Mateus 2

जोतषी मणछो एछणअ

1 ज़धू यहूदा मुल्खै बेतलेम नगरी ईशूओ ज़ल्म हुअ, तिन्‍नां धैल़ै त तेऊ मुल्खै हेरोदेस राज़ैओ राज़।

पुर्बा देशा बाखा का आऐ एरुशलेम नगरी लै जोतषी अर यहूदा मुल्खै पुजी लागै तिंयां इहअ पुछ़दै, 2 "एऊ देशै हुअ यहूदीए राज़ैओ ज़ल्म, सह किधी ज़िहअ हुअ? हाम्हैं भाल़अ पुर्बा बाखा तेऊओ तारअ अर हाम्हैं आसा तेऊ सेटा माथै टेक्‍कदै आऐ दै।"✝2:2 गण. 24:17

3 तिन्‍नां जोतषीए इना गल्‍ला शूणीं डरै हेरोदेस राज़अ अर सारै एरुशलेम नगरीए लोग। 4 हेरोदेस राज़ै बी किऐ तेभी सारै बडै प्रोहत अर शास्त्री कठा संघा पुछ़अ तिन्‍नां का, "थारै शास्त्रे साबै मसीहो ज़ल्म किधी सका हई?"

5 तिन्‍नैं बोलअ सोभी राज़ै लै, "पबित्र शास्त्रा दी आसा परमेशरे गूर मिका इहअ बोलअ द, ‘मसीहो ज़ल्म हणअ एऊ यहूदा मुल्खै बेतलेम नगरी।’ एथ आसा इहअ लिखअ द,✝2:5 मिक. 5:2

6 ‘हे बेतलेम, ज़ुंण तूह यहूदा मुल्खै आसा,

तूह आसा सोभी का बडी! किल्हैकि

ताखा हणअ आजू एक मणछ राज़अ

तेऊ करनी मेरी परज़ा इज़राईलीए हेर-सभाल़।’"

7 तेखअ शादै हेरोदेस राज़ै तिंयां जोतषी च़ुप्प-च़ुप्पै आप्पू सेटा लै संघा बोलअ तिन्‍नां लै इहअ, "तम्हां तारअ ठीक-ठीक कहा घल़ी शुझुअ त?"

8 हेरोदेस राज़ै छ़ाडै तिंयां जोतषी इहअ बोली बेतलेम नगरी लै कि तिधी डेऊई तम्हैं ठीक-ठीक थोघ कि तेऊ शोहरूओ ज़ल्म किधी हुअ। तेखअ ज़ांऊं सह भेटे, मुल्है बी दैऐ समाद। तै डेऊणअ मुंह बी तेऊ सेटा लै माथै टेक्‍कदै।

9 तिन्‍नैं जोतषी बी राज़ैए ईंयां गल्‍ला शूणीं संघा लागै तिंयां तेऊ सेटा का बेतलेम नगरी लै हांढदै। ज़ुंण तारअ तिन्‍नैं पुर्बा दिशा दी भाल़अ त, सह शुझुअ तिन्‍नां का भिई। तेऊ तारै भाल़ी हुऐ तिंयां खास्सै खुशी।

10 सह लागअ सरगै तिन्‍नां का आजू-आजू हांढदअ अर तिंयां लागै तेऊ पिछ़ू-पिछ़ू हांढदै अर सह तारअ खल़्हुअ ठीक तैहा ज़ैगा प्रैंदै ज़िधी तेऊ शोहरूओ ज़ल्म त हुअ द।✝2:10 लूक. 2:20 11 तिंयां डेऊऐ तैहा ज़ैगा ज़िधी ईशूओ ज़ल्म त हुअ द। तिन्‍नैं भाल़अ सह शोहरू तेऊए ईजा मरिअमे भोसल़ै अर तिन्‍नैं टेक्‍कअ उटै पल़ी माथअ संघा लागै सोभ तेऊए च़ाकरी करदै।

तेखअ खोल्ही तिन्‍नैं आपणीं-आपणीं बोझ़ल़ी अर तेता का दैनी सुन्‍नअ, लोवान, खुशबूदार किम्मती तेल अर कई च़िज़ा भैंट।

12 तेखअ दैनी तिन्‍नां लै परमेशरै सुपनै चतैनगी, "हेरोदेस राज़ै सेटा लै निं बापस डेऊई।" तिंयां बी तिधा का उझ़ुऐ अर तिंयां डेऊऐ होरी बाता आपणैं देशा लै।