मोत्ती 5

दुशमणा संघै झ़ूरी

43 "तम्हैं आसा इहअ बी शूणअ द कि इहअ बी बोला तै कि आपणैं लोगा संघै डाहै झ़ूरी अर आपणैं दुशमणा संघै डाहै ज़ीद। ✝ 5:43 लेब. 19:18

44 "पर हुंह बोला तम्हां लै इहअ कि आपणैं दुशमणा संघै डाहै झ़ूरी। ज़ुंण ताल्है ज़ुल्म करा, तेऊ लै करै प्राथणां।

45 "इहअ करै हणैं तम्हैं आपणैं स्वर्गे बाब परमेशरे लुआद। किल्हैकि सह दैआ भलै अर बूरै दुही लै सुरज़ो धुप्पअ, अर धर्मीं अर पापी दुही लै बरशाऊआ पाणीं। 46 किल्हैकि, ज़ै तम्हैं आप्पू लै झ़ूरनै आल़ै संघै ई झ़ूरी डाहा, तै तम्हां लै किज़ै फाईदअ हणअ? होर लोग बी कै इहअ निं करदै?

47 "ज़ै तम्हैं आपणैं ई भाई-बंधा लै अदर करा, सह कै तम्हैं बेघै बडअ काम करा? इहअ कै होर लोग बी करदै निं आथी? 48 तैही बोला हुंह कि तम्हैं हआ सिध्द, ज़िहअ थारअ स्वर्गो बाब परमेशर सिध्द आसा।"*5:48 लेब. 19:2