1 ज़ांऊं ईशू इना गल्‍ला बोली मुक्‍कअ, तेखअ लागअ सह आपणैं च़ेल्‍लै लै बोल्दअ, 2 "तम्हां का आसा थोघ कि दूई धैल़ै बाद आसा ऊवार्णैओ थैर। हुंह मणछो पूत करनअ कैद कि मुंह क्रूसा दी मारी पाए।"

3 तेखअ हुऐ बडै प्रोहत अर सैणैं काईफा नाओंए माहा प्रोहते भबनै कठा। तिधी किई तिन्‍नैं एक पांच़ी। 4 तिंयां लागै आप्पू मांझ़ै इहअ जोग करदै कि ईशू ढाकणअ हाम्हां छ़ल़-कपट करी बी संघा पाणअ मारी। 5 तेखअ लागै तिंयां इहअ बी बोल्दै कि ऊवार्णे जाचे धैल़ी निं हाम्हां इहअ करनअ, इहअ निं हआ कि लोग उपद्रभ करे।

6 तेखअ डेऊअ ईशू बेथनी गराऊंऐं, तिधी त सह शमौन नाओंए मणछे घअरै ज़ुंण ईशू कोहल़ा का शुचअ किअ त। 7 ईशू थिअ रोटी खांदअ बेठअ द, तिधी आई एक बेटल़ी अर तैहा आणअ संगमरमरे भांडै दी खुशबू दैणैं आल़अ किम्मती तेल। तैहा तरैल़अ सह तेल ईशूए मुंडै। 8 एता भाल़ी बोलअ रोश्शै च़ेल्‍लै इहअ, "अह इहअ किम्मती तेल किल्है किअ ऐहा ज़ांऐं? 9 एता बेच़ी सका तै खास्सै ढब्बै भेटी अर तिन्‍नां ढब्बै सका तै रैनै-गरीबा लै बांडी।" 10 अह गल्‍ल हेरी ईशू समझ़ी अर तेऊ बोलअ तिन्‍नां लै इहअ, "ऐहा दैआ रहणैं, तम्हैं किल्है आसा ऐहा तंग करदै लागै दै? ऐहा किअ मुल्है भलअ। 11 गरीब रहणैं कबल्‍लै तम्हां ई अर ज़ेभै थारअ दिल बोले तेभै सका तम्हैं तिन्‍नां लै दैई, पर हुंह निं तम्हां संघै कबल्‍लअ रहणअ। 12 ऐहा ज़ुंण अह मेरी देही दी खुशबू दैणैं आल़अ किम्मती तेल तरैल़अ, अह किई ऐहा मेरी देही दाबणे तैरी। 13 हुंह खोज़ा तम्हां का सत्त कि सारै संसारै ज़िधी बी मेरै बारै खुशीओ समाद खोज़े, तिन्‍नां मणछा खोज़णअ एसे बारै बी कि ऐहा मुल्है किज़ै किअ।"

14 करेती गराऊंआं का आसा त ईशूए बारा च़ेल्‍लै मांझ़ै एक च़ेल्‍लअ यहूदा, सह डेऊअ बडै प्रोहता सेटा संघा बोलअ इहअ, 15 "ज़ै हुंह ईशू कैद करना लै थारी मज़त करूं, तम्हां तेते मुल्है केतरै ढब्बै दैणैं?"

तिन्‍नैं बोलअ इहअ, "ताल्है दैणैं हाम्हां तोली करै तिह च़ंदीए सिक्‍कै।" 16 सह रहअ तेभी पोर्ही तेऊ मोक्‍के ताका कि सह किहअ करै ईशू ढाकणैं बझ़ैल़े।

17 आखरी रोटीए थैरा का पैहली धैल़ी लागै च़ेल्‍लै ईशू का पुछ़दै, "हे प्रभू, तूह किधी च़ाहा कि हाम्हैं ताल्है ऊवार्णे थैरो भोज़ बणाणें तैरी करे?" 18 ईशू बोलअ तिन्‍नां लै, "तम्हैं डेओआ नगरी लै। तिधी भेटणअ तम्हां एक मणछ। तेऊ लै बोलै कि गूरू बोला इहअ कि मेरअ बगत आसा नेल़, अर मुंह मनाऊंणअ तेरै घअरै आपणैं च़ेल्‍लै संघै एछी अह ऊवार्णैओ थैर।" 19 ज़िहअ ईशू बोलअ, च़ेल्‍लै किअ तिहअ ई, संघा बणाअं च़ेल्‍लै तेऊ घअरै ऊवार्णे थैरो भोज़।

20 ज़ांऊं सान्ह पल़ी, ईशू बेठअ आपणैं बारा च़ेल्‍लै संघै रोटी खांदअ। 21 ज़ांऊं तिंयां खांदै लागै, ईशू बोलअ तिन्‍नां लै, "हुंह खोज़ा तम्हां का सत्त कि तम्हां मांझ़ै बझ़ैल़णअ हुंह कहा एकी ज़ण्हैं ढाकणैं।" 22 ऐहा गल्‍ला शूणीं हुऐ तिंयां खास्सै दुखी, अर तिंयां लागै एक-एक करी बारी-बारी ईशू का पुछ़दै, "हे गूरू सह हुंह किनी आसा?" 23 ईशू दैनअ तिन्‍नां लै ज़बाब, "ज़ुंणी मुंह संघै एभै मेरै थाल़ू का खाअ, तेऊ ई बझ़ैल़णअ हुंह ढाकणैं। 24 हुंह मणछो पूत ता मरनअ तेऊ ई साबै ज़िहअ मेरै बारै पबित्र शास्त्रा दी आसा लिखअ द। पर तेऊ मणछा लै आसा घोर आफ़त! ज़हा हुंह ढाकणैं बझ़ैल़णअ। तेऊ लै हणअ त भलअ इहअ ई कि तेऊओ ज़ल्म ई नांईं हंदअ।" 25 तेखअ बोलअ करेती गराऊंए यहूदा ईशू लै ज़ुंणी ईशू ढाकणैं थिअ लाअ द बझ़ैल़ी, "हे गूरू सह हुंह किनी आसा?" ईशू बोलअ तेऊ लै, "तंऐं हेरअ एभै बोली।"

26 ज़ांऊं तिंयां रोटी खांदै बेठै, ईशू च़की एक रोटी संघा किअ परमेशरो शूकर, तेखअ किऐ तैहा रोटीए म्हार-म्हार। तिंयां रोटीए म्हार दैनै तेऊ आपणैं च़ेल्‍लै लै इहअ बोली, "हुंज़ा, खाआ अह आसा मेरी देही।" 27 तेखअ च़कअ ईशू दाखे रसो प्रिहअ हाथै, सह बी दैनअ परमेशरो शूकर करी च़ेल्‍लै लै, संघा बोलअ इहअ, "एता का झुटा तम्हैं सोभै। 28 किल्हैकि अह आसा मेरअ लोहू, अह आसा मणछा संघै परमेशरे नऊंईं करार। बल़ीदानो अह लोहू बहाऊंणअ खास्सै मणछे पाप माफी लै। 29 हुंह बोला तम्हां लै इहअ कि अह दाखो रस निं मुंह तेभै तैणीं झुटणअ ज़ेभै तैणीं तम्हां सोभी संघै बेशी आपणैं बाबे राज़ा दी नऊंअ दाखो रस निं झुटूं।" 30 तेखअ डेऊऐ ईशू अर तेऊए च़ेल्‍लै ऊवार्णे थैरे गिहा बोल्दी बागै जैतून धारा लै।

31 तेखअ बोलअ ईशू आपणैं च़ेल्‍लै लै, "तम्हैं हणैं आझ़ ई राची मुखा दूर किल्हैकि पबित्र शास्त्रा दी आसा लिखअ द,

‘मुंह पाणअ फुआल मारी

अर छ़ुंडे भेडा छिंघणीं ओरी-पोरी।’"

32 तेखअ बोलअ ईशू तिन्‍नां लै इहअ, "पर हुंह हणअ तेखअ भिई ज़िऊंदअ, संघा डेऊणअ मुंह गलील मुल्खा अर तम्हैं एछणैं बादा का तिधी मुंह सेटा।" 33 ऐहा गल्‍ला शूणीं बोलअ पतरासै, "होर लागे ताह छ़ाडी डेऊंदै पर हुंह निं ताखा दूर डेऊंदअ।" 34 ईशू बोलअ तेऊ लै, "हुंह खोज़ा ताखा सत्त कि आझ़ ऐहा ई राची मुर्गै दूई बारी बाशणैं का आजी हुधणअ तूह मेरै बारै चिई बारी।" 35 पतरासै दैनअ ईशू लै ज़बाब, "ज़ै मुंह ताह संघै मरनअ बी पल़े, तैबी निं हुंह तेरै बारै हुधदअ।" अर इहअ ई बोलअ तिन्‍नैं होरी च़ेल्‍लै बी।

36 तेखअ डेऊअ ईशू गतसमनीं नाओंए ज़ैगा संघा बोलअ आपणैं च़ेल्‍लै लै, "इधी रहै तेभै तैणीं बेशी ज़ेभै तैणीं कि हुंह प्राथणां करी फिरी निं एछूं।" 37 तेऊ निंयैं पतरास अर जबदीओ शोहरू जोहन्‍ना अर याकब आप्पू संघै, अर ईशू हुअ खास्सअ दुखी। 38 तेखअ बोलअ ईशू, "मेरअ ज़िऊ आसा भितरा का इहअ दुखी कि मेरै च़ाल्‍लअ शाह डेऊई, तम्हैं खल़्हिया इधी संघा रहै बिहुदै।"

39 तेखअ डेऊअ ईशू धख आजू ज़िहअ संघा लागअ उटी बाखा प्राथणां करदअ, "हे परमेशर, मेरै बाबा, ज़ै हई सके, तै कर मुखा ऐहा घल़ी एऊ दुखा दूर। तैबी निं तिहअ लोल़ी हुअ ज़िहअ हुंह च़ाहा, तूह कर तिहअ ई ज़िहअ तूह च़ाहा करनअ।" 40 तेखअ आअ ईशू तिन्‍नां चिई च़ेल्‍लै सेटा अर तिन्‍नां सुत्तै दै भाल़ी बोलअ ईशू पतरासा लै, "तम्हैं एकी घल़ी बी निं बिहुदै रही सकै? 41 बिहुदै रहा अर प्राथणां करदै रहा लागी ताकि तम्हैं खरी दी पल़ी पाप नां करे। थारअ शाह ता बोला पर देही आसा कमज़ोर।" 42 तेखअ डेऊअ ईशू दुजी बारी प्राथणां करदअ अर ईशू किई एही प्राथणां, "हे मेरै बाबा, ज़ै मेरै झुटै बाझ़ी अह दुखो प्रिहअ नांईं हटी सकदअ, तै लोल़ी तेरी मरज़ी पूरी हुई।" 43 तेखअ आअ ईशू भिई आपणैं च़ेल्‍लै सेटा लै अर तेऊ भाल़ै तिंयां घणीं निंजा सुत्तै दै। 44 ईशू डेऊअ तिन्‍नां छ़ाडी भिई प्राथणां करदअ अर सह ई गल्‍ल बोली प्राथणां दी चिऊथी बारी। 45 तेखअ आअ भिई ईशू आपणैं च़ेल्‍लै सेटा संघा बोलअ तिन्‍नां लै, "तम्हैं रहा सुत्ती! बतेर्है सुत्तै ऐबै! भाल़ा, सह घल़ी गई एछी। हुंह मणछो पूत लाअ पापी मणछा का बझ़ैल़ी कैद करनै। 46 खल़ै उझ़िआ, च़ाल्‍ला, हेरा, मुंह ढाकणैं आल़अ गअ एछी।"

47 ईशू थिअ इहअ बोल्दअ ई लागअ द कि यहूदा ज़ुंण बारा च़ेल्‍लै मांझ़ै एक थिअ, सह आअ अर तेऊ संघै तै बडै प्रोहत अर यहूदी सैणैं खास्सै मणछ तलबारा अर शोठै पाई छ़ाडै दै। 48 करेती गराऊंओ यहूदा त तिन्‍नां लै इहअ डाहअ द बोली कि ज़हा लै हुंह माख्खी दैंऊं, सह ई आसा ईशू तेऊ करै तम्हैं कैद। 49 तिधी पुजधी आअ तेभी यहूदा ईशू सेटा लै संघा बोलअ, "हे गूरू, नमस्ते" संघा तेऊ दैनी ईशू लै माख्खू।

50 ईशू बोलअ तेऊ लै, "मेरै साथी ज़ेता लै तूह आअ द आसा, तेता कर।"

तेखअ आऐ तिंयां होर ईशू सेटा लै अर तिन्‍नैं किअ ईशू कैद। 51 ईशू नेल़ खल़्हुऐ दै च़ेल्‍लै मांझ़ै काढी एकी आपणीं तलबार संघा बाही तेऊ माहा प्रोहते दासा लै अर तेऊओ कान शोटअ धरनीं।

52 तेखअ बोलअ ईशू तेऊ लै, "आपणीं तलबार डाह काठी भितरी। किल्हैकि ज़ुंण होरी तलबारा करै मारा, तिंयां बी पाणै तलबारा करै मारी। 53 तूह ऐहा गल्‍ला निं समझ़दअ आथी कि हुंह सका आपणैं बाबा का एही अरज़ बी करी कि मुंह सेटा लै छ़ाड बारा दला का बी खास्सै स्वर्ग दूत, तेऊ हेरनै एभी छ़ाडी! 54 पर इहअ हणअ आसा ज़रूरी, नांईं ता पबित्र शास्त्रे गल्‍ला किहअ करै हणीं पूरी?" 55 तेखअ बोलअ तेभी ईशू तिन्‍नां मणछा लै, "तम्हैं कै हुंह डाकू समझ़अ कि मुंह ढाकदै आसा तम्हैं तलबारा अर शोठै पाई निखल़ै दै? हुंह ता हर धैल़ै तम्हां संघा परमेशरे भबनै शिक्षा दैआ त, तेभै किल्है निं हुंह तम्हैं ढाकअ? 56 पर ईंयां सोभै गल्‍ला हुई एते तैणीं कि पबित्र शास्त्रा दी परमेशरे गूरै बोली दी गल्‍ला पूरी होए।" तेखअ ठुर्है तिधा का सारै च़ेल्‍लै अर ईशू डाहअ तिधी कल्ही।

57 ईशू ढाकणैं आल़ै निंयं सह काईफा माहा प्रोहता सेटा लै अर तिधी थिऐ शास्त्री अर सैणैं कठा हुऐ दै। 58 पतरास बी डेऊअ तिन्‍नां पिछ़ू-पिछ़ू माहा प्रोहते भबना तैणीं अर तिन्‍नें दास संघै रहअ फैंसलै न्हैल़अ बेठी।

59 बडै प्रोहत अर सारी सभा दी थिऐ सोभै लागै दै ईशू मारना लै इहै मणछा लोल़ै ज़ुंण ईशूए बारै झ़ुठी शाजत दैए। 60 तिन्‍नैं आणै झ़ुठी शाजत दैणा लै खास्सै मणछ पर तज़ी बी निं तिन्‍नां ईशू दी इहअ दोश भेटअ कि तेऊ मारी पाए। 61 खिरी बोलअ दूई ज़ण्हैं इहअ, "एऊ बोलअ इहअ कि अह सका एऊ परमेशरे भबना ढोल़ी अर चिई धैल़ै भितरी सका भिई च़िणीं।"

62 तेखअ उझ़ुअ माहा प्रोहत खल़अ संघा बोलअ ईशू लै इहअ, "तूह बोल्दअ किल्है निं आथी? ईंयां मणछ भाल़ तेरै बारै किज़ै बोला?" 63 पर ईशू रहअ च़ुप्पी अर तेखअ बोलअ माहा प्रोहतै, "परमेशर आसा पबित्र अर ज़िऊंदअ, ताह लोल़ी तेऊए सोह लागै, ज़ै तूह परमेशरो पूत मसीहा आसा तै खोज़ हाम्हां का।"

64 तेखअ बोलअ ईशू तेऊ लै, "तंऐं हेरअ आप्पै बोली, पर हुंह बोला तम्हां का इहअ बी कि एभा पोर्ही शुझणअ तम्हां का हुंह मणछो पूत सर्वशक्तिमान परमेशरे दैहणै बेठअ द अर बादल़ा प्रैंदै स्वर्गा का फिरी एछदअ।"

65 तेखअ धेल़अ माहा प्रोहतै रोश्शै आपणअ च़ोल़अ, संघा बोलअ, "एऊ किई परमेशरे निंदा, ऐबै निं हाम्हां कोही शाजते ज़रुरत आथी? तम्हैं सोभी बी हेरी अह गल्‍ला शूणीं कि अह बोला आप्पू लै परमेशर अर इहअ करै किई एऊ परमेशरे निंदा! 66 तम्हां होरीए कै राऐ आसा?"

तिन्‍नैं होरी बोलअ, "अह आसा मारनै ई जोगी!" 67 तेखअ थुक्‍कअ तिन्‍नैं ईशूए मुंहां लै, अर कोई लागै तेऊ लै धमुक्‍कै बाहंदै। होरी ढोपी तेऊए आछी संघा लागै तेऊ लै च़ैंडै बाही इहअ बोल्दै, 68 "ज़ै तूह मसीहा आसा, तै खोज़ हाम्हां का कि ताल्है कुंणी बाही?"

69 पतरास थिअ माहा प्रोहते भबने ताटी बेठअ द, तेऊ का लागी तिधी एक दासी इहअ पुछ़दी, "तुबी त एऊ गलीली ईशू संघै भाल़ी?"

70 पतरासै किअ तिन्‍नां सोभी नदरी इहअ बोली नांईं, "तूह किज़ै बोला? मुखा निं किछ़ी गल्‍लो थोघ आथी!"

71 तेखअ डेऊअ पतरास डेहल़ा बागै, तिधी बी बोलअ एकी होरी मणछै पतरासा भाल़ी तिधी तिन्‍नां होरी का, "अह बी त नासरत गराऊंए ईशू संघै।" 72 पतरासै सोह संघा हुधूअ, "हुंह निं तेऊ मणछा बछ़ैणदअ बी आथी।"

73 थोल़ी घल़ी बाद ज़ुंण तिधी थिऐ, तिन्‍नैं बोलअ पतरासा नेल़ एछी, "तेरी गल्‍ला का ज़ाण्हिंआं इहअ कि तूह आसा सच्च़ी तिन्‍नां ई मांझ़ै एक।"

74 तेखअ लागअ पतरास भिई सफाई दैंदअ अर सोह खाई बोल्दअ कि हुंह निं तेऊ मणछा बछ़ैणदअ ई आथी, अर तेभी बाशअ मुर्गअ बी।

75 पतरासा फिरी सह गल्‍ल आद ज़ुंण ईशू तेऊ लै बोली ती, "मुर्गै दुजी बारी बाशणैं का आजी हुधणअ ताह मेरै बारै चिई बारी।" सह डेऊअ तिधा का बागै, संघा लागअ हिंह करै लेरा लांदअ।