लेबी बधान 8

प्रोहतो अभिषेक करनैओ बधान

1 तेखअ बोलअ बिधाता मोसा लै इहअ, 2 हारण अर तेऊए शोहरू शाद, संघा णाऊंऐं तिन्‍नें प्रोहते कामां करने झिकल़ै, अभिषेक करनैओ तेल, पाप बल़ी लै बाछ़ू, दूई गाभू अर बाझ़ी सज़ेल़े बणाऐं दै भोज़ने च़ठी। 3 तेखअ कर इज़राईली टोली मेल़-ज़ोल़े खिम्भे प्रऊल़ी सेटा कठा।

4 ज़िहअ बिधाता हुकम किअ मोसा किअ तिहअ ई ज़ांऊं मेल़-ज़ोल़े खिम्भा आजू सोभी इज़राईली टोलीए सोभी लोगो झाल़अ हुअ, 5 तेखअ बोलअ मोसा तिन्‍नां सोभी टोला लै इहअ, "ज़ेऊ कामां करनैओ हुकम बिधाता आसा किअ द, हाम्हैं आसा तेता लै इधी कठा हुऐ दै।"

6 मोसा शादै हारण अर तेऊए शोहरू मेल़-ज़ोल़े प्रऊल़ी सेटा, संघा लऐ तिंयां पाणीं करै न्हैऊई। 7 तेखअ बन्हैऊंअ हारणा का प्रोहते कामां करनैओ बाघलअ च़ोल़अ संघा चघअ सह गाची करै, तेखअ बन्हैऊंईं सदरी अर कुछी बान्हीं बूणती पाई दी गाची। 8 संघा बन्हैऊंईं हारणा का करारे च़ौकी संघा डाहै तेथ ऊरीम अर तूरीम।*8:8 ऊरीम अर तूरीम ईंयां सका किज़ै किम्मती पात्थर, काठ या किज़ै होर धातू हई, ज़ेता करै बिधाता का उतर भेटा हंदअ 9 तेखअ बान्हअ हारणे मुंडै साफअ अर साफे माथै बाखा लाअ सुन्‍नेंओ पबित्र बिंदू ज़ेथ टिप्पी करै "बिधाता लै पबित्र" थिअ लिखअ द। 10 तेखअ आणअ मोसा अभिषेक करनैओ तेल, संघा किअ मेल़-ज़ोल़ो खिम्भ अर तेते समान तेल छ़ल़िकी करै अभिषेक करी बिधाता लै पबित्र। 11 तेखअ छ़ल़िकअ तेता मांझ़ै बेदी दी साता बारी तेल, संघा किऐ तेते सारै समान अर कल़ाहो अभिषेक करी तिंयां बी बिधाता लै पबित्र। 12 तेखअ किअ धख तेल हारणे मुंडै तरैल़ी करै अभिषेक, संघा किअ सह बिधाता लै पबित्र। 13 खिरी बन्हैऊंऐं मोसा हारणे शोहरू का प्रोहते कामां करने च़ोल़ै, कुछी बन्हैऊंईं तिन्‍नें गाची अर मुंडै बन्हैऊंऐं तिन्‍नां लै खास साफै, ज़िहअ बिधाता मोसा लै हुकम किअ त, तिहअ ई।

14 तेखअ निंयं मोसा पाप बल़ी करना लै बाछ़ू, संघा लाऐ हारण अर तेऊए शोहरू तेऊ बाछ़ूए मुंडै आपणैं हाथ। 15 ज़ांऊं सह बाछ़ू बल़ीदान हेरअ करी, मोसा डबेऊई आपणीं गुंठी तेते लोहू दी संघा लेस्सअ धख-धख लोहू कांस्से बेदीए च़ऊ कूणैं दी लागै दै शींगा दी अर बाकी लोहू पोछअ बेदी हेठै पाऊआ दी। इहअ करै किई मोसा सह बेदी पापे प्राश्त करना लै पबित्र।✝8:15 इब्रा. 9:21 16 तेखअ किअ मोसा तेऊ बाछ़ूए आंजा फेरे च़र्बी, काल़ज़ै प्रैंदे च़र्बी अर दुही बुक्‍की करै बेदी दी दहई करै हूम। 17 बाकी बाछ़ूओ मास्स ज़ुंण रहअ, सह पाअ खिम्भे बसती बागै अर गोबरा संघी पठी दहई ज़िहअ बिधाता हुकम किअ त, तिहअ ई।

18 तेखअ निंयं मोसा हूम बल़ी करना लै गाभू बेदी नेल़। हारण अर तेऊए शोहरू लाऐ आपणैं हाथ गाभूए मुंडा प्रैंदै। 19 तेखअ किअ सह गाभू बल़ीदान अर मोसा छ़ल़िकअ तेतो लोहू बेदी च़ऊ फेर।✝8:19 इब्रा. 9:21

20,21 तेखअ किऐ तेऊ गाभूए छ़िन्हीं करै ठोर-ठोर संघा धोऐ तेते अर दैहणीं बाखो गुल़छ़ू। तेखअ च़हअ तेऊ तेतो मूंड, च़र्बी अर बाकी सारी गाभूए शिखा बेदीए झ़ुका प्रैंदै, इहअ करै किअ सह सारअ गाभू बेदी दी हूम बल़ी, तेता का निखल़अ इहअ धूँ ज़ेता करै बिधाता खुश हआ। ईंयां सोभै गल्‍ला किई मोसा तेही ई ज़िहअ बिधाता तेऊ लै हुकम किअ त।

22 तेखअ निंयं मोसा दुजअ गाभू प्रोहते संस्कार करना लै। हारण अर तेऊए शोहरू लाऐ तेते मुंडै हाथ, 23 तेखअ किअ सह गाभू बल़ीदान। मोसा लेस्सअ धख ज़िहअ लोहू आपणीं गुंठी करै हारणे दैहणै कानै अर तेऊए दैहणै हाथे अर खूरे गुंठै दी। 24 हारणे शोहरूए दैहणै कानै हाथै अर खूरे गुंठै दी बी लेस्सअ तेऊ इहअ ई करै। बाकी लोहू पोछअ तेखअ तेऊ बेदी हेठै च़ऊ पाऊआ दी। 25 तेखअ किअ मोसा तेऊ गाभूओ दैहणीं बाखो गुल़छ़ू, छ़तरी, आंजा फेरे च़र्बी, काल़ज़ै हेठे च़र्बी अर च़र्बी संघी तेते दुहै बुक्‍की ज़ुदी। 26 तेखअ ज़ुंण बाझ़ी सज़ेल़ेओ भोज़न बिधाता लै थिअ आणअ द, तेता का च़कअ एक रोट, एक लुच़ी अर एक फुलकी संघा डाही तिंयां च़र्बी अर दैहणै गुल़छ़ू प्रैंदै। 27 संघा दैनी ईंयां सोभै च़िज़ा हारण अर तेऊए शोहरूए हाथै ढाकणा लै अर तिन्‍नैं रगाऊई तिंयां च़िज़ा उझै च़की बिधाता सम्हनै कि ईंयां च़िज़ा आसा बिधाता लै भैंट। 28 तेखअ ढाकी तिंयां च़िज़ा मोसा तिन्‍नें हाथा का पोर्ही संघा पाई तिंयां बेदीए आगी प्रैंदै हूम बल़ी। तेऊ हूमा का निखल़अ शोभली बास्सा आल़अ इहअ धूँ, ज़ेता करै बिधाता खुश हआ। इहअ करै हुई प्रोहते संस्कार करने भैंट। 29 तेखअ च़कअ मोसा गाभूओ छ़ल़्हअ संघा रगाऊअ सह उझै च़की कि सह आसा बिधाता लै। ज़िहअ बिधाता हुकम किअ त, सह भाग हुअ मोसा लै।

30 खिरी छ़ल़िकअ मोसा, हारण अर तेऊए झिकल़ै दी अभिषेक करनैओ तेल अर बेदीओ लोहू अर तेऊए शोहरू अर तिन्‍नें झिकल़ै दी बी छ़ल़िकअ। इहअ करै किऐ अभिषेक करी हारण अर तेऊए शोहरू बिधाता लै पबित्र।

31 तेखअ बोलअ मोसा हारण अर तेऊए शोहरू लै भिई, "बिधाता आसा मुखा इहअ डाहअ द खोज़ी कि तम्हैं सटेऊआ एऊ गाभूए शिखा मेल़-ज़ोल़े खिम्भे प्रऊल़ी आजू, संघा खाऐ इना शिखा अर भोज़ना ज़ुंण संस्कार करना लै च़ठी दी आसा आणअ द। 32 शिखा अर रोटी मांझ़ै ज़ै किज़ै छ़ुटे, तेता पाऐ दहई। 33 तम्हैं निं साता धैल़ी तैणीं मेल़-ज़ोल़े खिम्भे दुआरा बागै डेऊई आथी किल्हैकि तेभै तैणीं रहणअ थारअ संस्कार हंदअ लागी। 34 हाम्हैं किअ आझ़ सोभ काम तिहअ ई ज़िहअ बिधाता हुकम आसा किअ द, ताकि थारै पापो प्राश्त होए। 35 बिधाता आसा मुखा इहअ खोज़अ द कि तम्हैं रहै साता धैल़ी तैणीं धैल़-राच मेल़-ज़ोल़े खिम्भे प्रऊल़ी दी, नांईं ता तम्हैं सका मरी बी।"

36 हारण अर तेऊए शोहरू किअ तिहअ ई ज़िहअ बिधाता मोसा का हुकम थिअ किअ द कि तिंयां करे।