1 Nansho inyuva mweettuchiheke attu malhove a Nlhuku arii phi e ikeekhene. 2 Mwaahimerieke ashulhupalhe manyaalhopwana wiira eethimicheke, akhalheke attu o weewelhelha ashikhunanaya, attu o irusho, attu o upisha nrima ni o waattuna attu ni o uvilhelha. 3 Ni chiichammo mweettuchiheke maniyoopani o wulhuvalha wiira amwooveke Nlhuku. Ahikhalhe attu o waapa akhunanaya ama ipotta cho uhapalhiya utheka. Eettuchiheke iphiro choombone ashikhunanaya, 4 wiira aalhake imialhi wiira aattune manyowannyaya ni achishaana aya, 5 eetimarikheke ni vavawo ahiinanarihe, akhalheke attu anopangacha chittu choombone wa manyaowannyaya, nlhove na Nlhuku nihiwe naaruwaniya.

6 Thothoni tho, mwaamukeke ashimirawo wiira ni ayo eethimicheke. 7 Wo iphiro chonkhaye, ni inyu mwaanene nkhalheke ntu o ulhatiya wo meetelho inyu oombone. Mwiilhipiheke wo malhove nnetuchiha inyu attu, mena nhipange thoko ncheche. 8 Malhove aneettuchiha inyu attu akhalheke o ikuru, ahinoovanyihiya, amalhaponi inyu awe oona ishoni ahikhalhaka ni ittu yo unanara yo unihukumulha.

9 Ipotta, ni ayo chiicho eetimarikheke wa manyaapwiiya aya aanaaruma ayo, yaatelhihaka wo mitheko chonkhaye chinopanga aya. Ahaanyihanaka, 10 mena wiiya nhakhu aya. Nansho, ooniheke nrima woombone ni ukhulhuvelhiya, eechonihaka wo iphiro chonkhaye wiira meettuchiho a Nlhuku Moopolhi ihu phi o ikeekhene. 11 Ukhalhawaya nnema wa Nlhuku uhopatakuliya, wiira ummwiihe noopo wa attu onkhaye. 12 Nnema wa Nlhuku unoniittuchiha hii wiira nikhote nikakata no velhaponi va, nihikhalhe attu o uhapalhiya, nikhalhe wo wiitimarikha ni wo uvarechesha ikekhiaye, uno ninthimichaka Nlhuku ninari bado velhaponi va, 13 niwehereraka nihuku no mpuha ninokhulhuvelha ihu, vanohalha aya upatakulhiya nthimicho wa Nlhuku mulhupalhe ni Moopolhi ihu, Yesu Kuristo. 14 Yoyo aheekumiha mwanene wo nlhatu wihu wiira anoopolhe mu uhilhokani mwonkhaye anihapihaka ukhalha atakatifu awe, attu anovarechesha upangacha chittu choombone.

15 Mwiittuchiheke chilha chittu chilha, nvarelhelhaka ikuru inyu uno mwaalheheraka ni waamuka attu anowiiwelhelhani. Ni vavawo hikhalhe ntu hinowiwelhelhani.