लेबी बधान 23

खास तिह-थैरो बधान

1 तेखअ बोलअ बिधाता मोसा लै भिई, 2 "सोभी इज़राईली का खोज़ इहअ कि मंऐं आसा तम्हां लै पबित्र तिह-थैर डाहै दै, तेता मनाऊंणा लै हऐ तम्हैं सोभै कठा।

पबित्र बशैघे धैल़ी

3 "होरी कामां-काज़ा करना लै आसा तम्हां लै हबते छ़ह धैल़ै, पर हर हबतै मनै तम्हैं सातुई धैल़ी पबित्र किल्हैकि सह आसा मुल्है। च़ाऐ तम्हैं ज़िधी बी रहे तम्हैं करै सातुई धैल़ी बशैघ अर तैहा धैल़ी करै तम्हैं मुंह बिधाता लै पबित्र झाल़अ। अह बधान आसा तम्हां लै सदा लै।✝23:3 लुआ. 20:8-10; 23:12; बधा. 5:12-14

ऊवार्णैओ थैर अर आखरै रोट लुच़ीओ थैर

4,5 "तेखअ मनाऊंऐं तम्हैं सोभै कठा हई मुंह बिधातो अदर करना लै ऊवार्णैओ थैर, एऊ पबित्र थैरा मनाऊंऐं हर साल च़ौदा च़ैत्रै उडै।✝23:4-5 लुआ. 12:1-13; बधा. 16:1-2

6 "आखरै रोट-लुच़ीओ थैर बी मनाऊंऐं तम्हैं पंद्रा च़ैत्रा पोर्ही साता धैल़ी तैणीं, तिन्‍नां तेतरै धैल़ै खाऐ तम्हैं बाझ़ी सज़ेल़े बणाऐं दै आखरै रोट-लुच़ी।✝23:6 लुआ. 12:14-20; 23:15; 34:18; बधा. 16:3-8 7 एऊ थैरे पैहली धैल़ी करै तम्हैं सोभी कामां-काज़ा का बशैघ, संघा करै तम्हैं मुंह बिधाता लै पबित्र झाल़अ। 8 एऊ थैरे हर धैल़ै करै तम्हैं हूम बल़ी, खिरी करै साज़ै धैल़ै भिई तम्हैं सोभी कामां का बशैघ संघा करै तम्हैं सोभै मुंह बिधाता लै पबित्र झाल़अ।"

पज़ैआ मांझ़ै पैहलअ भाग भैंट करनअ

9 तेखअ बोलअ बिधाता मोसा लै भिई, 10 "इज़राईली लै बोल इहअ कि ज़ुंण ज़ैगा मंऐं तम्हां लै आसा लाई दी दैई, ज़ेभै तम्हैं तैहा ज़ैगा बस्से, आपणीं पज़ैआ मांझ़ै दैऐ पैहलअ नाज़ो कुंभल़अ मुल्है। तेता आणै प्रोहता सेटा लै 11 बशैघे दुजै धैल़ै। संघा रगाओऐ तेऊ नाज़े कुंभल़ै मुंह सम्हनै उझै कि सह आसा मुंह बिधाता लै अर मुंह मनणी तम्हां बाखा सह थारी भैंट। 12 तैहा पज़ैआ का आणै दै नाज़े कुंभल़ै संघै करै तम्हैं मुंह बिधाता खुश करना लै एकी सालो एक मिम्मूं बी हूम बल़ी ज़ेथ किछ़ै खोट निं होए। 13 तेता संघै करै तम्हैं एक बडअ पाथअ*23:13 बडअ पाथअ दूई किलू पिठअ कणको पिठअ बी जैतूनो तेल*23:13 जैतूनो तेल एक किलू तेल राल़ी करै हूम, तेता का लोल़ी शोभली बास्सा आल़अ इहअ धूँ निखल़अ ज़ेता करै हुंह बिधाता खुश हआ। इना सोभी संघै करै च़ार सेर दाखे रसो अर्घअ बी।✝23:13 लुआ. 29:40 14 हुंह आसा थारअ परमेशर, ज़ेभै तैणीं तम्हैं नऊंईं पज़ैआ मांझ़ै इना च़िज़ा मुंह सेटा नांईं आणे, तेभै तैणीं नां भोश खाई, नां मोल़ी खाई अर नां तेते रोटी चाणी। एऊ बधाना डाहै पोस्ती दर पोस्ती आद।

नऊंईं साल-फसलो थैर

15 "ज़हा धैल़ी तम्हैं सह नाज़ो कुंभल़अ मुल्है भैंट किअ तैहा धैल़ी का आणै तम्हैं गणी करै साता बशैघे धैल़ी बाद मुंह बिधाता लै नऊंईं साला मांझ़ै नाज़ बल़ी।✝23:15 लुआ. 23:16; 34:22; बधा. 16:9-12 16 तेऊ भागा आणै तम्हैं ठीक पज़ाहुई धैल़ी, ज़ेभै सात बशैघे धैल़ै पूरै हणैं।

17 "तम्हैं आणै दूई रोट संघा रगाओऐ तिन्‍नां मुंह सेटा कि तिंयां आसा मुंह बिधाता लै। तिन्‍नां चाणै आपणीं नऊंईं साले एक बडअ पाथअ*23:17 बडअ पाथअ दूई किलू पिठै करै सज़ेल़अ पाई।

18 "तेता संघै आणै इज़राईली एकी-एकी साले सात मिम्मूं अर दूई गाभू अर एक बाछ़ू ज़ेथ किछ़ै खोट निं होए। तिन्‍नां सोभी करै मुंह बिधाता खुश करना लै हूम बल़ी ज़िहै, नाज़ बल़ी अर दाखे रसो अर्घअ बी लोल़ी एता संघै ज़रूर दैनअ। 19 तेखअ करै पापो प्राश्त करना लै एक छ़ेल्हू पाप बल़ी अर दूई मिम्मूं करै मुखा बर्गत मांगणा लै मेल़-ज़ोल़े बल़ी।

20 "तेखअ रगाओऐ प्रोहत तिन्‍नां गाभू नऊंईं साले पज़ैआ का चाणी आणै दै तेऊ भोज़ना संघै उझै कि सह आसा मुंह बिधाता लै, ईंयां आसा मुल्है पबित्र अर अह भाग आसा प्रोहतो।

21 "तम्हैं निं तैहा धैल़ी होर किछ़ै काम-काज़ करी पर तम्हैं सोभै करै मुल्है पबित्र झाल़अ। थारै शोहरू-माठै बी लोल़ी ईंयां सोभै गल्‍ला भाल़ी डाही कि पोस्ती दर पोस्ती एऊ बधाना इहअ ई करे।

22 "ज़ेभै तम्हैं आपणैं खेचा का नाज़ लऊए, तेथ छ़ाडै कोडी-बिला अर पुंझ़ै धख नाज़ लऊंणै बाझ़ी एही अर ज़ुंण सील धरनीं अल़े तिन्‍नां बी निं च़की, तिन्‍नां दैऐ कहा गरीब अर परदेसी मणछा लै रहणैं ज़ुंण तम्हां मांझ़ै रहा होए। हुंह आसा थारअ परमेशर बिधाता।"✝23:22 लेब. 19:9,10; बधा. 24:19-22

नर्शिंगै बाज़णैंओ थैर

23 तेखअ बोलअ बिधाता मोसा लै, 24,25 "इज़राईली मणछा का खोज़ इहअ कि साज़ै शऊजे धैल़ी लोल़ी तम्हां लै खास बशैघे धैल़ी हुई अर तैहा धैल़ी निं तम्हैं किछ़ै काम-काज़ करी, तैहा धैल़ी बाज़ै तम्हैं नर्शिंगै, संघा करै तम्हैं सोभै मुल्है पबित्र झाल़अ अर तेखअ करै मुंह बिधाता लै हूम।"

पापो प्राश्त करने महान धैल़ी

26 तेखअ बोलअ बिधाता मोसा लै भिई, 27 "दसा शऊजे धैल़ी आसा पापो प्राश्त करने महान धैल़ी, तैहा धैल़ी रहै तम्हैं भुखै*23:27 भुखै रोटी निं खाणीं, ब्रत, लूंण खाणें ज़ाज़त निं आथी संघा करै मुल्है पबित्र झाल़अ, संघा करै मुंह बिधाता लै नाज़ो हूम। 28 तैहा धैल़ी निं तम्हैं होर किछ़ै काम करी, अह आसा पापो प्राश्त करने महान धैल़ी ज़ेभै तम्हैं मुल्है बल़ीदान करनै, अर मुंह बिधाता करनै तम्हां सोभिए पाप माफ।

29 "ज़ुंण ऐहा धैल़ी भुखअ निं रहे सह करनअ मुंह आपणैं लोगा मांझ़ा का दूर।✝23:29 शधा. 3:23 30,31 तम्हैं मेरै लोग निं तैहा धैल़ी किछ़ै काम-काज़ करी, नां एभै अर नां आजू कधू इहअ करी, ज़ुंण एऊ बधाना चोल़े सह करनअ मुंह आपणैं लोगा मांझ़ा का दूर। 32 ऐहा धैल़ी लोल़ी सोभी कामां-काज़ा का बशैघ किअ ज़िहअ बशैघे धैल़ीओ बधान आसा। ऐहा धैल़ी रहै तम्हैं सोभै नौआ शऊजै उडै पोर्ही दसा शऊजै उडै तैणीं ब्रतू।"

छ़ानींओ थैर

33 तेखअ बोलअ बिधाता मोसा लै इहअ,✝23:33 बधा. 16:13-15 34 "इज़राईली मणछा का खोज़ पंद्रा शऊजा पोर्ही मनाऊंऐं तम्हैं साता धैल़ी तैणीं मुंह बिधातो अदर करना लै छ़ानींओ थैर।✝23:34 जोह. 7:2 35 एऊ थैरे पैहली धैल़ी बी निं तम्हैं किछ़ै काम-काज़ करी, ऐहा धैल़ी करै तम्हैं सोभै मुल्है पबित्र झाल़अ। 36 साता धैल़ी तैणीं रहै तम्हैं मुंह बिधाते कांस्से बेदी दी हूम बल़ी करदै लागी, अर आठुई धैल़ी करै तम्हैं भिई सोभै पबित्र झाल़अ, सह हणअ बडअ झाल़अ अर तैहा धैल़ी करै हूम अर होर काम काज़ निं तैहा धैल़ी बी किछ़ै करी।✝23:36 जोह. 7:37

37 "तम्हां लै आसा मंऐं ईंयां थैर डाहै दै, ज़ेभै तम्हैं सोभी कठा हई पबित्र झाल़अ करी मुंह बिधाता लै हूम बल़ी, नाज़ बल़ी, मेल़-ज़ोल़े बल़ी अर दाखे रसो अर्घअ करनअ। 38 बशैघे धैल़ी का लाऊआ मनाऊंऐं तम्हैं इना थैरा ज़रूर अर तेभै करै तम्हैं आपणीं मानत अर आपणीं खुशी दी आणी दी बल़ी मुंह बिधाता लै हूम।

39 "ऐहा गल्‍ला डाहै तम्हैं आद कि पंद्रा शऊजे धैल़ी ज़ेभै तम्हैं आपणैं खेचा का नाज़ कठा करी मुक्‍के तेभा पोर्ही मनाऊंऐं साता धैल़ी तैणीं मुंह बिधातो अदर करना लै छ़ानींओ थैर अर तेऊ थैरे पैहली अर आठुई धैल़ी निं होर किछ़ै काम-काज़ करी, तेभै करै पठी बशैघ। 40 आपणैं डाल़ा-बूटा का आणै बधिया-बधिया फल़, खज़ूरे बडै-बडै पाच अर घणैं पाचा आल़ै बूटा का आणै शाण्हटी अर पाणींए बाढा का मधनूं चोल़ी। संघा मनाऊंऐं साता धैल़ी तैणीं मुंह बिधाता लै एऊ खुशीए थैरा। 41 एऊ थैरा मनाऊंऐं तम्हैं हर साल शऊजे भिन्‍नैं साता धैल़ी तैणीं पोस्ती-दर पोस्ती इहअ ई। 42 साता धैल़ी तैणीं रहै तम्हैं सोभै इज़राईली मणछ छ़ानीं दी, 43 इहअ करै रहणअ आजू पोस्ती दर पोस्ती थारी आद-लुआदा का बी थोघ कि तिन्‍नें दाद-बाब इज़राईली रहै तै तधू छ़ानीं दी ज़धू मंऐं बिधाता तिंयां मिसर देशा का काढी आणै। हुंह आसा थारअ परमेशर बिधाता।"

44 मोसा डाही सोभी इज़राईली का ईंयां सारी गल्‍ला राम्बल़ै करै खोज़ी कि बिधाते ईंयां थैर मनाऊंणै एऊ साबै।