लेबी बधान 9

हारण लागअ प्रोहते कामां करदअ

1 आठुऐ*9:1 आठुऐ साता धैल़ै संस्कारो बधान पूरै करनै बाद धैल़ै शादै मोसा हारण, तेऊए शोहरू अर इज़राईली टोलीए सोभै सैणैं। 2 तेखअ बोलअ तेऊ हारणा लै, "डागै-चैणैं मांझ़ै आणा एक बाछ़ू अर एक आणा गाभू ज़ेथ किछ़ै खोट निं होए। बाछ़ू करा बिधाता लै पापो प्राश्त करना लै पाप बल़ी अर गाभू करा बिधाता खुश करना लै हूम बल़ी। 3 होरी सोभी इज़राईली मणछा लै बी बोला कि तम्हैं बी करा बल़ीदान। तिन्‍नां लै बोलै छ़ेल्हू पाप बल़ी करना लै, हूम बल़ी करना लै करै बाछ़ू अर मिम्मूं बिधाता लै बल़ीदान। बाछ़ू अर मिम्मूं लोल़ी एकी साले हुऐ ज़ेथ किछ़ै खोट निं होए। 4 तेखअ करै तिंयां बाछ़ू अर गाभू बिधाता का बर्गत मांगणा लै मेल़-ज़ोल़े बल़ी। तेता संघै आणै तेल राल़अ द नाज़ बल़ी बी। अह आसा एते तैणीं कि आझ़ शुझणअ तम्हां का बिधाता आपणीं आछी।"

5 ज़िहअ-ज़िहअ मोसा तिन्‍नां मणछा लै बोलअ, तिन्‍नैं आणी तिंयां सोभै गल्‍ला मेल़-ज़ोल़े खिम्भा आजू। संघा खल़्हुऐ सोभी टोलीए लोग तिधी बिधाता सम्हनै।

6 तेखअ बोलअ मोसा, "अह आसा सह काम ज़ेता करना लै बिधाता तम्हां लै हुकम आसा किअ द, एता करा, तम्हां का शुझणअ तेखअ बिधातो महान धुप्पअ।"

7 तेखअ बोलअ मोसा हारणा लै, "हारण, बेदी सेटा डेऊ, संघा कर बिधाता खुश करना लै हूम बल़ी, तेखअ कर आपणैं अर सोभी लोगे पाप माफी लै पाप बल़ी, ज़िहअ बिधाता हुकम आसा किअ द, तिहअ ई।"✝9:7 इब्रा. 5:3

8 हारण डेऊअ कांस्से बेदी सेटा संघा काटअ तिधी पाप बल़ी लै एक बाछ़ू। 9 तेतो लोहू आणअ तेऊए शोहरू तेऊ सेटा लै संघा डबेऊई तेऊ आपणीं गुंठी लोहू जैंदरी संघा लेस्सअ तेतो लोहू कांस्से बेदीए च़ऊ कूणैं लागै दै शींगा दी। बाकी लोहू पोछअ बेदी हेठै पाऊआ दी। 10 पाप बल़ीए आंजा फेरे च़र्बी, काल़ज़ै हेठे च़र्बी, काल़ज़े च़र्बी करै किअ बेदीए झ़ुका प्रैंदै पाई हूम ज़िहअ बिधाता मोसा लै हुकम थिअ किअ द। 11 तेखअ ज़ुंण मास्स तेता का रहअ सह पाअ तेते खाल अर आंजा पोटा संघी खिम्भे बसती बागै पठी दहई।

12 तेखअ काटअ हारणै बिधाता खुश करना लै गाभू हूम बल़ी। संघा आणअ तेऊए शोहरू तेतो लोहू हारणा सेटा लै अर तेऊ छ़ल़िकअ तेता का धख-धख लोहू बेदी फेर च़ऊ बाखा। 13 संघा आणी तिन्‍नैं तेऊ गाभूए शिखा टूंड-मूंड संघी हारणा सेटा अर तेऊ किअ तेतो बेदी दी पठी दहई करै हूम। 14 तिन्‍नैं धोऐ तेते आंज-पोट अर मूरै राम्बल़ै करै संघा पाऐ तिंयां बी हूम बल़ी प्रैंदै डाही करै पठी दहई।

15 तेखअ काटअ हारणै सोभी लोगे पाप माफी लै छ़ेल्हू पाप बल़ी, ज़िहअ तेऊ आप्पू अर आपणैं शोहरू लै बल़ीदान किअ त, सह बी किअ तेऊ तिहअ ई। 16 ज़िहअ तेतो बधान थिअ, तिहअ ई किअ तेऊ सह बी बेदी दी हूम बल़ी। 17 नाज़ बल़ी मांझ़ै बी किअ तेऊ तेता का एक मुठ बेदी दी पाई हूम, अह त दोत्ती नाज़ बल़ी करनै का लाऊआ।

18 खिरी काटअ तेऊ बिधाते बर्गत मांगणा लै एक बाछ़ू अर गाभू मेल़-ज़ोल़े बल़ी। हारणे शोहरू आणअ तेतो लोहू तेऊ सेटा लै अर तेऊ छ़ल़िकअ तेता का बेदी फेर च़ऊ बाखा। 19 तेऊए शोहरू दैनी तेऊ बाछ़ू अर गाभूए आंजा फेरे सारी च़र्बी, छ़तरी, काल़ज़ै हेठे च़र्बी, काल़ज़े भाछी अर दुहै बुक्‍की हारणे हाथै। 20 सह च़र्बी डाही तिन्‍नैं तिन्‍नां दुही छ़ल़्है प्रैंदै, हारणै किअ च़र्बीओ बेदी दी दहई करै हूम। 21 पर तिंयां दुहै छ़ल़्है अर दुहै दैहणै गुल़छ़ू रगाओऐ उझै च़की बिधाता सम्हनै कि ईंयां आसा बिधाता लै अर्पण। इना सोभी गल्‍लो बधान किअ तिन्‍नैं ठीक तिहअ ई पूरअ ज़िहअ बिधाता मोसा का हुकम थिअ किअ द।

22 ज़ांऊं हारण तिन्‍नां हूम बल़ी, पाप बल़ी अर मेल़-ज़ोल़े बल़ी करी मुक्‍कअ, तेखअ दैनी तेऊ लोगा बाखा आपणअ हाथ उझै खल़अ करी बर्गत, संघा होथअ सह बेदी का उंधै।✝9:22 गण. 6:22-26 23 तेखअ डेऊअ सह मोसा संघै मेल़-ज़ोल़े खिम्भा भितरा लै। ज़ांऊं तिंयां बागै निखल़ै, तिन्‍नैं दैनी लोगा लै बर्गत। तेखअ हुअ बिधाता तिधी आपणैं महान धुप्पै दी प्रगट। 24 बेदी प्रैंदै च़र्बी संघी ज़ुंण हूम बल़ी थिई, सह किई बिधाता आगीए बडै-बडै ज़ल़दै लुपल़ै करै दहई खतम। ज़ांऊं सोभी लोगै इहअ भाल़अ, तिन्‍नैं किई ज़ोरै-ज़ोरै बिधाते ज़ै-ज़ैकार संघा टेक्‍कअ सोभी लोगै बिधाता सेटा माथअ।