विश्वास अर कर्म
14 हे मेरै भाई-बैहणीओ, ज़ै कुंण इहअ बोला कि मुंह आसा मसीहा दी विश्वास पर होरी लै भलै काम निं करदअ, तेतो निं किछ़ै फाईदअ! इहअ विश्वास निं कधि उद्धार करी सकदअ। 15 ज़ै कुंण विश्वासी भाई या बैहण नांगै बल़िंगै होए, अर तिन्नां का बैल़ी-क्लारी खाणां लै नांईं होए, 16 अर तम्हां मांझ़ै कुंण इहअ बोले कि शांती दी डेओआ, अर नैत्तै-तात्तै रहा अर रज्ज़ी खाआ-पिआ! पर ज़ुंण च़िज़ा देही लै ज़रूरी आसा अर तिन्नां नांईं दैए, तै किज़ै फाईदअ हुअ?
17 तिहअ ई ज़ै विश्वास करनै आल़अ भलै काम नांईं करदअ ता, तै आसा तेऊओ विश्वास मूंअ द।
18 कई सका इहअ बोली, "तूह करा विश्वास, पर हुंह करा तेते साबै भलै काम।" पर हुंह बोला तम्हां लै इहअ, "तम्हैं आपणअ विश्वास किहअ करै सका रहैऊई ज़ै कि तम्हैं भलै काम; करदै निं? पर मुंह रहैऊंणअ तम्हां का भलै काम करी आपणअ विश्वास।"
19 ज़ै थारअ इहअ विश्वास आसा कि परमेशर आसा एक्कै ई, ठीक बोलअ तम्हैं! भूत बी करा विश्वास अर तिन्नां बी लागा परमेशरे डरै काम्मणीं। 20 पर ओ ऐडै मणछा, ताखा कै इहअ बी थोघै निं आथी कि भलै काम किऐ बाझ़ी आसा विश्वास बृथा?
21 ज़धू म्हारै दाद-बाब आबरामै आपणअ शोहरू इसहाक बेदी दी बल़ी करना लै डाहअ, सह कै तेऊ भलै काम करी निं बणअ धर्मीं?2:21 मूल. 22:9
22 तंऐं हेरअ भाल़ी कि तेऊ किअ विश्वास अर तेऊ ई साबै भलै काम बी किअ अर भलै काम करी हुअ तेऊओ विश्वास पाक्कअ। 23 पबित्र शास्त्रो अह बैण हुअ पूरअ, "आबरामै किअ परमेशरा दी विश्वास अर तेऊ शूणअ तिहअ ज़िहअ तेऊ बोलअ अर अह गणअ तेऊ लै धर्म इधी तैणीं कि तेऊ लै बोलअ परमेशरो साथी।"2:23 मूल. 15:6 24 तै हेरी तम्हैं अह गल्ल भाल़ी कि मणछ निं सिधअ विश्वास करी धर्मीं हंदअ पर तेऊ लागा भलै काम बी करनै।
25 एही ई राहाब कंज़री बी, ज़धू तैहा गुप्त दूता लै आपणैं घअरै आसरअ दैनअ अर कहा होरी बाता बाती काढै तिंयां बागै, तेसे तेऊ भलै कामां करनै करै मनी सह धर्मीं।2:25 इब्रा. 11:31
26 ज़ेही देही शाह बाझ़ी मूंईं दी आसा, तिहअ ई आसा विश्वास बी भलै कामां बाझ़ी मूंअ द।