Lucas 24

Mwanja gwa kujhenda ku Emau

13 Lichiko lele, bhabholwa bhabhele bha Yecho bhakibha mu kutyanga bhajhawila kuchenda jhimo jhikemwa ku Emau chikibhii utale kilomita kome na jhimo kuhumii ku Yeluchalemo. 14 Bhakibha na malongeche gha ilebhe yoha itendike. 15 Pubhajhendilila na malongeche ghabhe na kukikonya, Yecho jwenio ndi pabhandikila na kulongohana nabho pamonga. 16 Bhene bhakamwene kwa miho ghabhe, nambo bhakaumanyite jhe.

17 Yecho ajhakwakonya, "Mangota milongolelana nike, kongo mmii mu kutyanga?"

Na bhene bhajhakujhema, kumiho jhabhe kujhakungamala kwa ungolongonde. 18 Mundo jhumo pakate jhabhe, liina lyake Kiliopa, ajhakunyangula, "Bho, mwe maghene kanjika chino pa muche gwa ku Yeluchalemo, umanyite ndeka ilebhe itendike machiko gha pahina ghano?"

19 Jwenio ngakonyita, "Ilebhe ghane kabhele?"

Na bhene ngabhajhangwila, "Ilebhe ipambalikine Yecho jwa ku Nachalete. Mundo jwenio akibha nnondole jhuna likakala lya kuhenga na kubhola palonge jha Chapanga na kwa bhando bhoha. 20 Akapiya matambiko na ilongoche hito bhajhakukamua kwa bhakolo bhu ku Loma bhahadabwii akomwe, na bhene bhajhakumamba panchalaba. 21 Nambo twenga tukahobholile jwenio ndi jwa kuhighombola Ichilahele! Kuchocha kwa gheniya deleno ndi lichiko lyutato kuhumii pubhatehila ilebhe yenio. 22 Helahela akakeghe bhange kuhumii pakate jhito bhajhakutukangacha. Putiputi bhajhakujhenda ku mambe, 23 nambo bhakaikoli ndeka yegha jha Yecho. Bhajhakukelebhuka na kutulongelela bhapitilwe na akatumiche bha kunane kwa Chapanga, alongila Yecho abhii ghome. 24 Bhajhito bhange bhakajhenda ku mambe bhajhakulola ghala ghighalongilwa na akakeghe, nambo jwenio bhakamwe ndeka."

25 Yecho ajhakwalobholela, "Mangota mwenga mupumbumwike naha! Mijheketela kachoko kachoko ghoha ghighalongoleka na milondole bha Chapanga! 26 Bho, ikampala ndeka Kilichitu kubhehe mulung’ahe, na peniya ndi ajhingila mu ukolo gwake?" 27 Bhahe, peniya ndi pajhendilila kwachimulila mbone mambu ghoha gwa jwenio hotuhotu ghughabhii mu Majhandiko gha Chapanga, kutumbulila itabo ijhandikwe na Mucha ade mu itabo henge ya milondole bha Chapanga.

28 Pubhabhandikila kuhika pa chenda jhene, Yecho ajhakutenda anda atenda kupetelecha. 29 Nambo bhene bhajhakupembelekeya chonde, "Uhighalike pamonga na twenga, nhwalo lyobha litipike na lubhendo lutumbwile." Ajhakujhenda nkate na kutama. 30 Patamita pahe na kulye nabho, ajhakutola libumunda na kunchenguu Chapanga, na kuumetula na kwapekeya ajhake. 31 Papalapala miho ghabhe ghajhakudindulilwa, bhajhakumanya, nambo jwenio ajhakwaghala pakate jhabhe. 32 Bhahe, bhajhakukonyana, "Bho, miojho jhito ikananamwike jhe pakibha achimulila mu Majhandiko gha Chapanga mundela mola?"

33 Papalapala bhajhakubhoka na kubhujha ku Yeluchalemo. Bhajhakwakolela bhabholwa kome na jhumo bha Yecho na bhando bhange bhibhakibha pamonga na bhene. 34 Bhalongila, "Chakaka Bhambo ayokite! Akongine na Simone!"

35 Bhahe, bhando bhala bhabhele bhajhakulonge ilebhe ipitile undela, na pubhamanyita Yecho pametwila libumunda.