लेबी बधान 10

नादाब अर अबीहू

1 हारणे शोहरू मांझ़ै थिऐ दूई शोहरू नादाब अर अबीहू, तिन्‍नैं च़कै आपणैं-आपणैं धनैरै संघा पाऐ तेथ ज़ल़दै नार अर तेथ प्रैंदै पाअ धूप, संघा किअ सह बिधाता लै अर्पण। पर सह आग नांईं ती शुची आथी, इहअ करना लै थिई बिधाता नांह किई दी। 2 हेरा-हेरी छ़ाडै बिधाता तिधी तिन्‍नां लै ज़ल़दी आगीए लुपल़ै अर तिंयां हुऐ तिधी बिधाता सम्हनै आगी करै दझ़ी खतम।

3 तेखअ बोलअ मोसा हारणा लै, "अह हुई सह ई गल्‍ल ज़ुंण बिधाता बोली ती,

‘हुंह च़ाहा इहअ कि

मुंह नेल़ एछणैं आल़ै

प्रोहत मुंह पबित्र मनी अदर करे

मुंह करनअ आपणअ धुप्पअ

मेरी आपणीं परज़ा लै प्रगट।’"

4 तेखअ शादै मोसा मिशेल अर एलीसापान ज़ुंण हारणे च़ाच़ू उज्जीएले शोहरू थिऐ, संघा बोलअ तिन्‍नां लै इहअ, "इना आपणैं भाईए शोहरूए ल्हासा निंयां पबित्र ज़ैगा का खिम्भे बसती बागै।"

5 ज़िहअ मोसा बोलअ तिन्‍नैं किअ तिहअ ई अर तिन्‍नैं निंईं तिन्‍नें ल्हासा तिन्‍नें प्रोहते झिकल़ै संघी बसती बागै दूर।

6 तेखअ बोलअ मोसा हारणे दूई होरी शोहरू एलीआजर अर ईतामारा लै, "तम्हैं निं आपणैं मुंडे शराल़ खुल्है डाही अर नां आपणैं प्रोहते काम करने झिकल़ै धेल़ी, इहअ निं हआ कि तम्हां लै बिधातो कोप एछे अर तम्हैं चिहै मरे अर सोभी लोगा आफ़त पल़े। इज़राईली टोलीए सोभै लोग आसा थारै भाई-बंध, तिंयां करै मखाण पाई तिन्‍नां लै शोग ज़ुंण बिधाता आगी करै दहई मारै। 7 पर तम्हैं निं मेल़-ज़ोल़े खिम्भा बागै डेऊई आथी, इहअ निं हआ कि तम्हैं बी मरे किल्हैकि तम्हैं आसा बिधाता आप्पू लै छ़ांटै दै प्रोहत।"

ज़िहअ मोसा बोलअ, हारणे तिन्‍नैं दुही शोहरू किअ तिहअ ई।

प्रोहता लै खास गल्‍ला

8 तेखअ बोलअ बिधाता हारणा लै, 9 "ज़ेभै तूह अर तेरै शोहरू मेल़-ज़ोल़े खिम्भा भितरी एछे, तेभै निं तम्हैं शूर-शराब झुटी। ज़ै तम्हैं इहअ करे, तेभै निं तम्हैं ज़िऊंदै रहणैं। एऊ बधाना डाहै पोस्ती दर पोस्ती आद। 10 इहअ करै हुअ तम्हां तिन्‍नां गल्‍ला दी फरक करनअ शिखल़णअ कि मुंह बिधाता लै किज़ै पबित्र आसा अर किज़ै नांईं अर किज़ै शुचअ आसा अर छ़ोतलअ किज़ै आसा। 11 इज़राईली मणछा का बी डाहै तिन्‍नां बिधी खोज़ी ज़ुंण मंऐं बिधाता मोसा का आसा डाही दी खोज़ी।"

12 तेखअ बोलअ मोसा हारण अर तेऊए शोहरू एलीआजर अर ईतामारा का, "बिधाता लै शूकर करना लै किऐ दै नाज़ बल़ीए हूमा का ज़ुंण बाझ़ी सज़ेल़ेओ भोज़न आसा रहअ द, तेता खाआ बेदी सेटा किल्हैकि अह आसा खास पबित्र।✝10:12 लेब. 6:14-18 13 किल्हैकि बिधाता आसा मुखा इहअ बोलअ द कि ज़ुंण हूमा का तेरअ अर तेरै शोहरूओ भाग आसा, सह लोल़ी पबित्र ज़ैगा ई खाअ। 14,15 पर ज़ुंण च़र्बीए हूमा का छ़ल़्हअ अर दैहणीं बाखो गुल़छ़ू बिधाता सम्हनै उझै रगाऊई भैंट आसा किअ द, तेता खाऐ आपणैं सोभी टबरा संघै शुची ज़ैगा। ईंयां च़िज़ा आसा इज़राईली बिधाता का बर्गत मांगणा किऐ दै मेल़-ज़ोल़े बल़ी का थारअ अर थारै शोहरू-माठैओ हक। बिधाता आसा अह हुकम किअ द अर अह सूल रहणअ पोस्ती दर पोस्ती सदा लै इहअ ई।"✝10:14-15 लेब. 7:30-34

16 तेखअ लागअ मोसा ओर्ही-पोर्ही भाल़ी पुछ़दअ पाप बल़ी किअ द गाभू किधी आसा, ज़ांऊं तेऊ का थोघ लागअ कि सह हेरअ बेदी दी दहई, तेऊ आई हारणे शोहरू एलीआजर अर ईतामारा लै रोश्शै संघा बोलअ तिन्‍नां लै इहअ, 17 "तम्हैं किल्है निं तेतो मास्स पबित्र ज़ैगा खाअ? अह पाप बल़ीओ बल़ीदान आसा पबित्र, अह दैनअ बिधाता तम्हां लै एते तैणीं कि तम्हैं इज़राईलीए सोभी टोलीए पाप-दोशा लै प्राश्त करे।✝10:17 लेब. 6:24-26 18 भाल़ा! तम्हैं कै कबध किअ, तेतो लोहू निं पबित्र ज़ैगा भितरी निंयं ई आथी! मंऐं बोलअ तम्हां लै कि शिखा खाऐ पबित्र ज़ैगा अर तम्हैं हेरअ सह तेभी बेदी दी दहई!"

19 तेखअ दैनअ हारणै मोसा लै तेतो इहअ ज़बाब, "आझ़ किई मेरै दूई शोहरू पाप बल़ी अर बिधाता खुश करना लै हूम बल़ी, ऐबै भाल़ मुल्है केही आफ़त आई! ज़ै आझ़ हुंह पाप बल़ीए शिखा खांदअ, सह कै बिधाता सम्हनै राम्बल़ी गल्‍ल हणीं ती?"

20 हारणे अह गल्‍ल मनी मोसा बी।