Mateus 24

ईशूओ फिरी एछणेंओ नछ़ैण

3 तेता बाद थिअ ईशू जैतून धारा बेठअ द। ईशू त कांगनरांगै एक्‍कै ज़ण्हअ अर तेतरी आऐ च़ेल्‍लै ईशू सेटा लै संघा लागै इहअ बोल्दै, "तूह खोज़ हाम्हां का कि ईंयां गल्‍ला केभै निभणी? हाम्हां का किहअ करै लागणअ थोघ कि तूह एछणअ छ़ेक्‍कै फिरी अर एऊ संसारा खतम हणैंओ किज़ै नछ़ैण हणअ?"

4 ईशू बोलअ तिन्‍नां लै, "तम्हैं डाहै धैन! तम्हैं निं लोल़ी कुंणी झ़ुठी गल्‍ला खोज़ी कबाता पाऐ। 5 कई एछणैं तम्हां सेटा मेरै नाओंऐं अर तिन्‍नां बोल़णअ इहअ, ‘हुंह आसा सह मसीहा ज़ुंण परमेशरै आसा छ़ाडअ द।’ खास्सै मणछा करनअ तिन्‍नें गल्‍ला दी विश्वास।

6 "ज़ेभै तम्हां का देशै जुध हणें अर जुधे गल्‍ला शुण्हिंए, तेभै निं तम्हैं डरी। किल्हैकि ईंयां गल्‍ला हणीं आसा ज़रूरी, पर तेभै निं संसार खतम हणअ।