1-3 मेल़-ज़ोल़े खिम्भा दी किई बिधाता मोसा संघै गल्‍ला। तेखअ खोज़अ मणछा लै बल़ीदान करनैओ बधान।

बिधाता बोलअ तूह खोज़ इज़राईली का इहअ, "ज़ुंण बल़ी तम्हां मुंह खुश करना लै करनी, तेता करै बेदी दी पठी दहई करै हूम।

"इहै बल़ीदान करनैओ पशू लोल़ी डागै-चैणें हेल़्ही मांझ़ा का ई हुअ। हूम बल़ी करना लै सह पशू लोल़ी इहअ ज़ेथ किछ़ै खोट निं होए। तेता आणै मेल़-ज़ोल़े खिम्भे प्रऊल़ी आजू, तिधी जाणअ तम्हां का थोघ लागी कि मंऐं बिधाता सह मनअ कि नांईं। 4 आपणअ हाथ लाऐ तेऊ हूम बल़ीए पशूए मुंडै अर हुंह मनूं तेता तिन्‍नें पापो प्राश्त करनैओ बल़ीदान।

5 "ज़ांऊं सह बाछ़ू मुंह बिधाता सेटा बल़ी हेरनअ करी, तेखअ छ़ल़िकै हारणे शोहरू मांझ़ै एक ज़ण्हअ प्रोहत तेतो लोहू बेदीए च़ऊ कूणैं ज़ुंण मेल़-ज़ोल़े खिम्भे प्रऊल़ी आजू आसा।

6 "तेखअ काढै तेऊ हूम बल़ीए बाछ़ूए खाल पोर्ही, संघा करै तेते ठोर-ठोर। 7 तेखअ पाऐ हारण प्रोहते शोहरू बेदी दी आग संघा च़है तेथ हूम करने झ़ुका राम्बल़ै करै।

8,9 "तेऊ हूम बल़ी किऐ दै बाछ़ूए गुल़छ़ू अर धोऐ राम्बल़ै करै, तेखअ पाऐ तेता टूंड-मूंड, च़र्बी अर आंजा पोटा संघी बेदीए झ़ुका प्रैंदै। प्रोहते एऊ हूमे धूँआं करै हआ हुंह बिधाता खुश। 10 ज़ै तम्हैं चैणें हेल़्ही मांझ़ै गाभू या छ़ेल्हू हूम बल़ी करे, सह बी लोल़ी इहअ ज़ेथ किछ़ै खोट निं होए। 11 तेऊ निंयैं मुंह बिधाता सम्हनै बेदीए उतर दिशा बाखा, संघा करै तेऊ तिधी बल़ी। तेखअ छ़ल़िकै हारणे शोहरू मांझ़ै प्रोहत तेतो लोहू बेदी च़ऊ फेर।

12,13 "तेऊ हूम बल़ीए पशूए करै ठोर-ठोर संघा धोऐ तेते गुल़छ़ू अर राम्बल़ै करै। तेखअ पाऐ तेता टूंड-मूंड, च़र्बी अर आंजा-पोटा संघी बेदी प्रैंदै। प्रोहते एऊ हूमे धूँआं करै हआ हुंह बिधाता खुश।

14 "ज़ै तम्हैं हूम बल़ी लै च़ेल्‍लू-पखीरू बल़ी करे, सह लोल़ी सिधअ कबूतर या पालल़ी हुई। 15 प्रोहत निंयैं तेता कांस्से बेदी सेटा संघा काढै तेतो कैल़अ मरोक्‍की करै पोर्ही। तेते मुंडकी पाऐ बेदी दी अर तेतो लोहू छणेरै बेदी फेर, 16 बाकी शोटै तेता अर फैंखा संघी* बेदीए पुर्बा बाखा छ़ारा शोटणें ज़ैगा। 17 खिरी लिरै तेता फैंखा मांझ़ा-मांझ़ी, पर तेता निं ज़ुदै-ज़ुदै करी। तेखअ पाऐ प्रोहत तेता बेदीए आगी जैंदरी। एऊ हूमे धूँआं करै हआ हुंह बिधाता खुश।"