ बोलअ तिन्‍नां लै इहअ, "हुंह खोज़ा तम्हां लै सत्त कि भबने भढारै दान दैणैं आल़ै मांझ़ै दैनअ ऐहा गरीब बिधबा सोभी का खास्सअ दान।

44 "किल्हैकि सोभी दैनअ आपणैं खास्सै ढब्बै मांझ़ै आपणीं खास्सी ज़ैदाता का। पर ऐहा गरीब बिधबा दैनअ आपणीं काम्मी-पेशी का आपणीं सारी कमाई।"