1 तेखअ डेऊअ ईशू तिधा का किश्ती दी पार कफरनहूम आपणीं नगरी लै। 2 तिधी आऐ कोऐ मणछ तिन्‍नैं आणअ एक मणछ बछ़ाऊणैं प्रैंदै ईशू सेटा लै, तेऊ त दरंग हुअ द। ईशू बोलअ तिन्‍नों विश्वास भाल़ी तेऊ दरंगे मरीज़ा लै, "शोहरूआ, फिकर निं करी, तेरै पाप हुऐ माफ।"

3 इहअ शूणीं लागै तिधी आऐ दै यहूदी शास्त्री सोठदै, "अह ता परमेशरे कदर बी निं करदअ!"

4 ईशू हेरी तिन्‍नें मन्‍नें गल्‍ला भुझ़ी, संघा बोलअ तिन्‍नां शास्त्री लै, "तम्हैं आपणैं मन्‍नैं बूरअ किल्है सोठा? 5 सान गल्‍ल किज़ै आसा, एऊ दरंगे मरीज़ा लै इहअ बोल़णअ कि तेरै पाप हुऐ माफ, या एऊ लै इहअ बोल़णअ, ‘उझ़ू हांढदअ-फिरदअ लाग?’ 6 ज़िहअ करै तम्हां का थोघ लागे कि मुंह मणछे पूता लै आसा पृथूई दी पाप माफ करनैओ हक।"

तेखअ बोलअ ईशू तेऊ दरंगे मरीज़ा लै, "हुंह बोला ताल्है, उझ़ू आपणैं एऊ बछ़ाऊणैं च़क संघा डेऊ आपणैं घअरा लै।"

7 सह मरीज़ उझ़ुअ तेभी सोभी नदरी खल़अ, संघा डेऊअ आपणैं घअरा लै। 8 ऐहा गल्‍ला भाल़ी हुऐ तिधी सोभ लोग रहैन अर तिंयां डरै बी। तिन्‍नैं भाल़अ कि परमेशरै दैनअ मणछा लै बेघै बडअ हक! तिंयां लागै परमेशरे ज़ै-ज़ैकार करदै

9 तिधा का आजू डेऊई भाल़अ ईशू एक मोत्ती नाओं मणछ कारै गराहणे च़ौकी दी बेठअ द, सह करा त सरकारी कारै गराहणैओ काम, ईशू बोलअ तेऊ लै, "मुंह संघै एछ।" सह उझ़ुअ तेभी खल़अ संघा डेऊअ ईशू संघै।

10 ज़ांऊं ईशू मोत्तीए घअरै रोटी खांदअ बेठअ, ईशू सेटा लै आऐ खास्सै पापी मणछ संघा बेठै ईशू अर तेऊए च़ेल्‍लै संघै रोटी खांदै। 11 इहअ भाल़ी बोलअ अर फरीसी ईशूए च़ेल्‍लै लै, "थारअ गूरू पापी अर कारै गराहणै आल़ै मणछा संघै किल्है खाआ-पिआ?"

12 इहअ शूणीं बोलअ ईशू तिन्‍नां लै, "बैईद निं नरोगै मणछा सेटा एछदअ, पर रोगी मणछा सेटा लागा तेऊ ज़रूरी पुजणअ। 13 डेओआ संघा एछा भाल़ी कि पबित्र शास्त्रा दी किज़ै आसा लिखअ द, परमेशर बोलअ तेथ इहअ, ‘हुंह निं थारै डागै-चैणैंओ बल़ीदान च़ाहंदअ, हुंह च़ाहा इहअ कि तम्हैं झींण करे।’ किल्हैकि ज़ुंण आप्पू लै इहअ समझ़ा कि तिंयां आसा धर्मीं, तिन्‍नां शधाणूं निं हुंह आथी आअ द, पर हुंह आसा तिन्‍नां लै आअ द ज़ुंण इहअ समझ़ा कि तिंयां आसा पापी।"*होश. 6:6

14 तेखअ आऐ जोहन्‍ना डुबकी दैणैं आल़ेए च़ेल्‍लै ईशू सेटा, संघा लागै इहअ बोल्दै, "इहअ किल्है आसा कि हाम्हैं अर फरीसी पंथे लोग करा एतरअ ब्रत, पर तेरै च़ेल्‍लै निं ब्रत करदै?"

15 ईशू दैनअ तिन्‍नां लै ज़बाब, "ज़ेभै तैणीं लाल़अ बरातू संघै रहा, तेभै निं तिंयां ब्रत करदै। एक बगत एछणअ इहअ बी कि लाल़अ करनअ तिन्‍नां का ज़ुदअ अर तेभै करनअ तिन्‍नां ब्रत।"

16 "नऊंऐं झिकल़े शाट्टी निं पराणैं झिकल़ै दी कोहै लांदअ, ज़ै इहअ करे, झिकल़ै धोंदी बारी धेल़ा सह नऊंईं शाट्टी तेऊ पराणैं झिकल़ै होर बी खास्सअ।

17 "इहअ ई निं कोह मणछ नऊंअ दाखो रस पराणैं खाल्हल़ै दी डाहंदै। किल्हैकि इहअ करी फुटा तिंयां खाल्हल़ै, संघा हआ दाखो रस अर तिंयां खाल्हल़ै दुहै च़िज़ा ज़ांऐं। पर नऊंअ दाखो रस भरा नऊंऐं खाल्हल़ै दी ज़िहअ करै तिन्‍नां दुही गल्‍लो बच़ाअ हआ।"

18 ईशू त तिन्‍नां मणछा का इना गल्‍ला करदअ ई लागअ द कि तिधी आअ एक मणछ सह त यहूदी सभागृहो कारदार। तेऊ टेक्‍कअ ईशू सेटा माथअ। संघा बोलअ तेऊ ईशू लै इहअ, "हे प्रभू, मेरी शोहरी हुई एभै-एभै ज़ांऐं, पर तूह च़ाल्‍ल मेरै घअरा लै संघा छ़ुंह तूह तैहा आपणैं हाथा करै, तै जाणीं सह ज़िऊंदी हई।"

19 ईशू उझ़ुअ तेभी संघा डेऊऐ सह अर तेऊए च़ेल्‍लै तेऊ संघै तेऊए घअरा लै। 20 बाता हांढदी आई एक बेटल़ी, तैहा थिई बारा साला ओर्ही लोहू बगणें बमारी लागी दी। सह आई पिछ़ू का संघा छ़ुंअ तैहा ईशूए झिकल़ैओ पाल्‍लअ।✝ 21 किल्हैकि सह सोठा ती आपणैं मन्‍नैं इहअ, "ज़ै हुंह ईशूए झिकल़े पाल्‍लै पुंझ़ बी छ़ुंहीं सके, तै जाणीं हुंह ऐहा बमारी का बिज़री।"

22 ईशू भाल़अ पिछ़ू फिरी तैहा बाखा लै संघा बोलअ तैहा लै, "तूह निं डरै आथी, तंऐं किअ विश्वास कि हुंह सका ताह नरोगै करी अर मंऐं हेरी तूह एऊ रोगा का नरोगी करी।" इहअ करै हुई सह बेटल़ी तेऊ रोगा का नरोगी।

23 ईशू पुजअ यहूदी सभागृहे कारदारे घअरै, तिधी भाल़अ ईशू कि बशूरी बाज़णैं आल़ै आसा शोगे धुन बाज़दै लागै दै, तिधी झाल़्हुऐ दै लोग आसा लेरा लांदै लागै दै। ईशू बोलअ तिन्‍नां लै, 24 "सोभ डेओआ बागै, शोहरी निं मूंईं आथी! अह आसा सुत्ती दी।" ऐहा गल्‍ला शूणीं लागै तिंयां ईशू लै हास्सदै।

25 ज़िहै ई तिधी झाल़्हुऐ दै लोग बागा लै काढै, तेखअ डेऊअ ईशू पांडा भितरा लै ज़िधी शोहरी ती सताऊई डाही दी। ईशू ढाकअ तैहा शोहरीओ हाथ अर सह हुई तेभी ज़िऊंदी। 26 ऐहा गल्‍लो थोघ लागअ तेथ सारै मुल्खै।

27 ज़ांऊं ईशू तैहा शोहरीए घअरा का आजू डेऊअ, दूई कांणै मणछ आऐ तेऊ पिछ़ू एही हाक्‍का-पकारा लांदी, "हे दाबेदे लुआद ईशू, हाम्हां लै बी कर झींण!"

28 ज़ांऊं ईशू तेऊ घअरै पुजअ ज़िधी सह रहअ द थिअ, तिंयां दूई कांणै बी पुजै तिधी ईशू सेटा, ईशू पुछ़अ तिन्‍नां का, "तम्हां कै इहअ विश्वास आसा कि हुंह सका तम्हां शरैछै करी?"

तिन्‍नैं कांणै दैनअ ईशू लै ज़बाब, "हाँ प्रभू, हाम्हां आसा विश्वास कि तूह सका इहअ करी।"

29 तेखअ बोलअ ईशू तिन्‍नें आछी छ़ुंहीं करै, "तम्हां लै लोल़ी तिहअ ई हुअ ज़िहअ तम्हैं विश्वास करा।"

30 तिन्‍नें आछी का लागअ तेभी शुझदअ। तेखअ दैनी ईशू तिन्‍नां लै एही चतैनगी, "हेरे, धैन डाहै, ऐहा गल्‍ला निं तम्हैं कोही का खोज़ी।" 31 पर तिधा का बागै डेऊई फणाऊंई तिन्‍नें ईंयां गल्‍ला सारै दी कई ज़ैगा! कि ईशू तिंयां किहै किऐ आछी का शरैछै।

32 ज़ांऊं तिंयां दूई मणछ नरोगै हई बागै तै डेऊंदै लागै दै, तिधी आणअ लोगै ईशू सेटा लै एक काल्‍लअ मणछ। तेऊ दी त भूत शाचअ द। 33 ज़ांऊं तेऊ काल्‍लै का भूत पोर्ही निखल़अ, सह काल्‍लअ लागअ गल्‍ला करदअ, अर तिधी सोभ लोग हुऐ रहैन कि इहअ च़मत्कार निं एऊ इज़राईल देशै आझ़ तैणीं कधि भाल़अ।

34 पर तिधी फरीसी तै आऐ दै, तिन्‍नैं बोलअ इहअ, "अह काढा भूते राज़ै राख्से शगती करै भूत।"

35 ईशू रहअ कई नगरी अर गराऊंऐं डेऊई तिन्‍नें सभागृहा शिक्षा दैंदी, स्वर्ग राज़े खुशीए समादा खोज़दअ लागी अर सोभी रंगे दाह-खिज़ा का तिन्‍नां नरोगै करदअ लागी।

36 ज़ांऊं ईशू खास्सै मणछ भाल़ै, तेऊ फिरी तिन्‍नां लै खास्सी झींण, किल्हैकि तिंयां थिऐ एही बेचैन अर कबाता पेठी दी भेडा ज़िहै, ज़सरअ कोई फुआल निं आथी।✝

37 तेखअ बोलअ तेऊ आपणैं च़ेल्‍लै लै, "मुंह दी विश्वास करना लै आसा खास्सै मणछ न्हैल़ै लागै दै पर तिन्‍नां सेटा खुशीए समादा पजैल़णैं आल़ै आसा थोल़ै। तिंयां आसा एही खास्सी फसला ज़िहै ज़ुंण लऊंणा लै गई हई पर लऊंणै आल़ै आसा थोल़ै। 38 एता लै करा खेचे मालका का अरज़ कि होर मज़दूर छ़ाड।"