Mateus 14

जोहन्‍ना डुबकी दैणैं आल़ेए हत्या

1 तिन्‍नां धैल़ै शूणीं गलील मुल्खै राज़ करनै आल़ै हेरोदेस राज़ै ईशूए बारै गल्‍ला। तेऊ बोलअ आपणैं दरबारी लै इहअ, 2 अह ईशू आसा जोहन्‍ना डुबकी दैणैं आल़अ अर सह हुअ मरी करै भिई ज़िऊंदअ, तैही हआ एऊ का एतरै च़मत्कारे काम प्रगट।

3 किल्हैकि हेरोदेस राज़ै पाअ त जोहन्‍ना आपणैं भाई फलिप्पे लाल़ी हेरोदियासा पिछ़ू कैद खानै दी। 4 इहअ किअ तेऊ तै कि जोहन्‍ना बोलअ त राज़ै लै इहअ कि आपणैं भाईए बेटल़ी डाही करै किअ तंऐं पाप। 5 हेरोदेस राज़अ ता च़ाहा त जोहन्‍ना मारनअ पर सह डरा त लोगा का, किल्हैकि लोग मना तै जोहन्‍ना परमेशरो गूर।

6 पर ज़ांऊं हेरोदेस राज़ेए ज़ल्म धैल़ी पुजी, हेरोदियासे शोहरी किअ राज़ तेऊ थैरा दी आपणअ नाच़ रहैऊई करै खुश। 7 राज़ै दैनअ तैहा लै बच़न कि ज़िहअ बी तूह मांगे, हुंह दैंऊं तेता ताल्है।

8 सह शोहरी ती तेसे ईजै शगरेऊई डाही दी अर तैहा बोलअ राज़ै लै इहअ किई मुल्है आण थाल़ा भितरी जोहन्‍ना डुबकी दैणैं आल़ैओ मूंड एभी काटी। 9 राज़अ हेरोदेस पछ़ताअ हेरोदियासे शोहरी लै बच़न दैई। किल्हैकि तिधी बेठै दै सोभी प्राहुंणैं बी शूणीं तेऊए तिंयां गल्‍ला अर तेखअ पल़अ तेऊ तिहअ करनअ ज़िहअ तेऊ बच़न दैनअ त।

तेखअ दैनअ तेऊ आपणैं दासा लै हुकम कि ज़िहअ अह शोहरी बोला तिहअ ई करा। 10 तेऊ दैनअ कैद खानै आपणैं सपाही लै हुकम कि डेओआ, जोहन्‍नो मूंड आणा एभी काटी। 11 सपाही आणअ थाल़ा भितरी तेऊओ मूंड संघा दैनअ तैहा शोहरीए हाथै अर तैहा निंयं सह आपणीं ईजा सेटा लै। 12 तेखअ निंईं जोहन्‍ने च़ेल्‍लै तिधा का तेऊए ल्हास, संघा डाही तिन्‍नैं सह घोरी दाबी अर तिन्‍नैं दैनअ इना गल्‍लो समाद ईशू लै कि जोहन्‍ना पाअ हेरोदेस राज़ै मारी।

पांज़ा हज़ारा मणछा का रोटी खैऊंणी

13 ज़ांऊं ईशू इहअ शूणअ, सह डेऊअ किश्ती दी बेशी किधी कांगनरांगी ज़ैगा लै। पर लोगा का गअ थोघ लागी अर कई नगरी का आऐ खास्सै मणछ ज़ांघा हांढी संघा पुजै तिधी ज़िधी ईशू थिअ। 14 ईशू भाल़ै कि तिधी आऐ खास्सै मणछ अर तेऊ फिरी तिन्‍नां भाल़ी झींण। तिन्‍नां जैंदरी तै खास्सै रोगी मणछ अर ईशू किऐ तिंयां सोभ नरोगै।

15 ज़ांऊं सान्ह पल़ी, ईशूए च़ेल्‍लै आऐ तेऊ सेटा लै अर तिंयां लागै इहअ बोल्दै, "अह आसा बडी कराहणीं ज़ैगा अर सान्ह बी च़ाल्‍ली पल़ी, इना लोगा लै बोल ऐबै डेऊणा लै ताकि ईंयां किधी गराऊंऐं आप्पू लै रोटीओ इंतज़ाम करी सके।"

16 ईशू बोलअ तिन्‍नां लै, "इनो डेऊणअ निं ज़रूरी आथी, तम्हैं ई दैआ इना लै रोटी खाणां लै।"

17 तिन्‍नैं च़ेल्‍लै बोलअ ईशू लै, "हाम्हां सेटा निं इधी पांज़ रोटी अर दूई म्हाछ़ली छ़ाडी होर किछ़ै आथी।"

18 ईशू बोलअ तिन्‍नां लै, "तिन्‍नां आणा मुंह सेटा लै।" 19 संघा बोलअ तेऊ आपणैं च़ेल्‍लै लै, "सोभी लोगा बशैल़ा धरनीं घाहा प्रैंदै घेहल़ी दी।" तेखअ ढाकी पांज़ रोटी अर दूई म्हाछ़ली हाथै। तेखअ किअ स्वर्गा बाखा भाल़ी परमेशरो शूकर संघा दैनी रोटी अर म्हाछ़ली चोल़ी-चोल़ी करै च़ेल्‍ले हाथै। तिंयां लागै घेहल़ी लोगा लै बांडदै।

20 सोभी लोगै खाई रज्ज़ी रोटी, अर बारा च़ठै भर्हुऐ तिन्‍नां रोटीए ज़ुंण पिछ़ू बाकी बच़ी! 21 रोटी खाणैं आल़ै पांज़ हज़ार मर्ध ई मर्ध अर बेटल़ी-माठै तै तिन्‍नां का लाऊआ।

ईशूओ पाणीं प्रैंदै हांढणअ

22 तेखअ बशैल़ै तेभी ईशू आपणैं च़ेल्‍लै किश्ती दी ज़ोरा-ज़ोरी कि तम्हैं डेओआ पैहलै गलील समुंदरा पार ज़ेभै तैणीं हुंह इना सोभी लोगा इने घअरा लै बापस निं छ़ाडी लऊं। 23 ईशू छ़ाडै तिंयां सोभ लोग घअरा लै अर आप्पू डेऊअ सान्हां एक्‍कै ज़ण्हअ धारठी प्रैंदै प्राथणां करदअ।

24 समुंदरै आअ बडअ ढिश-बागर अर किश्ती लागी समुंदरा मांझ़ै बागरी करै ओरी-पोरी ढुल़दी। 25 ईशू आअ राचकै च़ौथै पहरै समुंदरे पाणीं प्रैंदै हांढी तिन्‍नां सेटा लै। 26 ज़ांऊं च़ेल्‍लै का ईशू पाणीं प्रैंदै हांढदअ शुझुअ, तिंयां डरै खास्सै। तिंयां लागै आप्पू मांझ़ै इहअ बोल्दै, "अह आसा भूत।" तेखअ लागै तिंयां डरै ज़ोरै-ज़ोरै लैल़ा-पकारा पांदै।

27 तेखअ किई तेभी ईशू तिन्‍नां संघै गल्‍ला, "डरा निं आथी, अह आसा हुंह तम्हैं निं हैअ चोल़ा।"

28 तेखअ बोलअ पतरासै ईशू लै, "प्रभू, ज़ै तूह ई आसा, तै दै मुल्है पाणीं प्रैंदै हांढी करै एछणें ज़ाज़त।"

29 ईशू बोलअ, "एछ"

पतरास लागअ किश्ती का पाणीं प्रैंदै होथी ईशू बाखा पाणीं प्रैंदै हांढदअ। 30 पर पतरास डरअ ढिश-बागरी करै, ज़ांऊं सह पाणीं दी डुबदअ लागअ, तेऊ पाई लैल़ा "हे प्रभू, मुंह बच़ाऊ! हुंह च़ाल्‍लअ डुबी, मुंह बच़ाऊ!"

31 ईशू ढाकअ तेभी तेऊओ हाथ संघा बोलअ इहअ, "बैहम करनै आल़ै मणछा, तंऐं बैहम किल्है किअ?"

32 ज़ांऊं तिंयां किश्ती दी उखल़ै, ढिश-बागर मुक्‍की तेभी। 33 तेखअ ज़ुंण किश्ती दी थिऐ बेठै दै, एता भाल़ी टेक्‍कअ तिन्‍नैं ईशू सेटा माथअ संघा बोलअ इहअ, "तूह आसा सच्च़ी परमेशरो पूत।"

गन्‍नेसरत समुंदरे बाढै किऐ खास्सै रोगी नरोगै

34 तिंयां सोभ पुजै गलील समुंदरा पार डेऊई गन्‍नेसरत मुल्खे समुंदरे बाढै। 35 तिधे लोगै हेरअ ईशू तेभी बछ़ैणीं, संघा दैनअ तिन्‍नैं ओरी-पोरीए नगरी-गराऊंआं दी डेऊई होरी सोभी लै समाद, संघा आणै तिन्‍नैं कई बमार मणछ ईशू सेटा लै।

36 तेखअ लागै तिंयां ईशू का एही अरज़ करदै "तूह दै हाम्हां च़ाऐ आपणैं च़ोल़ैओ पाल्‍लअ पुंझ़ा का छ़ुंहंणै ताकि हाम्हैं इना बमारी का बच़े।" ज़ेतरै मणछै बी ईशू छ़ुंअ, तिन्‍नां भेटअ तिन्‍नें सोभ रोग अर बमारी का छ़ुटकारअ।