लेबी बधान 3

मेल़-ज़ोल़े बल़ी लै बधान

1 ज़ै तम्हैं मुंह बिधाता का बर्गत मांगणा लै मेल़-ज़ोल़े✝3:1 मेल़-ज़ोल़े लुआ. 20:24✝3:1 मेल़-ज़ोल़े लुआ. 20:24 बल़ी करे, तेता लै सका तम्हैं डागै-चैणें हेल़्ही मांझ़ा का ज़िहअ च़ाहे तिहअ भैंट करी, पर सह लोल़ी इहअ ज़ेथ किछ़ै खोट निं होए। 2 तेता आणै मेल़-ज़ोल़े खिम्भे प्रऊल़ी आजू, संघा लाऐ तेऊ पशूए मुंडा प्रैंदै आपणअ हाथ, तेखअ करै तेऊ तिधी मेल़-ज़ोल़े बल़ी। हारणे खिंबा का ज़ुंण प्रोहत होए सह छ़ल़िकै तेतो लोहू बेदी च़ऊ फेर।

3 "तेते आंजा फेरे च़र्बीओ बी करै बेदी दी हूम, 4 काल़ज़ै हेठे च़र्बी अर दुही बुक्‍की करै तेते च़र्बी संघी ज़ुदी। 5 प्रोहत करै तेता करै बेदी दी हूम कि तेता का इहअ खुशबूदार धूँ निखल़े ज़ेता करै हुंह बिधाता खुश हआ, तेता करै तेऊ बल़ीदाना संघी हूम ज़ेता करै हुंह बिधाता खुश हआ।

6 "एता का लाऊआ ज़ै तम्हैं भेडा-बाकरीए हेल़्ही मांझ़ै मेल़-ज़ोल़े बल़ी लै बल़ीदान करे, तेता बी आणै इहअ ज़ेथ किछ़ै खोट निं होए। 7 ज़ै तम्हैं गाभू भैंट करे, तेऊ आणै मुंह बिधाता सेटा मेल़-ज़ोल़े खिम्भे प्रऊल़ी आजू। 8 संघा लाऐ तेऊ पशूए मुंडा प्रैंदै आपणअ हाथ, तेखअ करै तेऊ मेल़-ज़ोल़े खिम्भा आजू बल़ी। हारणे खिंबा का ज़ुंण प्रोहत होए सह छ़ल़िकै तेतो लोहू बेदी च़ऊ फेर। 9 तैहा मेल़-ज़ोल़े बल़ी करै मुंह बिधाता लै हूम, तेते च़र्बी आल़ी मोट्टी छ़तरी करै चल़ैटे हाडकै का ज़ुदी, तेखअ आंजा फेरे च़र्बी, 10 काल़ज़ै हेठे च़र्बी अर दुही बुक्‍की करै तेते च़र्बी संघी ज़ुदी। 11 तेखअ करै प्रोहत तेता बेदी दी पाई हूम, तेतो धूँ हणअ मुंह बिधाता लै ज़िहअ भोज़न छ़ाडअ द।

12 "ज़ै तम्हैं बाकरी या छ़ेल्हू बल़ीदान करे, तेता आणै मुंह बिधाता सेटा 13 मेल़-ज़ोल़े खिम्भे प्रऊल़ी आजू। तेखअ डाहै तेते मुंडा प्रैंदै आपणअ हाथ संघा करै तेता तिधी बल़ी। हारणे खिंबा का ज़ुंण प्रोहत होए सह छ़ल़िकै तेतो लोहू बेदी च़ऊ फेर।

14 "तेते आंजा फेरे च़र्बी, 15 काल़ज़ै हेठे च़र्बी अर दुही बुक्‍की करै काल़ज़े च़र्बी संघी ज़ुदी, 16 संघा करै प्रोहत तेता करै बेदी दी हूम कि तेता का इहअ खुशबूदार धूँ निखल़े ज़ेता करै हुंह बिधाता खुश हआ, तेता करै तेऊ बल़ीदाना संघी हूम ज़ेता करै हुंह बिधाता खुश हआ।

"किल्हैकि सारी च़र्बी आसा मुंह बिधाता लै। 17 तम्हैं अर थारी आद-लुआद निं पोस्ती दर पोस्ती*3:17 पोस्ती दर पोस्ती थारै घअरै लोहू अर च़र्बी खाई, इधी तैणीं कि आपणैं घअरै बी निं च़ुप्प-च़ुप्पै खांदै लागी, अह बधान आसा सदा लै इहअ ई।"