1 "ऐहा गल्‍लो डाहै धैन कि तम्हैं निं सिधै एते तैणीं भलअ करी कि लोगै लोल़ी तम्हैं भाल़ै। तै निं तम्हां तेतो स्वर्गे परमेशर थारै बाबा का किछ़ै फल भेटणअ।

2 "तैही बोला हुंह, ‘ज़ै तूह गरीबा लै दान करे, सह निं सोभी का लागदअ खोज़णअ कि मंऐं किज़ै दैनअ। ज़िहअ कपटी मणछ सभागृहा अर बागै काढा रहैऊंणा लै। ताकि लोग तेता भाल़ी तिन्‍नें बड़ैई करे।’

"हुंह खोज़ा तम्हां का सत्त कि तिन्‍नां गअ तेतो फल भेटी। 3 पर ज़ेभै तूह गरीबा लै दान करे, तेभै निं कोही का लोल़ी थोघ लागअ कि तंऐं किज़ै दैनअ। 4 ताकि तेरअ गरीबा लै दैनअ द दान गुप्त रहे अर थारअ बाब परमेशर ज़ुंण गुप्त गल्‍ला भाल़ा, तेऊ दैणअ ताल्है तेतो फल।

5 "ज़ेभै तूह प्राथणां करे, तेता बी निं तूह कपटी मणछा ज़ेही करी। ज़ेही तिंयां लोगा का रहैऊंणै तैणीं सभागृहा, बडी-बडी सभा अर खुल्ही ज़ैगा तिन्‍नां भज़न प्राथणां करनैओ च़ाअ लागा।

"हुंह खोज़ा तम्हां का सत्त कि तिन्‍नां गअ तेतो फल भेटी। 6 पर ज़ेभै तूह प्राथणां परमेशरा सेटा गल्‍ला करे, तेभै डेओऐ आपणीं पांडा भितरी, संघा करै दुआर बुदरी करै गुप्त प्राथणां। तेरअ बाब परमेशर ज़ुंण ताह गुप्त भाल़ा, तेऊ दैणअ ताल्है तेतो फल।

7 "प्राथणां करदी बारी निं तूह होरी ज़िहअ एकी ई गल्‍ला लै भिई-भिई कांग डाही। किल्है लाई। तिंयां समझ़ा इहअ कि एही खास्सी कांग डाहे लाई, तै हेरनी तिन्‍नें अरज़ शूणीं।

8 "तम्हैं निं तिन्‍नां ज़िहै बणी। किल्हैकि थारै स्वर्गै रहणैं आल़ै बाब परमेशरा का आसा थारै मांगणै का पैहलै ई थोघ कि तम्हां किज़ू गल्‍ले निऊल़ आसा। 9 *लूक. 11:2तम्हैं करै एही प्राथणां,

‘हे परमेशर, म्हारै बाब, तूह ज़ुंण स्वर्गै आसा,

सोभी लोल़ी तेरै पबित्र नाओं अदर किअ,

10 तेरअ राज़ लोल़ी आअ।

ज़ेही तेरी मरज़ी स्वर्गै पूरी हआ,

तेही लोल़ी एऊ संसारै बी पूरी हुई।

11 हे प्रभू, हर धैल़ै दै हाम्हां लै बैल़ी-क्लारी ज़ेते हाम्हां ज़रुरत आसा,

12 ज़ै हाम्हां का किज़ै भूल-च़ूक हुई होए, तेता करै माफ

ज़ेही हाम्हैं बी तिन्‍नां लै माफी छ़ाडी ज़ुंणी हाम्हां लै ज़ुल्म किऐ।

13 हाम्हां लै निं खरी दैई पल़णै,

पर हर पाप करनै का अर तेऊ कदुष्ट राख्सा का डाहै हाम्हां बच़ाऊई

किल्हैकि राज़, बल अर जश आसा हाम्हां लै तेरअ ई।’ *

14 "ज़ै तम्हैं होरी मणछे पाप माफ नांईं करे, तै निं थारै पाप बी थारै स्वर्गै रहणैं आल़ै बाब परमेशरा माफ करनै। 15 ज़ै तम्हैं होरी मणछे पाप माफ करे, तै करनै स्वर्गे बाब परमेशरा बी थारै पाप माफ।

16 "ज़ेभै तम्हैं ब्रत करे, तेभै निं तम्हैं कपटी मणछा ज़िहअ मुंह डाही छ़ड़ाऊई। किल्हैकि तिंयां डाहा आपणअ मुंह शेऊई। ताकि लोगा का इहअ थोघ च़ले कि अह आसा ब्रतू। हुंह खोज़ा तम्हां का सत्त कि तिन्‍नां गअ तेतो फल भेटी।

17 "पर ज़ेभै तूह ब्रतू होए तेभै न्हैईआ अर मुंडै मल़ तेल। 18 ताकि कोही का थोघ निं होए कि तूह आसा ब्रतू। पर तेरअ बाब परमेशर ज़ुंण ताह गुप्त भाल़ा, सिधअ तेऊ का लोल़ी थोघ लागअ अर तेऊ ई दैणअ ताल्है तेतो फल।

19 "आप्पू लै निं पृथूई दी धन-माया कठा करा, ज़िधी किल़ै खाआ, खई लागा अर च़ोर पाआ च़ोरी। 20 पर तम्हैं करा आप्पू लै स्वर्गै धन-माया कठा, ज़िधी नां किल़ै खांदै, नां खई लागदी अर नां च़ोरी करदअ कोई च़ोर आथी। 21 किल्हैकि ज़िधी तेरअ धन आसा तिधी रहणअ तेरअ मन्‍न बी लागी।

22 "ऐहा देहीओ दीअ आसा आछ, ज़ै तेरी आछ ठीक होए, तै हणीं तेरी सारी देही प्रैश्शी। 23 पर ज़ै तेरी आछ ई बूरी होए, तेरी सारी देही हणीं न्हैरी। इहअ करै ज़ुंण ताखा प्रैश्शअ आसा, ज़ै सह न्हैरअ होए, तै सोठा सह केतरअ बडअ हणअ।

24 "कोहै दास निं दूई मालके च़ाकरी करी सकदअ। किल्हैकि एकी संघै ता डाहणीं तेऊ झ़ूरी अर दुजै संघै हणीं तेऊ ज़ीद या एकी संघै रहणअ तेऊ मिल़ी-ज़ुल़ी अर दुजअ हणअ तेऊ लै निक्‍कअ। परमेशर अर धन दुहीए निं तम्हैं कठा च़ाकरी करी सकदै।

25 "तैही बोला हुंह तम्हां लै इहअ कि आपणीं ज़िन्दगी लै इहअ फिकर निं करी कि किज़ै खाणअ किज़ै पिणअ? नां आपणीं देही लै फिकर करी कि हाम्हां किज़ै बान्हणअ? ज़िन्दगी आसा रोटी का अर देही आसा झिकल़ै का खास्सी किम्मती।

26 "सरगै डैऊंदै च़ेल्‍लू-पखीरू भाल़ा! तिंयां नां बऊंदै, नां लऊंदै आथी, अर नां तिंयां भढारा भरना लै कठा करदै। तैबी दैआ थारअ स्वर्गै रहणैं आल़अ बाब परमेशर तिन्‍नां लै खाणअ-पिणअ। तम्हैं कै तिन्‍नां का खास्सै किम्मती निं आथी? 27 तम्हां मांझ़ै इहअ कुंण आसा कि फिकर करी आपणीं अमर धख ज़ेही बी सका लाम्मी करी?

28 "झिकल़े तैणीं किल्है करा तम्हैं फिकर? बणैं लागै दै होछ़ै-होछ़ै फूला दैआ भाल़णीं कि तिंयां किहअ करै बझ़ा? तिंयां नां मैन्थ करदै, अर नां तिंयां ऊन काती करै आप्पू लै झिकल़ै बणाऊंदै।

29 "तैबी बोला हुंह तम्हां लै इहअ कि सुलैमान राज़ै बी निं आपणैं सारै राज़-पाठा दी तिन्‍नां कोही बराबर शोभलै झिकल़ै बान्हैं। 30 ज़ै परमेशर घैहणींए घाहा लै बी इहै झिकल़ै बन्हैऊंआं, ज़ुंण आझ़ आसा अर काल्‍ला दहणअ सह आगी जैंदरी। ओ बैहमी विश्वासीओ, तम्हां लै कै सह झिकल़ै दैई निं सकदअ?

31 "इहअ करै तम्हैं इहअ फिकर निं करी अर नां इहअ बोली कि हाम्हां किज़ै खाणअ-पिणअ अर बान्हणां लै किज़ै हणअ? 32 किल्हैकि होर लोग बी रहा इना च़िज़ा लोल़ै लागी, पर थारअ स्वर्गै रहणैं आल़ै बाब परमेशरा का आसा थोघ कि तम्हां आसा इना गल्‍ले ज़रुरत। 33 तैही बोला हुंह तम्हां लै इहअ कि पैहलै करा बाब परमेशरे धर्म अर राज़े लोल़-तोप अर ईंयां सारी च़िज़ा जाणीं तम्हां भेटी।*लूक. 12:31

34 "ऐबै काल्‍ला धैल़ीओ फिकर निं तम्हैं करी, किल्हैकि काल्‍ला एछणैं आल़ी धैल़ी हेरनअ आपणअ फिकर आप्पै करी अर आझ़ा लै आसा आझ़ो दुख ई बतेर्हअ।"