1 Mii Paolo, namitheko a Nlhuku ni karumiya a Yesu Kuristo kinoolhepa.

Mii kihothanlhiya ni urumiya kirwee kaahelhe nrima attu athanlhiye ni Nlhuku ni waaholhelha attu achuwelhe ikeekhene wiira akhalhe iphiro chinothanana awe Nlhuku. 2 Yeyo ikeekhene iyo phi nonikhulhuvelhiha upatta ukumi wo mahuku o uhimalha, waalhehiye ihu ni Nlhuku hinoothacha toka machokholhelho, ilhapo ihinaya wuupiya. 3 Ni ikatema yoombone yaayeke ahopatakulha nttenga awe. Nkakaarumiya mii wiira kivire kaahimiacha wo ulheheriya ni Nlhuku Moopolhi ihu.

4 Kinolhepa iwarakha iwe wa inyu Natito, anaaka o ikekhiaye munrimani munopisha ihu.

Kinoulhapelhelhani nnema ni mpuha ukhuma wa Nlhuku Athumwanihu, ni wa Kuristo Yesu Moopolhi ihu.

5 Phi nlhatu etu no uhiyani Ukirete wiira nrehelhelhe vakittu vawukuwilhe, ni waathanlha manyaashulhupalhe akhalhe manyaahoolhelhi o milhoko cha attu anonrumelhelha Kuristo kila iwani. Tho, muupuwelheke thoko chenre aka wo ulheherani. 6 Wiira, ashulhupalhe ahoolhelhi o nlhoko wa attu anonrumelhelha Kuristo anophwanelhiya ukhalha attu o uhikhuwachiya, akhalheke nlhopwana a nthiyana mmoka ni achishaana awe akhalheke anonrumelhelha Kuristo, ahikhalhe o uhiiwa aamukiaka ama o tiyamaru. 7 Ukhalhawaya attu anoshunga nlhoko wa attu anonrumelhelha Kuristo phi o ipilhi yo weemelhelha mitheko cha Nlhuku. Paahi etu, hikhalhe ntu o ukhuwachiya ama o wiititihacha, mena hikhalhe ntu o uhipicha uthunalha, ama ntu o uhapalhiya, ama ntu o indewo, ama ntu o nlhulha wo uttuna nchurukhu chinene. 8 Nansho akhalheke ntu o waapochera alheto ni ntu o uttuna upanga chittu choombone. Akhalheke ntu o wiichaamuka, ntu e ikekhiaye, ntakatifu hinokhuwachiya ni ntu neetawara mwanene. 9 Akhalheke ntu novarechesha rata nttenga wo ukhulhuvelhiya, thoko chinre awe wo wiittuchihiya wiira oorie waahelha nrima attu wo weettuchiha meettuchiho o ikeekhene ni wookokolha attu anovaanyiha.

10 Ukhalhawaya ahaawo attu anovaanyiha ni waathepiacha attu akina chittu chihiri ni irusho, athepaka alhe akhumme iphiro cha attu enelhiye unyawo munrimani, Ayahudi anrumelhenlhe Kuristo alhe. 11 Amaalhihiyeke yayo attu ayo ukhalhawaya naahiyaka anoothepa waapitikusha nrima attu mmanupani mwonkhaye vaneettuchiha aya chittu chihinooria aya wiittuchiha. Anopangacha chiicho wiira apatte nchurukhu wo wiittuchiha chittu cho wulhiha muru. 12 Ata ntu mmoka mmilhokoni mwa anamilhohi aya, ahoolhumacha wiira, "Attu o Ukirete mahuku onkhaye arii attu o woothacha, ari thoko mashene, attu o ureshi ni attu o nlhulha!" 13 Ni uyo hohimiechesha we ikekhiaye. Ni wo yoyo nlhatu uyo etu, mwaachacheracheke chinene, upisha nrima waya ulhipeke. 14 Ahiyeke wiiwelhelha ithelhi cha Ayahudi mena ahiiwelhelhe malhehero yeeshiye ni attu akhonte ikeekhene.

15 Kila ittu iri yorera wa attu orera nansho khiiwo ittu iri yoombone wa attu o nyalha ni o nrima uhinrumelhelha. Ukhalhawaya mirima ni irusho chaya chihonanarihiya. 16 Yayo attu ayo aneera wiira anonchuwelha Nlhuku, nansho meetelho aya anowaakhota. Phi attu ahinolhoka mmiithoni mwa ashikhunanaya, o mirima cho itiyamaru, ahinolhoka wo mitheko chiriyoothe chorera.