Rute 4

बोआज़ै किअ रूता संघै बैह

1 बोआज़ डेऊअ नगरीए प्रऊल़ी सेटा ज़िधी झाल़अ करा, संघा बेठअ तिधी। तेखअ शादअ बोआज़ै एलीमोलको सह सोभी का खास टबर ज़सरै बारै तेऊ गल्‍ला किई ती, सह बी आअ तिधी अर बोआज़ै बोलअ, "मेरै साथी इधी बेश।" सह बी आअ संघा बेठअ तिधी। 2 तेखअ शादै बोआज़ै नगरीए दस सैणैं, तिन्‍नां लै बी बोलअ तेऊ तिधी बेशणा लै। ज़ांऊं तिंयां तिधी बेठै, 3 तेखअ बोलअ बोआज़ै तेऊ खास टबरा लै, "नाओमी आसा मोआब देशा का फिरी आई दी, सह च़ाहा म्हारै टबरा बाखे भाई एलीमोलके ज़िम्मीं मांझ़ै धख बेच़णीं। 4 तै ज़ाणअ मंऐं इहअ कि हुंह लऊं ऐहा गल्‍ला ताखा पुछ़ी। ज़ै तूह बोला, तै लअ तेता इना सैणैं नदरी मोलै। ज़ै करा तूह नांईं, तैबी बोल, किल्हैकि कुआसणेंओ हक निं ताह सुआई कोही आथी अर ताह बाद आसा सिधअ मुखा।"

तेऊ खास टबरै बोलअ, "हुंह कुआसूं एता आप्पै।"✝4:4 बधा.

5 तेखअ बोलअ बोआज़ै, "ज़ै तूह नाओमी का ज़िम्मीं कुआसे, तै हुई ताह मोआब देशा का आई दी रूता संघै बी बैह करनअ ज़ुंण बिधबा आसा। ताकि सह आपणैं मूंऐं दै मर्धा लै लुआद पैईदा करे अर तैहा ज़िम्मीं दी तेऊ मूंऐं दै मणछो नाअं रहे।"

6 तेखअ बोलअ तेऊ खास टबरै, "ज़ै इहअ आसा, तै निं हुंह ऐहा ज़िम्मीं कुआसी सकदअ, एता करै पल़णअ मेरी आपणीं ज़ैदाता बी फरक। एता का कुआस मुंह बाखा तूह आप्पू लै, मंऐं निं लाई अह ज़ैगा कुआसी।"

7 तेऊ ज़मानै त इज़राईली मांझ़ै ज़िम्मीं कुआसणैं अर बदल़ै करनैओ इहअ रबाज़ कि बेच़णैं आल़अ दैआ त आपणैं खूरो पोलल़अ तेऊ मोलै लणैं आल़ै लै। इहअ करै हआ ती तिन्‍नां मांझ़ै सह गल्‍ल पाक्‍की।✝4:7 लेब.

8 तैही ज़ांऊं तेऊ एलीमोलके खास टबरै इहअ बोलअ, "एता कुआस तूह ई।" तेऊ खोल्हअ आपणैं खूरो पोलल़अ संघा दैनअ बोआज़ा लै।

9 तेखअ बोलअ बोआज़ै तिन्‍नां नगरीए सैणैं अर तिधी आऐ दै सोभी लोगा लै, "तम्हैं सोभै आसा ऐहा गल्‍ले शाजत किई मंऐं कुआसी आझ़ नाओमी का सारी ज़ैदात ज़ुंण एलीमोलक अर तेऊए दूई शोहरू कलोन अर मलोने थिई। 10 एता का लाऊआ, मोआब देशा का आणी दी रूत ज़ुंण मलोने बिधबा आसा, सह बी कुआसी मंऐं आप्पू लै कि आझ़ा पोर्ही आसा सह मेरी बेटल़ी, ताकि सह आपणैं मूंऐं दै मर्धा लै लुआद पैईदा करे अर तेऊ तैहा ज़िम्मींओ मालक बणांए। इहअ करै निं तिन्‍नें आपणैं टबरा जैंदरी अर आपणीं नगरी दी अत्री हणीं। इना गल्‍ले शाजत आसा आझ़ तम्हैं सोभै।"

11 तिन्‍नैं नगरीए सैणैं अर तिधी सोभी आऐ दै बोलअ, "हाम्हैं आसा ऐहा गल्‍ले शाजत। ज़ुंण बेटल़ी तेरै घअरै आई, तैहा लै लोल़ी बिधाता राहेल अर लिआ ज़ेही बर्गत दैनी ज़ुंणीं इज़राईला लै खास्सी आद-लुआद दैनी। तूह लोल़ी एप्रात*4:11 एप्रात एप्रात थिअ फिरिस टोलीओ प्रोढअ अर बोआज़ बी थिअ तैहा ई टोलीओ टोली दी सेठ अर बेतलेम नगरी दी मशूर हुअ।✝4:11 मूल. 35:19,23-26 12 ऐहा ज़ुआन बेटल़ी का बिधाता ताल्है ज़ुंण लुआद दैए, सह लोल़ी यहूदा अर तामारे शोहरू फिरिसे*4:12 फिरिसे अह त यहूदे आद-लुआदा मांझ़ै बोआज़ अर कई होर ज़ुंण बेतलेम नगरी तै बस्सै दै। खिंबा ज़िहअ हुअ।"✝4:12 मूल.

बोआज़ अर रूता का आजू लुआद

13 इहअ करै किअ बोआज़ै रूता संघै बैह अर सह हुई तेऊए बेटल़ी। बिधाता दैनी तैहा लै एही बर्गत कि सह हुई सुंदी अर तेखअ हुअ तेसो एक शोहरू।✝4:13 मूल. 14 नगरीए होर बेटल़ी लागी नाओमी लै इहअ बोल्दी, "बिधाता दैनी ताल्है बर्गत! तेऊ दैनअ ताल्है आझ़ पोचअ कि सह तेरी हेर-सभाल़ करे। अह शोहरू लोल़ी त इज़राईला दी खास्सअ मशूर हुअ!✝4:14 लूक. 15 तेरी नुश झ़ूरा ताल्है खास्सी, ऐहा किअ ताल्है साता शोहरू हणैं का बी खास्सअ। ऐहा दैनअ ताल्है पोचअ ज़ेता करै ताह नऊंईं ज़िन्दगी भेटी अर बुढल़दा हणअ अह तेरी फाज़त करनै आल़अ।"✝4:15 1 शमू.

16 नाओमी च़कअ सह शोहरू उझै संघा लाअ आपणीं हिक्‍का दी, संघा रही तेऊ शोहरू धाचदी लागी।

17 होर बेटल़ी ज़ुंण ओर्ही-पोर्ही संघा रहा ती, तिन्‍नैं डाहअ तेऊ शोहरू नाअं ओबेद*4:17 ओबेद मतलब आसा दास, तैहा डाहअ तेऊ नाओं इहअ सोठी ओबेद कि एऊ करनी आपणीं दादी नाओमीए च़ाकरी। तिंयां बोला ती सोभी का, "नाओमीओ हुअ भाऊ!"

ओबेद त ईशैईओ बाब अर राज़ै दाबेदो दादू।

18 फिरिसो खिंब आसा अह: फिरिसो शोहरू त हिस्रोन,✝4:18 1 इति. 2:4; 1:3 19 हिस्रोना का हुअ राम अर रामा का हुअ अमीनादाब, 20 अमीनादाबो हुअ आजू नहशोन अर नहशोनो हुअ सलमोन, 21 सलमोना का हुअ बोआज़ अर बोआज़ा अर रूता का हुअ ओबेद, 22 ओबेदा का हुअ ईशैई अर ईशैईओ शोहरू त राज़अ दाबेद।