1 बिधाता बोलअ मोसा अर हारणा लै भिई, 2 "इज़राईली मणछा का डाहा तम्हैं इहअ खोज़ी कि ज़हा मर्धे गुप्त आंगा का शेतू चुहंदअ रहा लागी सह आसा छ़ोतलअ। 3 सह च़ाऐ कबल्‍लअ चुहंदअ रहे लागी, च़ाऐ सह तेखअ चुंहणअ रुकी जाए, तज़ी बी आसा सह मणछ छ़ोतलअ। 4 अह इहअ मणछ ज़हा च़ैन्‍नै दी सुत्ते अर ज़ेथ बेशे, तिंयां च़िज़ा बी आसा छ़ोतली। 5-7 तेखअ ज़ुंण होर मणछ तेऊए च़ैन्‍ना या तिन्‍नां च़िज़ा छ़ुंए सह न्हैईऐ-धोईऐ संघा धोऐ आपणैं झिकल़ै-टाल्है पठी, पर तज़ी बी रहणअ सह मणछ उडै तैणीं छ़ोतलअ।

8 "ज़ै तेऊ शेतू चुंहणैं आल़ै मणछो थूक कहा शुचै मणछा दी पल़े, सह बी न्हैईऐ संघा धोऐ आपणैं झिकल़ै-टाल्है पठी, पर तज़ी बी रहणअ सह मणछ उडै तैणीं छ़ोतलअ।

9,10 "शेतू चुंहणैं आल़अ मणछ ज़ेथ प्रैंदै बी बेशे, तिंयां च़िज़ा बी रहणीं उडै तैणीं छ़ोतली। ज़ुंण च़िज़ा तेऊ मणछा का छ़ुंहूंई दी होए, तेखअ ज़ै तिन्‍नां च़िज़ा कुंण होर मणछ छ़ुंए या च़के, तेऊ बी लागणीं तेता करै छ़ोत। सह बी लऐ तेखअ न्हैऊई संघा धोऐ आपणैं झिकल़ै-टाल्है पठी, पर तज़ी बी रहणअ सह मणछ उडै तैणीं छ़ोतलअ।

11 "ज़ै सह शेतू चुंहणैं आल़अ मणछ कहा होरी मणछा नधोऐ हाथै छ़ुंए, ज़ुंण मणछ तेऊ छ़ुंअ सह लऐ न्हैऊई संघा धोऐ आपणैं झिकल़ै-टाल्है पठी, पर तज़ी बी रहणअ सह मणछ उडै तैणीं छ़ोतलअ। 12 ज़ै सह शेतू चुंहणैं आल़अ मणछ कहा माट्टे भांडै छ़ुंए, तेता पाऐ फाल़ी अर काठे भांडै लऐ पाणीं करै राम्बल़ै धोई मांज़ी।

13 "तेखअ बादा का ज़ै सह शेतू चुंहणैं आल़ी बमारी का राम्बल़अ जाए हई, तेते साता धैल़ै बाद न्हैईऐ सह बहूंदै पाणीं दी अर आपणैं झिकल़ै बी धोऐ पठी, तेखअ हणअ सह शुचअ।

14 "आठुई धैल़ी आणै सह मुंह बिधाता सेटा मेल़-ज़ोल़े खिम्भे प्रऊल़ी आजू दूई कबूतर, कि आणै दूई पालल़ी, संघा दैऐ तिन्‍नां प्रोहते हाथै। 15 प्रोहत करै तेता मांझ़ै एक च़ेल्‍लू तेऊ मणछे पापो प्राश्त करना लै पाप बल़ी अर दुजअ करै मुंह बिधाता खुश करना लै हूम बल़ी। तेखअ करनअ मुंह बिधाता सह मणछ पठी शुचअ।

16 "ज़ै कहा मर्धो बीज तेऊए गुप्त आंगा का केभै नच़ानक निखल़े, सह मणछ न्हैईऐ आप्पू राम्बल़ै करै, पर तज़ी बी रहणअ सह उडै तैणीं छ़ोतलअ। 17 ज़हा झिकल़ै दी या खाला का बणी दी च़िज़ा दी सह बीज पल़े, तेता धोऐ पाणीं दी राम्बल़ै करै, पर तिंयां च़िज़ा बी रहणीं उडै तैणीं छ़ोतली।

18 "ज़ेभै मर्ध अर बेटल़ी आप्पू मांझ़ै सुख-भोग करे, तेता बाद लऐ तिंयां दुहै न्हैऊई, पर तज़ी बी रहणैं तिंयां उडै तैणीं छ़ोतलै।✝

19 "ज़ेभै बेटल़ी हर भिन्‍नैं न्हैऊंणें रीत होए आई दी, सह रहै साता धैल़ी तैणीं छ़ोतली, ज़ै तैहा कुंण छ़ुंए सह लऐ न्हैऊई, पर तज़ी बी रहणअ सह मणछ उडै तैणीं छ़ोतलअ।

20-23 "सह न्हैऊई दी बेटल़ी ज़ेथ सुत्ते अर बेशे तिन्‍नां च़िज़ा बी लागणीं छ़ोत। ज़ुंण तेसे सुत्तणे-बेशणे झिकल़ै या तेसे किज़ू च़िज़ा छ़ुंए सह लऐ न्हैऊई संघा धोऐ आपणैं झिकल़ै-टाल्है पठी, पर तज़ी बी रहणअ सह मणछ उडै तैणीं छ़ोतलअ।

24 "ज़ै तेसो मर्ध तैहा न्हैऊई दी बेटल़ी संघै सुत्ती-बेशी सुख भोग करे, सह मणछ बी रहै साता धैल़ी तैणीं छ़ोतलअ अर ज़ेथ सह सुत्ते या ज़हा च़िज़ा दी सह बेशे सह बी हणीं छ़ोतली।

25 "ज़ै कहा न्हैऊई करै लोहू बगणें धैल़ै पूरै हणैं का बाद बी लोहू खास्सै धैल़ै बहूंदअ लागी रहे, एही दशा दी रहणीं सह बेटल़ी तेभै तैणीं छ़ोतली ज़ेभै तैणीं तेसो लोहू बहूंणअ शुक्‍की निं जाए।✝ 26 न्हैऊंणें रीत एछणें का बाद तिन्‍नां तेतरै धैल़ै सह बेटल़ी ज़हा च़ैन्‍नै सुत्ते अर ज़ेथ सह बेशे तिंयां सोभै गल्‍ला हणीं तैहा बेटल़ी ज़ेही तेतरै धैल़ै छ़ोतली।

27 "ज़ै कुंण होर मणछ तिन्‍नां च़िज़ा छ़ुंए, सह लऐ तेखअ न्हैऊई अर आपणैं झिकल़ै धोई, पर तज़ी बी रहणअ सह मणछ उडै तैणीं छ़ोतलअ।

28 "साता धैल़ी बाद हणीं सह भिन्‍नें ऋता न्हैऊई दी बेटल़ी रबाज़े साबै शुची।

29 "आठुऐ धैल़ै आणै सह दूई कबूतर, कि आणै सह दूई पालल़ी मेल़-ज़ोल़े खिम्भे प्रऊल़ी आजू, संघा दैऐ तिन्‍नां प्रोहता का। 30 सह करै तेता मांझ़ै एक च़ेल्‍लू पापो प्राश्त करना लै पाप बल़ी अर दुजअ करै मुंह बिधाता खुश करना लै हूम बल़ी। तेखअ हणीं सह बेटल़ी छ़ोता का पठी शुची।

31 "इहअ करै तम्हां इज़राईली मांझ़ै ज़ुंण बी छ़ोतलअ होए या छ़ोत होए लागी दी, सह रहै होरी सोभी लोगा का ज़ुदअ, इहअ निं हआ कि ज़ुंण मेरअ बसेरअ तम्हां जैंदरी आसा, तेथ छ़ोत लागे अर तम्हैं सोभै मरे।

32,33 "छ़ोतलै मणछा शुचै हणां लै आसा अह ई बधान, च़ाऐ कहा मणछा गुप्त आंगा दी शेतू चुंहणे बमारी होए या नच़ानक बीज बागै निखल़े। ज़हा बेटल़ी का लोहू होए बहूंदअ लागअ द तैहा बी लागणअ शुचै हणैंओ अह बधान पूरअ करनअ, च़ाऐ सह आपणीं ऋता न्हैऊई दी होए, च़ाऐ तैहा एही होए लागअ द लोहू बगदअ। ज़ुंण मर्ध भिन्‍नें ऋता न्हैऊई दी बेटल़ी, धाते बमारी आल़ी छ़ोतली बेटल़ी संघै रही हील़े-हास्से तेऊ लै बी आसा शुचै हणैंओ अह ई बधान।"