लेबी बधान 7

दोश बल़ी करनैओ बधान

1 दोश बल़ी*7:1 दोश बल़ी कुआसणें किम्मत आसा पबित्र। तेतो बधान आसा इहअ, 2 ज़हा ज़ैगा हूम बल़ीओ पशू बल़ीदान करा, तैहा ई ज़ैगा काटै मुंह बिधाता खुश करना लै दोश बल़ीओ पशू बी। तेतो लोहू तरैल़ै कांस्से बेदी हेठै पाऊआ दी। 3 तेऊ पशूए सारी च़र्बी, मतलब आंजा फेरे च़र्बी, छ़तरी, 4 काल़ज़ै हेठे च़र्बी अर दुही बुक्‍की करै तेते च़र्बी संघी ज़ुदी। 5 तेखअ च़है तेता प्रोहता मांझ़ै एक ज़ण्हअ बेदी प्रैंदै, संघा करै मुंह बिधाता लै तेतो हूम। अह हणीं दोश बल़ी। 6 दोश बल़ी आसा खास्सी पबित्र, एता सका सिधै प्रोहत ई खाई। तिंयां खाऐ तेता कहा शुची ज़ैगा।✝7:6 1 करि. 10:18

7 "ज़िहअ पाप बल़ीओ बधान आसा, तिहअ ई आसा दोश बल़ीओ बधान बी। तेते शिखा सका सिधै तिंयां ई प्रोहत खाई ज़ुंणी तिंयां बल़ी करी तेतो प्राश्त किअ।

8 "ज़ुंण प्रोहत कहा लै हूम बल़ी करे, तेते खाल बी हणीं तेऊ ई प्रोहते, 9 ज़िहअ सह गेठै, बल़ाही या तऊई दी सटेऊई दी नाज़ बल़ी मुंह बिधाता खुश करना लै भैंट करा अर बाकी खाआ सह ई।✝7:9 लेब. 2:4,10; गण. 18:9; एज. 44:29 10 नाज़ बल़ी च़ाऐ तल़ी दी होए या गेठै सटेऊई दी होए, तिंयां लोल़ी हारणे खिंबे प्रोहता लै बराबर दैनी बांडी।

मेल़-ज़ोल़े बल़ी करनैओ बधान

11 "ज़ुंण मेल़-ज़ोल़े बल़ी करे तेतो बधान आसा इहअ, 12 ज़ै कुंण मुंह बिधातो शूकर करना लै मेल़-ज़ोल़े बल़ी करे, सह आणै तेता संघै भोज़न बी। तेता चाणै सोभी का बधिया कणके पिठै करै चिई रंगो, पर सज़ेल़अ निं तेथ पाई। तेला करै ल्हुशै दै रोट, लुच़ी, अर तेला जैंदरी सटेऊऐ दै आखरै रोटू। 13 तैहा मुल्है शूकर करने मेल़-ज़ोल़े बल़ी संघै आणै धख सज़ेल़ी रोटी बी बणाईं। 14 इना चिई रंगे रोटी मांझ़ै च़कै एक-एक रोटी मुंह बिधाता लै खास भैंट। अह हणीं तेऊ प्रोहते ज़ुंणी मेल़-ज़ोल़े बल़ीओ लोहू बेदी बागै छ़ल़िकअ।

15 "ज़ेभै तम्हैं मुंह बिधाता लै शूकर करनैओ बल़ीदान या मुखा बर्गत मांगणा लै मेल़-ज़ोल़े बल़ी करे तेते शिखा खाऐ तैहा ई धैल़ी। दुजै धैल़ै दोत्ती लै निं लोल़ी तेता का किछ़ै छ़ुटअ। 16 पर ज़ै तम्हैं मुल्है मानत होए मनी दी, सह बल़ीदान तम्हैं आपणीं मरज़ी दी होए दैनअ द, तेते शिखा सका तम्हैं दुजै धैल़ै लै बी खाणां लै डाही।

17,18 "पर ज़ै चिऊथै धैल़ै बी शिखा होए छ़ुटी दी, तेता पाऐ पठी दहई। ज़ै तम्हैं मेल़-ज़ोल़े बल़ीदाने शिखा चिऐ धैल़ै खाए, तेऊ बल़ीदाना निं हुंह मंदअ सह हणअ तम्हां लै किअ नां किअ एक्‍कै बराबर। तेता लै हणैं तम्हैं बूरै अर दोशी।

19 "नां कुंण एही शिखा खाई ज़ुंण छ़ोतली च़िज़ा करै छ़ुंहीं दी होए, तेता पाऐ पठी दहई। बाकी मेल़-ज़ोल़े बल़ीदाने ज़ुंण शिखा शुची होए अर ज़ुंण मुंह मनणै जोगी होए, तेता सका तम्हैं खाई। 20,21 पर ज़हा मणछा छ़ोतलै डागै, छ़ोतलै मणछ अर किज़ू छ़ोतलै ज़ीबा छ़ुंहीं करै छ़ोत होए लागी दी सह बी निं मुंह बिधाता लै मेल़-ज़ोल़े बल़ीए इना शिखा हेरे खाई। ज़ै कुंण तज़ी बी खाए सह निं आजू मेरै इज़राईली मणछा जैंदरी रहणैं जोगी आथी।"

लोहू अर च़र्बी ज़ुंण नांई लागा खाणीं

22 तेखअ बोलअ बिधाता मोसा लै इहअ, 23 "इज़राईली मणछा लै बोल इहअ कि नां बल्दे अर नां भेडा-बाकरीए च़र्बी खाई। 24 डागै-चैणैं मांझ़ै ज़ुंण आपणीं मौता मरे या कुंण बणें ज़ीबै होए खाऐ दै, तेते च़र्बी करै सका तम्हैं होर सोभै काम करी पर तेता निं खाई आथी। 25 ज़ै कुंण तिन्‍नां बल़ीदाने पशूए च़र्बी खाए ज़ेतो हूम मुंह बिधाता लै करा, सह निं आजू मेरै इज़राईली मणछा जैंदरी रहणैं जोगी आथी। 26 नां कहा पंछ़ी अर पशूओ लोहू खाई च़ाऐ तम्हैं किधी बी होए,✝7:26 मूल. 9:4; लेब. 17:10-14; 19:26; बधा. 12:16,23; 15:23 27 ज़ुंण लोहू खाए सह निं आजू मेरै इज़राईली मणछा जैंदरी रहणैं जोगी आथी।"

28 बिधाता बोलअ मोसा लै इहअ बी, 29,30 इज़राईली मणछा लै बोल इहअ कि ज़ुंण मुंह बिधाता का बर्गत मांगणा लै मेल़-ज़ोल़े बल़ी दैई हूम करे सह आणै तेता ई मांझ़ै मुल्है भैंट संघा डाहै तेता कांस्से बेदी दी। पर सह लऐ तेता का आजी तेऊ छ़ल़्है अर च़र्बी मुंह सेटा उझै च़की रगाऊई कि सह भैंट आसा मुल्है अर्पण। 31 हारणे खिंबे प्रोहता मांझ़ै करै एक ज़ण्हअ च़र्बी करै बेदी दी हूम, पर सह छ़ल़्हअ हणअ प्रोहतो भाग। 32,33 तैहा मेल़-ज़ोल़े बल़ीओ दैहणीं बाखो गुल़छ़ू हणअ तेऊ प्रोहतो भाग रगाऊंणे भैंट ज़ुंणी लोहू अर च़र्बी भैंट किई।

34 "मंऐं डाहअ इहअ बधान कि इज़राईली मणछ दैऐ मेल़-ज़ोल़े बल़ीए मेरै हूमा मांझ़ै सदा रगाऊंणे भैंट छ़ल़्हअ अर दैहणीं बाखो गुल़छ़ू प्रोहता लै ज़ुंण हारणे खिंबा का आसा 35 अर ज़ुंण मुंह बिधाता लै प्रोहते कामां करना लै अभिषेक आसा किऐ दै। 36 अह बधान रहणअ पोस्ती दर पोस्ती सदा लै इहअ ई। इहअ करना लै बोला हुंह बिधाता आप्पै।

37 "मुंह बिधाता खुश करना लै हूम बल़ी, नाज़ बल़ी, पाप बल़ी, दोश बल़ी, मेल़-ज़ोल़े बल़ी अर प्रोहते संस्कार करने बल़ीओ बधान आसा इहअ ई।"✝7:37 लेब. 6:9,14

38 ज़धू मोसा अर इज़राईली सीनाई धारा गोधै उज़र रेगीस्तानै थिऐ, तधू किअ बिधाता मोसा का हुकम कि इज़राईली करै बिधाता लै इना बल़ीदाने भैंट।