लेबी बधान 16

पाप माफीए महान धैल़ीओ बधान

1,2 हारणे शोहरू मांझ़ै दूई शोहरू नादाब अर अबीहू पाई धनैरै दी एही आग ज़ुंण बधाने साबै छ़ोतली थिई अर बिधाता पाऐ तिंयां दुहै मारी। तेखअ बोलअ बिधाता मोसा लै इहअ, "आपणैं भाई हारणा लै बोल इहअ, हुंह बिधाता हआ पबित्र ज़ैगा मांझ़लै पल्दै पिछ़ू करारे मणशू प्रैंदे प्राश्ते ढक्‍कणा आजू बादल़ा दी प्रगट। तैहा खास पबित्र ज़ैगा निं कज़ेभल़ी डेऊंदअ लागी, इहअ निं हआ कि तूह मरे।✝16:1-2 इब्रा. 6:19

3 "तैहा खास पबित्र ज़ैगा भितरी डेऊणैं का आजी लऐ तूह आपणैं पापो प्राश्त करना लै एक बाछ़ू पाप बल़ी अर एक गाभू मुंह बिधाता खुश करना लै हूम बल़ी करी।✝16:3 इब्रा. 9:7 4 तेता का आजी लऐ सह न्हैऊई संघा बान्हैं तिन्‍नां बाछे पबित्र झिकल़ै, ज़ांघिऐ, सदरी, साफै अर गाची संघी। 5 तेखअ आणै इज़राईली टोली मांझ़ै हारणा सेटा हूम बल़ी लै एक गाभू अर पाप बल़ी करना लै दूई छ़ेल्हू।

6 "हारण करै तेऊ बाछ़ू आपणैं अर आपणैं टबरे पापो प्राश्त करना लै पाप बल़ी।✝16:6 इब्रा. 5:3; 7:27 7 तेखअ आणै तिन्‍नां दूई छ़ेल्हू मुंह बिधाता सम्हनै मेल़-ज़ोल़े खिम्भे दुआरा आजू, 8 तिधी पाऐ तूह तिन्‍नां दुही छ़ेल्हूए परच़ी तेथ खोज़ूं हुंह कि मंऐं बिधाता कुंण छ़ेल्हू टांकअ आप्पू लै अर कुंण छ़ेल्हू दैणअ रेगीस्ताने अजाजेल राख्सा लै।

9 "तेखअ ज़ुंण परच़ी पैहलै निखल़े सह छ़ेल्हू हणअ मुंह बिधाता लै, तेऊ करै हारण पापो प्राश्त करना लै पाप बल़ी, 10 तेऊ दुजै छ़ेल्हू डाहै तेखअ मुंह बिधाता सम्हनै ज़िऊंदै, तेखअ छ़ेल़्है तेऊ रेगीस्ताना बाखा ताकि सह सोभी लोगे पाप आप्पू संघा निंए।

11 "पर हारण करै आपणैं अर आपणैं टबरे पापो प्राश्त करना लै तेऊ बाछ़ू ज़रूर पाप बल़ी। 12 तेखअ च़कै आपणैं हाथै धनैरअ, तेथ लोल़ी कांस्से बेदी का काढै दै ज़ल़दै नार हुऐ पाऐ दै, तेथ संघै आणै दूई मुठी खुशबूदार धूप बी, तेखअ एछै मुंह बिधाता सेटा मेल़-ज़ोल़े खिम्भा भितरी खास पबित्र ज़ैगा।✝16:12 इब्रा. 6:19 13 तिधी पाऐ तूह तेऊ धूपा धनैरै दी तिन्‍नां आगीए ज़ल़दै नारा प्रैंदै मुंह बिधाता सम्हनै, तेते धूँओ बादल़ लोल़ी प्राश्ते ढक्‍कणा प्रैंदै घोर्हुअ ज़ुंण शाजतीए पत्री प्रैंदै आसा।

14 "तेखअ छ़ल़िकै आपणीं गुंठी करै तेऊ बाछ़ूए लोहू का धख करारे मणशू प्रैंदै प्राश्ते ढक्‍कणा दी, तेखअ छ़ल़िकै मणशू आजू साता बारी।✝16:14 इब्रा. 9:7-13

15 "तेखअ करै हारण तेऊ छ़ेल्हू आम लोगे पापे प्राश्त करना लै पाप बल़ी, तेतो लोहू बी आणै मांझ़लै पल्दै भितरी खास पबित्र ज़ैगा, संघा छ़ल़िकै तेतो लोहू तिहअ ई प्राश्ते ढक्‍कणा प्रैंदै अर तेता सम्हनै ज़िहअ तेऊ बाछ़ूए लोहू करै किअ।✝16:15 इब्रा. 6:19; 7:27; 9:7-13; 10:4 16 इहअ करै करनअ ताह इज़राईलीए पापा लै प्राश्त ज़ेता करै इज़राईली मणछा अर पबित्र ज़ैगा छ़ोत लागा। ज़ुंण मेल़-ज़ोल़ो खिम्भ तिन्‍नां जैंदरी आसा, तेता लै बी करै तिहअ ई।

17 "ज़ेभै हारण पापे प्राश्त करना लै खास पबित्र ज़ैगा डेओए, तेभा पोर्ही ज़ेभै तैणीं आपणैं अर आपणैं टबरा संघी सोभी इज़राईली टोलीए पापे प्राश्त करी बागै निं एछी जाए, तेभै तैणीं निं कोहै मेल़-ज़ोल़े खिम्भा दी रही। 18 मेल़-ज़ोल़े खिम्भा भितरा का बागै निखल़ी करै कांस्से बेदी लै प्राश्त ज़ुंण बिधाता सम्हनै प्रऊल़ी आजू आसा। तेते च़ऊ कूणैं अर शींगा दी लेस्सै बाछ़ू अर छ़ेल्हूओ धख-धख लोहू दुहीओ। 19 तेखअ छ़ल़िकै आपणीं गुंठी करै बेदी दी लोहू साता बारी, संघा हणीं सह बेदी इज़राईलीए सोभी छ़ोता का पठी शुची अर पबित्र।

प्राश्तो छ़ेल्हू

20 "ज़ांऊं हारण खास पबित्र ज़ैगा, मेल़-ज़ोल़े खिम्भा अर कांस्से बेदी लै प्राश्त करी मुक्‍के, तेखअ आणै प्रऊल़ी आजू मुंह बिधाता सम्हनै तेऊ दुजै छ़ेल्हू ज़ुंण अज़ी ज़िऊंदअ आसा डाहअ द। 21 तेखअ लाऐ हारण आपणैं दुही हाथा तेऊ छ़ेल्हूए मुंडै, तेखअ मनै सह सोभी इज़राईलीए सारै पाप ज़ुंण तिन्‍नैं किऐ, तेखअ बझ़ैल़ै कहा मणछा का तेऊ छ़ेल्हू रेगीस्ताना बाखा छ़ेल़्हणै, इहअ करै हणैं सोभी लोगे पाप दूर।✝16:21 इब्रा. 10:4 22 खिरी डाहै तेऊ छ़ेल्हू किधी दूर शुन्‍नैं रेगीस्तानै छ़ेल़्ही, तेऊ छ़ेल्हू निंणअ सोभी इज़राईलीए पापो बोझ़ आप्पू संघै दूर।

23,24 "तेखअ डेओऐ हारण मेल़-ज़ोल़े खिम्भा भितरी, तेखअ ज़ुंण बाछे झिकल़ै बान्हीं सह खास पबित्र ज़ैगा डेऊअ त, तिन्‍नां खोल्है तिधी पोर्ही, संघा बान्हैं किधी पबित्र ज़ैगा न्हैऊई करै होर झिकल़ै ज़िहै घअरै धैल़ बान्हां। तेखअ करै बागै एछी मुंह बिधाता खुश करना लै हूम बल़ी अर आपणैं अर सोभी लोगे पापे प्राश्त करना लै पाप बल़ी।✝16:23-24 एज. 44:19

25 "तेखअ करै पाप बल़ीए च़र्बी कांस्से बेदी दी हूम।

26 "ज़ुंण मणछ तेऊ छ़ेल्हू दूर शुन्‍नैं रेगीस्तानै अजाजेल भूता लै छ़ेल़्ही आअ, सह लऐ बसती दी एछणैं का आजी न्हैऊई अर आपणैं झिकल़ै-टाल्है धोई। 27 पाप बल़ीए बाछ़ू अर छ़ेल्हूओ लोहू ज़ुंण खास पबित्र ज़ैगा लै निंयं त, तेता का ज़ुंण लोहू रहअ द होए तेता निंयैं बसती बागै संघा पाऐ तेते खाला, मास्स अर गोबरा संघी आगी जैंदरी दहई।✝16:27 इब्रा. 13:11 28 ज़ुंण बी तेता दहंदै होए, तिंयां बी लऐ तेखअ तेता बाद न्हैऊई अर आपणैं झिकल़ै धोई, तेखअ सका तिंयां बसती दी फिरी एछी।

पापे प्राश्त करने धैल़ी

29 "दसा काती डाहै तम्हैं हर साल ब्रत, तैहा धैल़ी करै तम्हैं भुखै रही आपणैं पापा लै शोग, तैहा धैल़ी निं कोहै किछ़ै काम करी, च़ाऐ तम्हां मांझ़ै बस्सअ द कुंण परदेसी मणछ बी किल्है निं होए रहंदअ लागअ द। अह बधान हणअ तम्हां लै सारी सदा लै।✝16:29 लेब. 23:26-32; गण. 29:7-11

30 "किल्हैकि ऐहा धैल़ी हणअ थारै पापे प्राश्त करना लै बल़ीदान करी मुंह बिधाता संघै मेल़-ज़ोल़। 31 अह धैल़ी आसा खास पबित्र धैल़ी, ऐहा धैल़ी डाहै ब्रत, ऐहा धैल़ी काम-काज़ बी निं किछ़ै करी। ऐहा धैल़ीओ बधान करै पोस्ती दर पोस्ती एऊ ई साबै पूरअ।

32 "ज़ुंण आपणैं बाबे ज़ैगा अभिषेक अर संस्कार हई आजू माहा प्रोहते पदबी दी होए, सह करै पापो प्राश्त करना लै बल़ीदान। सह बान्हैं तिन्‍नां बाछे पबित्र झिकल़ै, 33 तेखअ करै सह खास पबित्र ज़ैगा, मेल़-ज़ोल़े खिम्भ, कांस्से बेदी, होरी सोभी प्रोहता अर सोभी टोलीए लोगा लै बल़ीदान करी प्राश्त।

34 "एऊ बधाना करै तम्हैं सदा हर साल इहअ ई, अह आसा इज़राईलीए सोभी पापे प्राश्त करने महान धैल़ी।"

ज़िहअ बिधाता हुकम किअ त, मोसा अर हारणै किअ ठीक तिहअ ई।