1 पबित्र आत्मां निंयं तेभी ईशू शुन्‍नैं रेगीस्ताना लै अर तिधी रहअ राख्स तेऊ परखदअ लागी। 2 ईशू रहअ च़ाल़्ही धैल़ै अर च़ाल़्ही राची ब्रतू, अर च़ाल़्ही धैल़ै बाद आई तेऊ भुखै।✝

3 तेखअ बोलअ राख्सै ईशू लै, "ज़ै तूह परमेशरो पूत आसा, तै बोल तूह इना पात्थरा लै इहअ कि रोटी बण?"

4 ईशू दैनअ तेऊ लै ज़बाब, "पबित्र शास्त्रा दी आसा लिखअ द इहअ,

‘मणछ निं सिधअ रोटी करै ज़िऊंदअ,

पर परमेशरे बोली दी हरेक गल्‍ला मनी सका सह ज़िऊंदअ रही।’"

5 तेखअ निंयं राख्सै ईशू पबित्र एरुशलेम नगरी, संघा किअ परमेशरे भबने च़ुंडी खल़अ, तेखअ बोलअ इहअ,✝ 6 "ज़ै तूह परमेशरो पूत आसा, तै दै इधा का उंधै छ़ाहल़! किल्हैकि पबित्र शास्त्रा दी आसा इहअ बी लिखअ द,✝

‘परमेशरा डाहणैं तेरी फाज़त करदै हर ज़ैगा स्वर्ग दूत लाई,

तूह ज़िधी बी डेऊए, तिंयां रहणैं ताह संघा।

तूह नढैऊणअ तिन्‍नां स्वर्ग दूता हाथा ढाकी,

ताकि तेरै च़रणैं ठोहल़ नां लागे।’"

7 ईशू बोलअ तेऊ लै, "पबित्र शास्त्रा दी आसा इहअ बी लिखअ द, ‘तम्हैं निं आपणैं परमेशर परखदै लागी*बधा. 6:16।’"

8 ✝तेखअ निंयं राख्सै सह एकी उछ़टी धारा संघा बोलअ तेऊ ईशू का सारै संसारो राज़ अर सुख रहैऊई, 9 "ज़ै तूह मुंह सेटा माथअ टेक्‍के तै हणीं ईंयां सोभै गल्‍ला तेरी।"

10 तेखअ बोलअ ईशू राख्सा लै, "*बधा. 6:13ओ राख्सा मेरी आछी का हअ दूर, पबित्र शास्त्रा दी आसा लिखअ द,

‘तूह टेक्‍कै सिधअ आपणैं प्रभू परमेशरा सेटा माथअ

सिधी तेऊए ई च़ाकरी करै।’"

11 तेखअ डेऊअ राख्स ईशू सेटा का दूर अर स्वर्ग दूत लागै ईशूए च़ाकरी करदै।

12 ज़ांऊं ईशू शूणअ कि जोहन्‍ना डुबकी दैणैं आल़अ किअ कैद, सह डेऊअ यहूदा मुल्खा का गलील मुल्खा लै फिरी।✝ 13 तेखअ लागअ ईशू नासरत गराऊंआं छ़ाडी कफरनहूम नगरी समुंदरे बाढै ज़बलून अर नप्तालीए मुल्खै रहंदअ। 14 ताकि पबित्र शास्त्रा दी परमेशरे गूर ईशायाह बोली दी गल्‍ला पूरी होए,

15 "ज़बलून अर नप्तालीए मुल्खै,

समुंदरे बाढै, जरदण नदी नेल़,

गलील मुल्खै, होरी ज़ातीए लोग,

16 ज़ुंण न्हैरै दी तै बेठै दै,

तिन्‍नां का शुझुअ खास्सअ प्रैश्शअ,

ज़ुंण लोग तेऊ देशै मौते छ़ैल्‍ली दी तै बेठै दै,

तिन्‍नां लै हुअ ऐबै प्रैश्शअ।"

17 तधा पोर्ही किई ईशू लोगा का एही गल्‍ला खोज़णीं शुरू, "आपणैं पापो प्राश्त करा, अर परमेशरा सेटा एछा फिरी, स्वर्गो राज़ गअ नेल़ एछी।"

18 एकी धैल़ी त ईशू गलील समुंदरे बाढै हांढदअ लागअ द, तेऊ भाल़ै दूई मणछ शमौन ज़हा लै पतरास बोला अर तेऊओ भाऊ आन्दरू। तिंयां थिऐ लागै दै पाणीं दी म्हाछ़ली ढाकणा लै ज़ज़ाल़ा पांदै किल्हैकि तिंयां करा तै म्हाछ़ली ढाकणैं अर बेच़णेंओ काम। 19 ईशू बोलअ तिन्‍नां लै, "ज़ेही तम्हैं म्हाछ़ली कठा करदै आसा लागै दै, मुंह संघै च़ाल्‍ला हुंह सखाऊं तम्हां मेरै च़ेल्‍लै हणां लै मणछ कठा करनै।" 20 तिंयां बी लागै तेभी ज़ज़ाल़ा छ़ाडी तेऊ संघै हांढदै।

21 तिधा का आजू डेऊई भाल़ै ईशू दूई होर भाई, याकब अर तेऊओ भाऊ जोहन्‍ना, तिंयां थिऐ लागै दै आपणैं बाब जबदी संघै किश्ती प्रैंदै बेशी ज़ज़ाल़ा सोहरदै, अर तेऊ शादै तिंयां बी, 22 तिंयां बी लागै तेभी किश्ती अर आपणैं बाब छ़ाडी तेऊ संघै हांढदै।

23 तेखअ डेऊअ ईशू गलील मुल्खै कई ज़ैगा। सह रहअ यहूदीए सभागृहा* शिक्षा दैंदअ अर स्वर्ग राज़े खुशीए समादा खोज़दअ लागी अर सोभी रंगे दाह-खिज़ा का तिन्‍नां नरोगै करदअ लागी।

24 ईशूए बारै ईंयां गल्‍ला पुजी सारै सिरीया मुल्खै। तेखअ ज़ुंण लोग कई बमारी, दुख, भूत शाचै दै, मिर्गिए रोगी थिऐ, तिंयां आऐ ईशू सेटा लै अर ईशू किऐ तिंयां सोभ नरोगै। 25 खास्सै मणछ आऐ गलील, दिकापुलिस, एरुशलेम नगरी, यहूदा मुल्खै, अर जरदण नदी पारा बाखा का ईशू पिछ़ू।