रोमी 13

स्वर्ग राज़े बारै ज़िम्मैंबारी

1 हरेक मणछ रहै सरकारी अफसरे डरा हेठै, किल्हैकि राज़ करनै आल़ै मांझ़ै निं इहअ कोह आथी ज़ुंण परमेशरा बाखा का नांईं आथी। तिन्‍नां लै ज़ुंण राज़ करनैओ हक आसा परमेशरै ई दैनअ द।✝13:1 तित. 3:1

2 इहअ करै ज़ुंण बी मणछ राज़ करनै आल़ै अफसरा लै द्रोह करा, सह करा परमेशरे बधाना लै द्रोह, अर बधाने द्रोह करनै आल़ै भेटणीं सज़ा।

3 ज़ै कुंण भलै काम करे, तेऊ निं अफसरा का डरने ज़रुरत आथी, पर ज़ै कुंण कदुष्ट काम करे तेऊ लागा डरनअ। ज़ै तूह इहअ च़ाहा कि ताह निं अफसरे डअर लोल़ी रही, तै कर भलअ अर तिहअ करै करनअ तिन्‍नां बी तेरअ अदर।

4 किल्हैकि सह आसा तेरी भलाई करना लै परमेशरो दास। पर ज़ै तूह बूराई करे, तै हुअ ताह डरनअ किल्हैकि तेऊ का आसा ताल्है सज़ा दैणैंओ हक, सह आसा परमेशरे दास तेऊ खास मकसद पूरै करना लै कि ज़ुंण कदुष्ट काम करे तिन्‍नां लै सज़ा दैए। 5 तम्हैं निं डरा हेठै सिधै एते तैणीं रही कि सज़ा का बच़े पर थारी सोर-समझ़ बी शुची रहे।

6 तैही लागा कारअ बी दैणअ, किल्हैकि तिंयां अफसर आसा परमेशरे दास अर तेऊ कामां पूरै करदै लागै दै ज़ुंण तिन्‍नां करनअ लागा। 7 इहअ करै करनअ हरेकी मणछो हक दैई, ज़हा कारअ लोल़ी, तेऊ लै दैआ कारअ, ज़ै कहा च़ंदअ लोल़ी तेऊ लै दैआ च़ंदअ। ज़सरी डरा हेठै लागा रहणअ तेते रहणअ डरा हेठै, ज़सरअ अदर लागा करनअ तेऊओ करा अदर।