1 तेखअ बोलअ बिधाता मोसा लै भिई इहअ, 2 "इज़राईली मणछा का खोज़ इहअ, ज़ै कुंणी मानत होए डाही दी, ज़ै तिंयां तेता का छ़ुटणअ च़ाहे, 3-7 तिंयां सका तेते बदल़ै पबित्र ज़ैगे च़लणें साबै ढब्बै दैई, मर्ध, ज़ुंण बिहा का शाठी साला तैणीं होए, सह दैऐ पज़ाह* च़ंदीए सिक्‍कै, ज़ै सह बेटल़ी होए, सह दैऐ तिह च़ंदीए सिक्‍कै।

"ज़ै कहा शोहरूए अमर पांज़ा साला का उझै अर बिहा साला का उंधै होए सह दैऐ बिह च़ंदीए सिक्‍कै, ज़ै सह शोहरी होए, सह दैऐ दस च़ंदीए सिक्‍कै।

"मर्ध, ज़सरी अमर शाठी साला का उझै होए, सह दैऐ पंद्रा च़ंदीए सिक्‍कै, ज़ै सह बेटल़ी होए, सह दैऐ दस च़ंदीए सिक्‍कै।

"होछ़अ लान्हअ, एकी का पांज़ा साला तैणीं होए, तेऊए दैऐ पांज़ च़ंदीए सिक्‍कै, ज़ै सह होछ़ी लान्हीं होए, तेसे दै चअन च़ंदीए सिक्‍कै।

8 "ज़ै बांधै डाहणैं आल़अ एतरअ गरीब होए कि सह निं तेता का छ़ुटणा लै पठी ढब्बै दैई सकदअ, तेऊ निंयैं प्रोहता सेटा लै अर तेतो फैंसलअ करै प्रोहत कि सह केतरै ढब्बै सका दैई।

9 "ज़िहै पशूओ बल़ीदान मुंह बिधाता लै हआ, ज़ै कुंणी मुल्है तेतो बांधअ होए डाहअ द, सह आसा पबित्र, 10 तेते बदल़ै होर पशू दैई निं सह छ़ुटी सकदअ, च़ाऐ सह तेता का बधिया किल्है निं होए, ज़ै सह इहअ करे, तै हणैं तिंयां दुहै पबित्र अर तिंयां लागणै दुहै बल़ीदान करनै। 11 ज़हा-ज़हा पशूओ बल़ीदान मुंह बिधाता लै नांईं हंदअ, ज़ै कुंण तिहै छ़ोतलै पशू दैणैंओ बांधअ मने, सह आणै तेता प्रोहता सेटा लै, 12 प्रोहत करै तेऊ पशूओ गूण-दोश भाल़ी किम्मत पाक्‍की। 13 पर ज़ै सह बांधै मनणै आल़अ तेऊ पशू बापस लणअ च़ाहे, सह दैऐ तेऊ पशूए किम्मत अर तेता का लाऊआ दैऐ तेतो पांज़ूअ निसब होर खास्सअ।

14 "ज़ै कुंण मुंह बिधाता लै आपणअ घअर दैणैंओ बांधअ मने, प्रोहत करै तेते गूण-दोश भाल़ी किम्मत, ज़ुंण प्रोहत खोज़े सह ई हणअ तेतो मोल। 15 पर ज़ै मुल्है बांधै मनणै आल़ै मणछा सह आपणअ घअर बापस लोल़ी होए, सह दैऐ तेऊ घअरे किम्मत ढब्बै अर तेता का लाऊआ दैऐ तेतो पांज़ूअ निसब होर खास्सअ।

16 "ज़ै कुंणी आपणीं जदी ज़िम्मीं मांझ़ै मुंह बिधाता लै खेच दैणैंओ बांधअ होए मनअ द, तेते किम्मत हणीं एऊ साबै पाक्‍की कि तेथ केतरअ बेज़अ* लागा, हर दस बाटी✝ ज़ौआ लै हणैं दस च़ंदीए सिक्‍कै किम्मत पाक्‍की।* 17 ज़ै सह तेऊ खेचा दैणैंओ बांधअ पज़ाहुई साले बर्शगांठे ई साला मने, तै हणीं तेते पूरी किम्मत, 18 पर ज़ै बांधअ तेता बाद होए मनअ द, तै करै प्रोहत तेते ढब्बे किम्मत एऊ साबै पाक्‍की कि आगली पज़ाहुई साले बर्शगांठै लै होर केतरी साला रही। 19 तेखअ ज़ै तेऊ बांधै मनणै आल़ै आपणअ खेच बापस लोल़ी होए, सह दैऐ तेऊ खेचे ढब्बै ज़ेतरी तेते किम्मत आसा। तेता का लाऊआ दैऐ सह तेतो पांज़ूअ निसब होर खास्सअ। 20 पर ज़ै सह तेऊ खेचा होरी का बेच़े, तेखअ निं सह तेऊ खेचा कधि कुआसी सकदअ। 21 आगलै पज़ाहुई साले बर्शगांठै लै हणअ सह खेच मुंह बिधाता लै सदा अर सह हणीं तेखअ प्रोहते जदी ज़िम्मीं।

22 "ज़ै कुंण मणछ आपणअ मोलै लअ द खेच मुंह बिधाता लै बांधअ मने, 23 तेते किम्मत करै प्रोहत एते साबै पाक्‍की कि आगली पज़ाहुई साले बर्शगांठै लै केतरी साला रही होर, तेखअ भरै बांधअ मनणै आल़अ तेतरै ढब्बै मुंह बिधाता लै तैहा ई धैल़ी। 24 तेखअ पज़ाहुई साले बर्शगांठै दी ज़ांऊं सह खेच छ़ुटे, तेऊ दैऐ तेखअ तेते असली मालका लै बापस ज़हा का सह मोलै त लअ द। 25 ✝सोभी गल्‍ले किम्मत लोल़ी प्रोहतै पबित्र ज़ैगे काईदे साबै पाक्‍की किई।*

26 "पर थारै बाछ़ू, मिम्मूं, छ़ेल्हू ज़ुंण डागै-चैणैं मांझ़ै पैहलै सोए आसा, तिंयां आसा पैहलै ई का मेरै। तिन्‍नां मांझ़ै निं लागी मुंह बिधाता लै बांधै डाहंदै। 27 पर ज़ुंण पशू छ़ोतलअ आसा, ज़ै कुंण मुल्है तेता बांधअ डाहे, तेता सका सह तेते किम्मता का पांज़ूअ निसब होर खास्सअ भरी बापस निंईं। ज़ै सह बापस नांईं निंए, तेता सका तेखअ तैहा किम्मता दी कहा होरी का बेच़ी ज़ेतरी प्रोहत पाक्‍की करे।

28 "पर तिन्‍नां च़िज़ा निं तम्हैं बेच़ी या बापस लई सकदै, ज़ुंण तम्हैं मुंह बिधाता लै मानत होए मनी दी, च़ाऐ सह मणछ होए, पशू होए या ज़िम्मीं होए, तेता मनै पबित्र अर सह हणीं सदा लै मेरी।✝ 29 तेखअ च़ाऐ मुल्है दैणें मानत मणछ ई किल्है निं होए, तेता निं बापस लई सकदै, सह लागणअ मारी ई पाणअ।

30 "पज़ैआ मांझ़ै तेतो दसुअ निसब च़ाऐ सह नाज़ होए या फल़, तेता मनै पबित्र सह आसा मुंह बिधाता लै।✝ 31 ज़ै तम्हैं तेता बापस लणअ च़ाहे, तै दैऐ तेते किम्मता संघै तेता का लाऊआ तेतो पांज़ूअ निसब होर खास्सअ।

32 "ज़ेभै तम्हैं डागै-चैणैं हेल़्ही शोठी हेठै नढैऊई गणे तेता मांझ़ै आसा दसा मांझ़ै एक मुंह बिधाता लै, 33 च़ाऐ सह राम्बल़अ होए च़ाऐ माल़अ। ज़ै तम्हैं तेते बदल़ै किज़ै होर बदल़अ दैए, तेखअ आसा तिंयां दुहै मेरै, तेता निं तम्हैं बापस निंईं सकदै।"

34 मोसा थिअ तधू सीनाई धारा ज़धू बिधाता तेऊ का इज़राईली मणछा लै ईंयां बधान खोज़ै।