1 अह च़िठी आसा याकबा बाखा ज़ुंण परमेशर अर प्रभू ईशू मसीहो दास आसा,

हुंह लिखा ऐहा च़िठी तिन्‍नां मसीहा ईशू दी विश्वास करनै आल़ै यहूदी "बारा गोत्रा" लै ज़ुंण सारै संसारै छिंघुई करै रहा,

तम्हां सोभी लै मेरी लै राज्ज़ी-खुशी।

2 हे मेरै भाई-बैहणीओ, ज़ेभै तम्हैं कई रंगे मसीबता दी पल़ा, एता समझ़ा खुशीए गल्‍ल। 3 किल्हैकि तम्हां का आसा थोघ कि ज़ेभै थारै विश्वासा परखा, तेता करै बझ़ा तम्हां दी सबर।

4 हर गल्‍ला दी शिखल़ा सबर करनअ ताकि तम्हैं आत्मां दी पाक्‍कै अर नर्दोश हई थारै च़ाल-च़लणा दी किछ़ू गल्‍ले काम्मी नां रहे।

5 पर ज़ै तम्हां मांझ़ै कहा का अक्लीए काम्मी होए, तेता मांगा परमेशरा का, सह निं तम्हां लै रोश्श करदअ कि तम्हैं किल्है मांगअ पर सह दैआ सोभी लै खुशी-खुशी।

6 पर मांगा विश्वास डाही करै तेता लै निं बैहम करी किल्हैकि बैहम करनै आल़अ हआ धारा प्रैंदै लागी दी कैली ज़िहअ ज़ुंण बागरी करै ओर्ही-पोर्ही रहा ढुल़दी लागी। 7 इहअ मणछ निं इहअ समझ़ी कि मुंह प्रभू का किज़ै भेटे। 8 किल्हैकि सह मणछ आसा दोगल़अ अर सह निं आपणीं कोही गल्‍ला दी टेक्‍की रहंदअ।

9 ज़ुंण विश्वासी भाई गरीब आसा तिंयां रहै खुश। परमेशर करा तिन्‍नों अदर। 10 ज़ुंण विश्वासी सेठ आसा तिंयां बी रहै खुश किल्हैकि परमेशरै निं तम्हैं घमंडी डाहै। संसारे सेठ मणछे ज़िन्दगी हणीं घाहे फूला ज़ेही खतम। 11 किल्हैकि सुरज़ा निखल़णैं का बाद पल़ा चटाक धुप्पअ अर घाहा दैआ सह शकेऊई, अर तेतो फूल अल़ा धरनीं, संघा तेते शोभा बी हआ खतम। ठीक इहै ई हणैं सेठ बी ढब्बै खटदी-खटदी खतम।✝

12 परमेशर दैआ तेऊ मणछा लै बर्गत ज़ुंण खरी दी पाक्‍कअ रहा, किल्हैकि तेऊ भेटणअ पाक्‍कै रही सदा रहणैं आल़ी ज़िन्दगीओ सह मुगट, ज़ेते करार परमेशरै तिन्‍नां लै आसा किई दी ज़ुंण तेऊ संघै झ़ूरी डाहा। 13 ज़ेभै कुंण परखा दी पल़े, सह निं इहअ बोली, "परमेशर आसा मुंह परखदअ लागअ द।" किल्हैकि नां कुंण बूरी गल्‍ला करै परमेशरा परखी सकदअ, अर नां सह आप्पू कहा परखदअ आथी।

14 अह आसा म्हारी आपणीं सोठ ज़ुंण हाम्हां का बूरै काम कराऊआ। ज़ेभै हाम्हां पाप करने सोर फिरा, सह पाआ हाम्हां कबाता। 15 तेखअ करा तिन्‍नें बूरी सोठ पाप करना लै मज़बूर, अह सोठ रहा तिन्‍नें मन्‍नें तेभै तैणीं पल़ी ज़ेभै तैणीं तिंयां बरैबाद नां होए। तेखअ ज़ांऊं बूरी च़ाहा कठा हआ, तेता का हआ पाप पैईदा। ज़ांऊं पाप खास्सअ हआ, तेतो फल भेटा संसारे देही अर आत्मां दुहीए मौत। मतलब कि एक पापी हआ परमेशरा का सदा लै दूर।

16 मेरै पैरै बैहण-भाईओ, धोखै दी निं रही। 17 किल्हैकि हरेक शोभलअ बरदान अर हरेक शुचअ दान एछा म्हारै बाब परमेशरा का ज़ुंणी सरगे सोभै प्रैश्शै दैणैं आल़ै तारै बणाऐं। सह निं बदल़दअ अर नां फेर फिरी करै छ़ैल्‍ली ज़िहअ एछदअ डेऊंदअ रहंदअ। परमेशर आसा हर बगत भलअ। 18 तेऊ दैनी आपणीं मरज़ी दी हाम्हां लै आपणैं शुचै बैणा करै ज़िन्दगी, ताकि हाम्हैं तेऊ बणाईं दी सोभी च़िज़ा मांझ़ै खास होए।

19 मेरै पैरै भाईओ, ऐहा गल्‍लो आसा तम्हां का थोघ, तैही रहै हरेक मणछ शुणना लै आजू अर बोल़णा लै पिछ़ू अर धखी का निं रोश्शै आणनीं। 20 किल्हैकि ज़ेभै मणछ रोश्श करा सह निं तेऊ धर्मां पूरै करदअ ज़ुंण परमेशर च़ाहा। 21 तैही करा मन्‍नें बूरै सभाब, ज़ीद-मिश अर घमंड दूर करी मना परमेशरो बैण, ज़ुंण थारै दिला दी आसा बऊअ द अर ज़ुंण थारी आत्मां लै उद्धार दैई सका।

22 तम्हैं निं सिधै परमेशरै बैण शुणनै आल़ै रहा, पर तेऊ साबै ज़िऊआ आपणीं ज़िन्दगी बी। नांईं ता तम्हैं आसा आप्पू लै धोखै दैंदै लागै दै कि परमेशरा हेरनै तम्हैं बच़ाऊई। 23 किल्हैकि ज़ुंण बी परमेशरे बैणा शुणनै आल़अ आसा, अर तेऊ साबै काम नांईं करदअ, सह आसा तेऊ मणछा ज़िहअ ज़ुंण आपणअ मुंह आर्शू दी भाल़ा 24 अर आपणअ मुंह भाल़ी लागा सह हांढदअ तेतरी जाआ सह तेभी बिस्सरुई कि सह किहअ त। 25 पर ज़ुंण मणछ परमेशरे तेऊ बधाना दी धैन दैए ज़ुंण सोभी आज़ाद करा अर ज़िहअ परमेशरो सह बधान बोला तिहअ ई करदअ रहे अर ज़ुंण बैण तेऊ शूणअ तेता आद डाहे, एता लै भेटणीं तेऊ परमेशरा का बर्गत।

26 ज़ै कुंण आप्पू लै धर्मीं भगत बोला, अर आपणीं ज़िभा बशै निं डाहे, सह दैआ आप्पू लै धोखअ अर तेऊए च़ाकरी निं किछ़ू कामें आथी।✝

27 म्हारै बाब परमेशरा का शुझिआ धर्म इहअ कि छ़ुटै-मुक्‍कै दै अर बिधबा बेटल़ीए करनी तिन्‍नें खरी-अऊखी मज़त। आप्पू रहै संसारे हर पाप करनै का दूर रही नर्दोश।