लेबी बधान 24

पबित्र ज़ैगा सदीअ

1 तेखअ बोलअ बिधाता भिई मोसा लै इहअ, 2 "सोभी इज़राईली का खोज़ इहअ कि मेल़ ज़ोल़े खिम्भा भितरी सदीऐ ज़ाल़णा लै आणै जैतूनो च़ोखअ तेल ताकि तिधी कबल्‍लअ प्रैश्शअ रहे। 3,4 हारण डाहै मेल़-ज़ोल़े खिम्भा भितरी खास पबित्र ज़ैगा च़ोखै सुन्‍नेंओ सदीअ मांझ़लै पल्दै शाजतीए मणशू*24:3-4 शाजतीए मणशू करारे मणशू आजू, संघा ज़ाल़ै तेते सात सदीऐ। तिंयां लोल़ी आझ़ा पोर्ही सदा हर धैल़ै सारी राची मुंह बिधाता सम्हनै ज़ल़दै रहै। एऊ बधाना करै पोस्ती दर पोस्ती इहअ ई।

भोज़न

5 "सोभी का बधिया पिठै करै बणाऐं बारा रोट, एक-एक रोट लोल़ी एक बडअ पाथअ*24:5 बडअ पाथअ दूई किलू पिठअ मुछ़ी चाणअ।✝24:5 लुआ. 25:30 6 तेखअ निंयैं तिन्‍नां मेल़-ज़ोल़े खिम्भा भितरी संघा डाहै तिन्‍नां मुंह बिधाता सम्हनै च़ोखै सुन्‍नें पलगा प्रैंदै छ़ह रोट एकी लगैगा दी अर छ़ह दुजी। 7 तिन्‍नां दुही लगैगा दी डाहै लोवान बी कि सह भोज़न आसा आद करने च़ीज़ अर बिधाता लै हूम। 8 हर बशैघे धैल़ी डाहै हारण मुंह बिधाता सम्हनै तेऊ पलगा दी साज़रअ भोज़न तेऊ ई साबै। तेता करै प्रोहत पोस्ती दर पोस्ती इज़राईली बाखा अटल़ करार समझ़ी इहअ ई। 9 मुंह बिधाता लै किऐ दै हूमा का बाकी रहअ द अह भोज़न हणअ सदा हारण अर तेऊए शोहरूओ भाग, अह आसा खास पबित्र किल्हैकि अह आसा मुल्है छ़ाडअ द अर एता खाऐ किधी पबित्र ज़ैगा।"✝24:9 मोत्त. 12:4; मार्क. 2:26; लूक. 6:4

बिधाता लै फिटक दैणें सज़ा

10,11 तिन्‍नां धैल़ै हुअ इहअ कि दान गोत्रा का थिअ एक मणछ, तेऊ नाअं त दिबरी, तेऊए शोहरी नाअं त शेलोमीत, तैहा त एकी मिसरी मणछा संघै बैह किअ द अर तेसो थिअ एक शोहरू। एकी बारी आअ तिन्‍नों सह शोहरू इज़राईलीए बसती दी एकी इज़राईली मणछा संघै झ़घल़दअ, संघा लागअ सह निंदा करी बिधाता लै फिटक दैंदअ। लोगै निंयं सह ढाकी करै मोसा सेटा लै, 12 तिन्‍नैं डाहअ सह गोटी संघा रहै तिंयां न्हैल़ै लागी कि बिधाता करे एता लै आप्पै हुकम कि एता लै किज़ै करनअ।

13 बिधाता बोलअ मोसा लै इहअ, 14 "एऊ मणछै दैनअ मुल्है फिटक! एऊ मणछा निंयां सारी बसती बागै अर ज़ुंणी-ज़ुंणी अह मणछ बोल्दअ शूणअ तिंयां शाजत डाहै एऊए मुंडै हाथ, संघा पाआ सोभै इज़राईली टोली एऊ मणछा पात्थरो ढो दैई मारी।

15,16 "तूह डाह इज़राईली मणछा का राम्बल़ै करै खोज़ी ज़ुंण मुंह बिधाता लै फिटक दैंदअ फिरे सह पाणअ इहअ ई करै मारी, च़ाऐ सह मणछ हुऐ ज़ल्मां ओर्ही इज़राईली टोलीओ होए या तम्हां मांझ़ै बस्सअ द कुंण परदेसी होए।

17 "ज़ै कुंण मणछ होरी मणछा मारी पाए, तेऊ लै बी आसा मौते सज़ा,✝24:17 लुआ. 21:12; मोत्त. 5:21 18 ज़ै कुंण कहा होरीए डागै-धणा मारे, तेऊ लागणअ तेते बदल़ै तिहअ ई डागअ-चैणअ बापस दैणअ। 19 ज़ै कुंण कहा होरी लै बाही ज़खम करे, तेता लै करनअ तिहअ ई ज़खम तेऊ लै बी, 20 हाडकै चोल़णैं आल़ैओ पाऐ हाडकअ चोल़ी, आछिए बदल़ै आछ अर दांदे बदल़ै दांद।✝24:20 लुआ. 21:23-25; बधा. 19:21; मोत्त. 5:38

21 "इहअ सका हई बी कि डागै मारनै आल़अ दैए तेते मालका लै तिहअ ई डागअ बापस, पर ज़ै कुंण कहा मणछा मारे, तेते सज़ा आसा तेऊए मौत ई।

22 "हुंह आसा थारअ परमेशर बिधाता, मेरअ बधान आसा दुही लै एक्‍कै ज़िहअ, च़ाऐ तम्हैं इज़राईली होए, च़ाऐ तम्हां मांझ़ै बस्सअ द परदेसी होए।"✝24:22 गण. 15:16

23 ज़ांऊं मोसा सोभी इज़राईली का इना गल्‍ला खोज़ी मुक्‍कअ, लोगै किअ तिहअ ई ज़िहअ बिधाता मोसा का खोज़अ त, तिन्‍नैं पाअ सह बिधाता लै फिटक दैणैं आल़अ पात्थरो ढो दैई मारी।