लेबी बधान 4

पापो प्राश्त करनैओ बधान

1 तेखअ बोलअ बिधाता मोसा लै इहअ, 2 "इज़राईली मणछा लै बोल इहअ, ज़ै तम्हैं भूला-बिस्सरा बी किज़ै इहअ काम किअ होए, ज़ेता लै मंऐं बिधाता तम्हां लै नांह आसा किई दी, तेऊ पापे प्राश्त करना लै करै पाप बल़ी।

माहा प्रोहते भलै हुऐ दै पापो प्राश्त

3 "ज़ै अभिषेक किऐ दै*4:3 अभिषेक किऐ दै माहा प्रोहत प्रोहते भलै पाप हआ, तेऊ पापो दोश लागा सोभी लोगा लै। तेता लै करै सह एक बाछ़ू मुंह बिधाता लै पाप बल़ी ज़ेथ किछ़ै खोट निं होए। 4 प्रोहत आणै तेऊ बाछ़ू मेल़-ज़ोल़े खिम्भे प्रऊल़ी आजू मुंह बिधाता सेटा, संघा लाऐ तेऊए मुंडा प्रैंदै हाथ तेखअ करै तेऊ तिधी बल़ी। 5 संघा निंयैं सह तेतो धख लोहू मेल़-ज़ोल़े खिम्भा भितरी, 6 तेखअ छ़ल़िकै तेऊ लोहू आपणीं गुंठी लोहू दी डबेऊई करै पबित्र ज़ैगा मांझ़लै पल्दै पिछ़ू करारे मणशू बाखा मुंह बिधाता सम्हनै। 7 तेखअ लाऐ प्रोहत धख लोहू मुंह बिधाता सम्हनै धूप बेदीए च़ऊ कूंणे शींगा दी, बाकी लोहू पोछै मेल़-ज़ोल़े खिम्भे प्रऊल़ी सम्हनै हूम बल़ी करने बेदी हेठै पाऊआ दी। 8-10 तेखअ ज़िहअ मेल़-ज़ोल़े बल़ी करनैओ बधान आसा, तेही ई काढै प्रोहत तेऊ पाप बल़ीए बाछ़ूए आंजा फेरे च़र्बी, काल़ज़ै हेठे च़र्बी अर दुहै बुक्‍की काढै तेते च़र्बी संघी ज़ुदी। तेखअ करै तेतो बेदी दी हूम।

11,12 "पर तेऊ बाछ़ूए खाल, टूंड-मूंड, गोबरा संघी अर बाकी बाछ़ूओ सह सारअ मास्स निंयैं खिम्भे बसती बागै तैहा शुची ज़ैगा लै ज़िधी बेदीओ छ़ार शोटा, तैहा ज़ैगा नेल़ दहै तेखअ तेऊ बाछ़ू पठी।

सारी परज़ा लै पापो प्राश्त

13 "ज़ै सोभै इज़राईली भूला-बिस्सरा मुंह बिधातो हुकम नांईं मनी पाप करे, तिन्‍नां तेतो दोश होए, 14 तेखअ ज़ेभै सोभी टोली*4:14 टोली इज़राईली का थोघ लागे कि तिन्‍नैं किअ अह पाप, तेते पाप माफी लै करै तम्हैं एक बाछ़ू पाप बल़ी। तेऊ बाछ़ू आणै मेल़-ज़ोल़े खिम्भे प्रऊल़ी आजू, 15 तिधी लाऐ इज़राईली टोलीए सोभै सैणैं तेऊ बाछ़ूए मुंडा प्रैंदै आपणैं हाथ संघा करै तिधी तेऊ मुंह बिधाता सम्हनै बल़ीदान।

16 "प्रोहत निंयैं तेखअ तेतो धख लोहू मेल़-ज़ोल़े खिम्भा भितरी, 17 संघा छ़ल़िकै प्रोहत तेऊ लोहू दी आपणीं गुंठी डबेऊई करै मांझ़लै पल्दै पिछ़ू मुंह बिधाता सम्हनै करारे मणशू बाखा साता बारी। 18 तेखअ लाऐ धख लोहू मुंह बिधाता सम्हनै धूप बेदीए च़ऊ कूंणे शींगा दी, बाकी लोहू पोछै मेल़-ज़ोल़े खिम्भे प्रऊल़ी सम्हनै हूम बल़ी करने बेदी हेठै पाऊआ दी। 19-21 तेखअ काढै प्रोहत तेऊ बाछ़ूए च़र्बी संघा करै तेतो बेदी दी हूम। खिरी पाऐ बाकी मास्स तेते टूंड-मुंडा संघी बसती बागै बेदीए छ़ार शोटणें ज़ैगा पठी दहई ज़िहअ पाप बल़ी करनैओ बधान आसा। एऊ बल़ीदाना करै हणैं सोभी इज़राईली टोलीए पाप माफ।

इज़राईली सैणैं लै पापो प्राश्त करनैओ बधान

22 "ज़ै इज़राईलीए सैणैं मांझ़ै कुंण पाप करे, भूला-बिस्सरा तेऊए भलै इहै काम होए ज़ेता लै मंऐं बिधाता नांह आसा किई दी, सह आसा दोशी। 23 बादा का ज़ै तेऊ का थोघ लागे कि तेऊए भलै हुअ पाप! सह करै तेते प्राश्त करना लै छ़ेल्हू बल़ीदान ज़ेथ किछ़ै खोट निं होए। 24 अह हणअ पापो प्राश्त करना लै पाप बल़ी। सह लाऐ तेऊ छ़ेल्हूए मुंडै हाथ संघा करै तेऊ मुंह बिधाता सम्हनै हूम बल़ी करने बेदीए उतर दिशा बाखा बल़ीदान। 25 प्रोहत लाऐ पाप बल़ीए लोहू का आपणीं गुंठी करै हूम बल़ी करने बेदीए च़ऊ शींगा दी अर बाकी लोहू पोछै बेदीए पाऊआ दी। 26 तेखअ करै प्रोहत तेते च़र्बी काढी बेदी दी हूम, तिहअ ई ज़िहअ मेल़-ज़ोल़े बल़ी लै करा। संघा करै प्रोहत तिन्‍नें पापे बारै प्राश्त, इहअ करै हणअ तिन्‍नों पाप माफ।

आम मणछे पापो प्राश्त

27 "ज़ै तम्हां मांझ़ै कुंण आम मणछ भूला-बिस्सरा पाप करे, ज़ेता करना लै मंऐं बिधाता तम्हां लै नांह आसा किई दी, सह बी आसा दोशी।✝4:27 गण. 15:27,28 28 तेखअ ज़ांऊं तेऊ का थोघ लागे कि तेऊए भलै हुअ पाप! सह आणै तेऊ पापे प्राश्त करना लै बाकरी पाप बल़ी लै एही ज़ेथ किछ़ै खोट निं होए। 29 सह लाऐ तैहा पाप बल़ीए बाकरीए मुंडा प्रैंदै हाथ संघा करै हूम बल़ीदान करने बेदीए उतर दिशा बाखा बल़ीदान। 30 प्रोहत लाऐ तेते लोहू का आपणीं गुंठी डबेऊई करै हूम बल़ी करने बेदीए च़ऊ शींगा दी अर बाकी लोहू पोछै बेदीए पाऊआ दी। 31 तेखअ करै प्रोहत तेते च़र्बी काढी बेदी दी मुंह बिधाता खुश करना लै हूम ज़िहअ मेल़-ज़ोल़े बल़ी लै करा तिहअ ई। संघा करै प्रोहत तिन्‍नें पापे बारै प्राश्त, इहअ करै हणअ आम मणछो पाप माफ।

32 "ज़ै पापो प्राश्त करना लै पाप बल़ीए बाकरीए बदल़ै किज़ै मिम्मूं आणे, तै आणै गाभी ज़ेथ किछ़ै खोट निं होए। 33 तैहा गाभी आणै हूम बल़ी करने बेदी सेटा संघा डाहै तेसे मुंडा प्रैंदै हाथ संघा काटै तिधी पाप बल़ी। 34 प्रोहत लाऐ तेखअ तेते लोहू का आपणीं गुंठी डबेऊई करै हूम बल़ी करने बेदीए च़ऊ शींगा दी अर बाकी लोहू पोछै बेदीए पाऊआ दी। 35 तेखअ ज़िहअ मेल़-ज़ोल़े बल़ी किऐ दै गाभू लै करा, प्रोहत करै तेते च़र्बी काढी बेदी दी मुंह बिधाता खुश करना लै हूम, तेता संघै करै नाज़ बल़ी बी। संघा करै प्रोहत तिन्‍नें पापे बारै प्राश्त, इहअ करै हणअ आम मणछो पाप माफ।"