1 ईशू डेऊअ परमेशरे भबना का बागै, डेऊंदी बारी आऐ च़ेल्‍लै ईशू सेटा संघा लागै तिंयां ईशू संघै परमेशरे भबने बारै गल्‍ला करदै कि भबन भाल़ किहअ शोभलअ आसा। 2 ईशू बोलअ तिन्‍नां लै, "तम्हां का शुझिआ इधी कि अह भबन एभै किहअ शोभलअ आसा। पर हुंह खोज़ा तम्हां का सत्त कि अह पाणअ दुशमणा पठी ढोल़ी! एथ निं एकी पात्थरा प्रैंदै दुजअ पात्थर भेटणअ टेक्‍कअ द।"

3 तेता बाद थिअ ईशू जैतून धारा बेठअ द। ईशू त कांगनरांगै एक्‍कै ज़ण्हअ अर तेतरी आऐ च़ेल्‍लै ईशू सेटा लै संघा लागै इहअ बोल्दै, "तूह खोज़ हाम्हां का कि ईंयां गल्‍ला केभै निभणी? हाम्हां का किहअ करै लागणअ थोघ कि तूह एछणअ छ़ेक्‍कै फिरी अर एऊ संसारा खतम हणैंओ किज़ै नछ़ैण हणअ?"

4 ईशू बोलअ तिन्‍नां लै, "तम्हैं डाहै धैन! तम्हैं निं लोल़ी कुंणी झ़ुठी गल्‍ला खोज़ी कबाता पाऐ। 5 कई एछणैं तम्हां सेटा मेरै नाओंऐं अर तिन्‍नां बोल़णअ इहअ, ‘हुंह आसा सह मसीहा ज़ुंण परमेशरै आसा छ़ाडअ द।’ खास्सै मणछा करनअ तिन्‍नें गल्‍ला दी विश्वास।

6 "ज़ेभै तम्हां का देशै जुध हणें अर जुधे गल्‍ला शुण्हिंए, तेभै निं तम्हैं डरी। किल्हैकि ईंयां गल्‍ला हणीं आसा ज़रूरी, पर तेभै निं संसार खतम हणअ। 7 एकी देशे लोगा पल़णअ दुजै देशे लोगा लै चुटी, एकी राज़ा करनअ दुजै राज़ा संघै जुध। ज़ैगै-ज़ैगै हणीं ज़ाज़री अर कई ज़ैगा पल़णै नकाल़। 8 अह हणीं दाह-दुखे शुरूआत ज़ेही कहा बेटल़ी सूंणें दाहे शूल़ उझ़िआ। 9 तेभै करनै लोगा तम्हैं कैद अर तिन्‍नां करनै तम्हां लै ज़ुल्म। कई पाणै तम्हां मांझ़ै तिन्‍नां मारी। हर देशे लोगा डाहणीं मुंह दी विश्वास करनै पिछ़ू तम्हां संघै ज़ीद। 10 तेभै हणअ इहअ कि ज़ुंण एभै मुंह दी विश्वास करा, तिन्‍नां छ़ाडणअ विश्वास करनअ। तिन्‍नां डाहणीं आप्पू मांझ़ै ज़ीद अर मेरै च़ेल्‍लै मांझ़ै बझ़ैल़णै तिन्‍नां कई कैद करनै। 11 खास्सै झ़ुठै गूर निखल़णैं अर तिन्‍नां पाणै मुंह दी विश्वास करनै आल़ै मांझ़ै खास्सै मणछ कबाता। 12 हर ज़ैगा बढणअ पाप, खास्सै मणछा छ़ाडणीं झींण अर झ़ूरी करनी। 13 पर ज़ुंण मुंह दी खिरी तैणीं विश्वास डाही सबर करे, तिंयां हेरनै बच़ाऊई। 14 स्वर्ग राज़ो खुशीए समादो प्रच़ार खोज़णअ सारै संसारै सोभी लोगा का ताकि सोभी देशे लोगा लै खुशीए समादा मनणैओ मोक्‍कअ होए, तेखअ हणअ अह संसार खतम।

15 "ज़ेभै तम्हां सह बनाश करनै आल़ी छ़ोतली च़ीज़ भबनै पबित्र ज़ैगा खल़ी शुझिए, ज़ेते बारै खास्सी साला पैहलै परमेशरे गूर दानिएलै आसा खोज़ी डाहअ द। पहल़णैं आल़अ दै ऐहा गल्‍ला लै धैन! 16 तेभै ज़ुंण यहूदा मुल्खै होए तिंयां ठुर्है धारा लै। 17 ज़ुंण च़ाऊल़ी होए, तिंयां निं घअरा भितरा का किछ़ी गल्‍ला निंणे तैणीं उंधै होथी अर नां घअरा भितरा लै डेऊई बगत ज़ांऐं करी। 18 ज़ुंण खेचै होए, तिंयां निं आपणैं झिकल़ै आणदै पिछ़ू डेऊई।

19 "तिन्‍नां धैल़ी ज़ुंण सुंदी बेटल़ी अर आपणैं शोहरू लै दुधा पणैंऊंदी होए तैहा लै हणअ ठुहर्नअ बडी आफ़त! 20 प्राथणां करदै रहै लागी कि तम्हां हिंऊंदे धैल़ै अर बशैघे धैल़ै ठुहर्नअ नां पल़े। 21 किल्हैकि तैहा घल़ी एछणअ इहअ दुख-सांगट कि ज़ुंण एऊ संसारे शुरू का आझ़ तैणीं कधि निं हुअ अर नां कधि हणअ। 22 परमेशरै आसा आपणैं विश्वास करने आल़ेए बारै सोठी करै ईंयां सांगटे धैल़ी घटाऊई दी, नांईं ता संसारै निं कोह मणछ ज़िऊंदअ बच़णअ त। 23 ज़ै कुंण तिन्‍नां धैल़ी तम्हां लै इहअ बोले, ‘भाल़ा मसीहा आसा इधी, अर मसीहा आसा तिधी!’ तिन्‍नें गल्‍लो विश्वास निं करी।

24 "किल्हैकि झ़ुठै मसीहा अर झ़ुठै गूर निखल़णैं अर तिन्‍नां पाणै बडै-बडै नछ़ैण अर च़मत्कार रहैऊई कबाता। ज़ै तिन्‍नों बश च़ले, तिन्‍नां तिंयां मणछ बी कबाता ज़ुंण परमेशरै आसा छ़ांटै दै। 25 ऐहा गल्‍लो डाहै तम्हैं धैन, ईंयां गल्‍ला डाही मंऐं तम्हां का पैहलै ई खोज़ी। 26 तैही ज़ै तिंयां तम्हां का बोले कि भाल़ा, मसीहा आसा रेगीस्तानै, तम्हैं निं बागै निखल़ी। ज़ै कुंण इहअ बोले कि मसीहा आसा फलाणीं बाहूल़ी गुप्त रहअ द, तम्हैं निं तिन्‍नें गल्‍लो विश्वास करी।

27 "किल्हैकि ज़ेही बिज़ल़ी हेरा-हेरी पुर्बा का निखल़ी पछ़मा दी च़मकदी सोभी का शुझिआ, तिहअ शुझणअ हुंह मणछो पूत बी एऊ संसारा लै फिरी एछदअ। 28 ज़िधी ल्हासा हआ, तिधी झाल़्हिआ गरली बी।

29 "तिन्‍नां धैल़ीए दुख-सांगटा का बाद फिरनअ सुरज़ न्हैरअ अर ज़ोथ हणीं काल़ी। सरगा का अल़णैं तारै अर भ्रमंडे सारी शगती बी सिक्‍कणी आजू-पिछ़ू। 30 तेभै शुझणअ तम्हां का मेरअ नछ़ैण सरगै। तेभै हणैं पृथूईए सोभ खिंब सोभी ज़ातीए मणछ हिक्‍का पटाक्‍की लेरा लांदै। हुंह मणछो पूत शुझणअ तिन्‍नां का महान शगती अर प्रतप्पा संघै सरगै बादल़ा बाती एछदअ। 31 मुंह छ़ाडणैं नादे बडी छ़ेल़ा संघै आपणैं स्वर्ग दूत अर तिन्‍नां झाल़णैं सरगे एकी पुंझ़ा का दुजै पुंझ़ै तैणीं च़ऊ दिशा का तिंयां ज़ुंण परमेशरै आसा छ़ांटै दै।

32 "फेडूए बूटा का लआ सबक, ज़ेभै तेथ प्लीर निखल़ा अर बझ़दी लागा, तेभै जाआ तम्हैं समझ़ी कि बसंते ऋत आसा नेल़। 33 ठीक इहअ ई ज़ांऊं तम्हां ईंयां गल्‍ला हंदी शुझणीं, तम्हैं समझ़ै कि तिंयां धैल़ै आसा नेल़, दुआरा बागै पुजी। 34 हुंह खोज़ा तम्हां का सत्त कि ज़ेभै तैणीं ईंयां गल्‍ला निभी निं जाए, तेभै तैणीं निं ऐहा पोस्तीए लोग मरनै। 35 सरग अर पृथूई टल़णीं पर मंऐं ज़ुंण गल्‍ला बोली, निभणी ज़रूर एही ई।

36 "तैहा धैल़ी अर तेऊ बगतो निं कोही का थोघ आथी कि ईंयां केभै हणीं। नां एतो थोघ स्वर्ग दूता का आथी अर नां पूता का। पर ऐहा गल्‍लो थोघ आसा सिधअ बाब परमेशरा का।

37 "ज़िहअ म्हारै दाद-बाब नूहे ज़मानैं हुअ, तिहअ ई हणअ मुंह मणछे पूतो फिरी एछणअ बी। 38 किल्हैकि ज़िहै पाणीं करै हुई दी प्रल़या का आजी ज़ेभै तैणीं नूह ज़हाज़ा भितरी नांईं बेठअ, तेभै तैणीं रहै लोग खांदै-पिंदै अर तिन्‍नां मांझ़ै रहा ती बैह शादी हंदी। 39 ज़ांऊं तैणीं तिंयां पाणींए प्रल़या दी डुबी मूंऐं निं आथी, तेभै तैणीं निं तिन्‍नां का किछ़ बी थोघ लागअ। ठीक तिहअ ई हणअ तेभै बी ज़ेभै हुंह मणछो पूत फिरी एछणअ। 40 तैहा घल़ी हणअ इहअ कि ज़ुंण दूई ज़ण्हैं खेचै होए, तिन्‍नां मांझ़ै च़कणअ एक ज़ण्हअ उझै अर एक छ़ाडणअ तिधी। 41 दूई बेटल़ी हणीं थरेटा दी नाज़ा पिशदी, एक च़कणी उझै अर दुजी छ़ाडणीं तिधी।

42 "तैही रहै तम्हैं बिऊंतै, किल्हैकि तम्हां का निं इहअ थोघ आथी कि थारअ प्रभू कहा धैल़ी एछणअ। 43 पर इहअ लआ समझ़ी कि, ज़ै घअरे मालका का इहअ थोघ हंदअ कि च़ोर केऊ पहरै एछणअ, तै रहणअ त तेऊ बिऊंतै संघा निं आपणैं घअरै च़ोरी हणैं दैणीं ती। 44 इहै ई रहा तम्हैं बी हर बगत तैर्हुई। किल्हैकि हुंह मणछो पूत बी एछणअ तैहा घल़ी ज़ेभा लै तम्हैं सोठअ निं हणअ।

45 "इहअ भरोस्सैमंद अर समझ़कार दास कुंण आसा ज़ुंण तेऊए मालकै दास-दासी प्रैंदै सैणअ डाहअ बणाईं ताकि तिन्‍नां लै रोटी-पाणीं करे दैई? 46 मालक हआ तेऊ दासा लै खुश ज़हा तेऊओ मालक इहअ ई करदै भाल़े। 47 हुंह खोज़ा तम्हां का सत्त कि तेऊ बणाणअं सह आपणीं सारी ज़ैदातो भढारी।

48 "पर ज़ै सह कदुष्ट दास इहअ सोठे कि मेरै मालका एछणा लै आसा अज़ी खास्सी बल़ैग। 49 संघा लागे सह होरी दास-दासी च़िक्‍कदअ-मारदअ अर आप्पू शूर-शराबा झुटदअ, 50 तेऊ दासो मालक एछणअ तैहा धैल़ी फिरी, ज़ेभै एछणअ तेऊ सोठअ बी निं हणअ! सह एछणअ तैहा घल़ी ज़ेभै ज़ेतो तेऊ का थोघ निं हणअ। 51 मालका दैणीं तेऊ लै घोर सज़ा। संघा पाणअ सह कपटी मणछा जैंदरी तैहा ज़ैगा ज़िधी मणछ सिधै लेरा लांदै अर दांदा कटिल्‍लदै रहा लागी।"