1 तेखअ बोलअ बिधाता मोसा लै भिई, 2 "इज़राईली सोभी टोली का खोज़ इहअ कि ज़ुंण बी मणछ मोलक देअआ* लै आपणैं लान्हैंओ बल़ीदान करे, तिन्‍नां पाऐ सोभ ज़ण्हैं पात्थरो ढो दैई मारी, सह मणछ च़ाऐ इज़राईली होए या कुंण परदेसी होए। 3 मुंह बी फरेऊंणी तिन्‍नां मणछा बाखा आपणीं पिठ, किल्हैकि आपणैं लान्हैं मोलक देअआ लै दैई किअ तिन्‍नैं मेरी पबित्र ज़ैगा अर मेरअ नाअं नकदरअ, तिंयां छ़ोत लाणैं आल़ै निं तेखअ आजू मेरै आपणैं लोगा मांझ़ै रहणैं जोगी आथी।

4 "हई सका कि तम्हैं तेऊ मोलक देअआ लै लान्हैं बल़ी करनै आल़ै मणछा मारनै बाझ़ी एही छ़ाडे, 5 पर हुंह निं तेऊ छ़ाडी गअ। ज़ुंण बी तम्हां मांझ़ै मोलक देअए पूज़ा करनै ज़ेही कंज़रैई करे, मुंह फरेऊंणी तेऊ अर तेऊए सोभी टबरा बाखा पिठ, तिंयां निं तेखअ आजू मेरै आपणैं लोगा मांझ़ै रहणैं जोगी आथी।

6 "सह मणछ बी आसा मेरअ दुशमण, ज़ुंण मणशाण झ़ैऊंणै आल़ै सेटा पुछ़दअ डेओए, सह मणछ करनअ मुंह तैहा कंज़रैई पिछ़ू आपणैं लोगा मांझ़ा का खतम। 7 तम्हैं रहा पबित्र बणी किल्हैकि हुंह थारअ परमेशर बिधाता आसा पबित्र।✝ 8 तम्हैं आसा मंऐं बिधाता आपणैं खास हणां लै पबित्र किऐ दै अर हुंह करा तम्हां का एही आशा कि तम्हैं तिहअ करे ज़िहअ मंऐं तम्हां का बधान खोज़अ।

9 "ज़ुंण आपणैं ईजा बाबा लै फिटक दैए, सह पाणअ मारी किल्हैकि सह आसा तेऊए आपणीं गलती।✝

10 "ज़ै कुंण आपणैं बाबे होर आणी दी लाल़ी संघै रही सुत्ते, तैहा बेटल़ी अर तेऊ पाऐ दुही मारी।✝

11 "ज़ै कुंण मणछ आपणीं काकी ईजा संघै रही कंझ़रीए, सह करा आपणैं बाबे बेइज़ती, तैहा बेटल़ी अर तेऊ मणछा पाऐ दुही मारी, ईंयां इहै आसा एता ई जोगी।✝

12 "ज़ै कुंण आपणीं नुशा संघै कंझ़रीए, तैहा बेटल़ी अर तेऊ मणछा पाऐ दुही ज़ण्हैं मारी, ईंयां इहै उंबल़ै कामां करनै आल़ै आसा एता ई जोगी।✝

13 "मर्ध अर बेटल़ीओ बैह करी एकी-दुजै संघै सुत्ती गुप्त आंगो भोग करनअ निं बूरअ आथी, पर ज़ै कुंण दुजै मर्धा संघै तिहअ करी च़िल़्हखरअ उंबल़अ काम करे तिन्‍नां पाऐ ज़रूर मारी, तिंयां आसा एता ई जोगी।✝

14 "ज़ै कुंण आपणीं बेटल़ी अर शाशुई दुही डाहे, सह आसा माहा पाप, तिन्‍नां बेटल़ी अर तेऊ मर्धा पाऐ चिई आगी जैंदरी दहई करै मारी ताकि तम्हां जैंदरी इहअ पाप निं होए।✝

15,16 "ज़ै कुंण बेटल़ी या मर्ध कहा पशू संघै कंझ़रीए, तेऊ पशू अर तेऊ मणछा पाऐ दुही मारी, तिंयां आसा एता ई जोगी।✝

17 "ज़ै कुंण आपणीं सक्‍की या काकी बैहणी मांझ़ै कहा संघै रही कंझ़रीए अर तेऊए सह बैहण बी तेता लै राज्ज़ी हुई दी होए, तिन्‍नां लै दैऐ सज़ा अर तिन्‍नां निंयैं बागै सोभी लोगा सम्हनै संघा करै तिन्‍नें बेइज़ती।✝

18 "ज़ै कुंण मणछ भिन्‍नें ऋता न्हैऊई दी बेटल़ी संघै रही कंझ़रीए, तैहा बेटल़ी अर तेऊ मर्धा करै आप्पू मांझ़ा का दूर।✝

19 "ज़ुंण मणछ आपणीं माऊसी अर बुबी संघै रही कंझ़रीए, तेते पल़णीं तिन्‍नां ज़रूर सज़ा भुगतणी।✝ 20 ज़ुंण मणछ आपणीं च़ाच़ी संघै रही कंझ़रीए तिन्‍नां दुही भेटणीं एही सज़ा कि तिन्‍नें निं आपणीं लुआद हणीं। 21 ज़ै कुंण आपणीं भाभी-भराऊज़ी संघै रही कंझ़रीए, तिन्‍नें बी निं आजू आपणीं आद-लुआद हणीं।✝

22 "तम्हैं मनै मेरअ बधान अर तेते सोभी गल्‍ला, नांईं ता इहअ निं हआ कि ज़ुंण कनान देशे ज़ैगा मंऐं तम्हां लै आसा लाई दी दैई, सह तम्हां करै छ़ोतली होए अर तम्हां पोर्ही हुकरे। 23 तैहा ज़ैगा का मंऐं ज़हा ज़ातीए लोग पोर्ही आसा लाऐ दै काढी, तिन्‍नैं किऐ इहै ई च़िल़्हखरै काम अर तैही आसा मुंह तिन्‍नां का नफरत, ईंयां इहै रबाज़ ज़ुंण तिन्‍नें थिऐ, तिहअ निं तम्हैं करी आथी।

24 "हुंह आसा थारअ परमेशर बिधाता, एता लै बोला हुंह तम्हां लै कि तैहा ज़ैगे मालक हणैं तम्हैं ज़ुंण एही रज़दी-पज़दी ज़िम्मीं-ज़ैगा आसा कि तिधी बगा दुधा-मखीरे गाडा। मंऐं आसा तम्हैं छ़ांटै दै कि तम्हैं होरी देशे लोगा ज़िहै नांईं होए। 25 तैही आसा थारअ पशू, च़ेल्‍लू-पखीरू अर सोभी ज़ीबा दी फरक डाहणअ ज़रूरी कि कुंण शुचअ आसा अर कुंण आसा छ़ोतलअ, ताकि तेता करै तम्हां छ़ोत निं लागे अर मुखा बी तम्हैं च़िल़्हखरै निं शुझिए। 26 हुंह आसा बिधाता, पबित्र परमेशर। तम्हैं आसा मंऐं आप्पू लै मेरी खास परज़ा हणां लै छ़ांटै दै, तम्हां हुअ मेरी तैणीं पबित्र हणअ ई।

27 "ज़ै कुंण मर्ध या बेटल़ी ज़ादू-मत्र करा, मणशाण झ़ैऊआ, तेऊ पाऐ पात्थरो ढो दैई मारी, सह आसा एता ई जोगी।"