1 Nyɛɛ hyɛ bɔ nɛ wa Hiɔwe Tsɛ ɔ suɔ wɔ saminya ha, nɛ e ha he blɔ kaa a tsɛ wɔ Mawu bimɛ, nɛ ja a wa ji. Se akɛnɛ nihi fuu li Mawu he je ɔ, a nui sisi kaa e bimɛ ji wɔ. 2 Anyɛmimɛ nɛ a suɔ, amlɔ nɛ ɔ Mawu bimɛ ji wɔ, se nɔ́ nɛ wa ma ji hwɔɔ se ɔ, a je we kɛ tsɔɔ we wɔ lolo. Se nɔ́ nɛ wa le kɛkɛ ji kaa ke e ba pue ɔ, wa maa hi kaa lɛ, ejakaa wa maa na lɛ kaa bɔ nɛ e ngɛ ɔ. 3 Nɔ tsuaa nɔ nɛ heɔ enɛ ɔ yeɔ anɔkuale mi ɔ, e si himi he nɛ tsɔ, ejakaa Kristo ngɛ klɔuklɔu. 4 Nɔ fɛɛ nɔ nɛ peeɔ yayami ɔ, e ngɛ Mawu mlaa nɔ tɔe, ejakaa yayami peemi ji mlaa nɔ tɔmi. 5 Nɛ nyɛ le kaa e ba plɛ e he Nɔmlɔ adesa bɔ nɛ pee nɛ e nyɛ nɛ e ngɔ wa he yayami ɔmɛ kɛ ho, lɛ nɔ nɛ yayami ko be e mi. 6 Ke nɔ ko ngɛ e mi ɔ, e pee we yayami. Nɔ tsuaa nɔ nɛ peeɔ yayami ɔ, e li Kristo ngɛ anɔkuale mi, nɛ e pi Kristo nɔ.

7 Oo ye bimɛ, nyɛ ko ha nɛ nɔ ko nɛ sisi nyɛ ngɛ enɛ ɔ he. Ke o ngɛ kpakpa pee be fɛɛ be ɔ, e tsɔɔ kaa o hi kaa bɔ nɛ Kristo ngɛ ɔ. 8 Nɔ nɛ peeɔ yayami ɔ, Abosiami Nɔmlɔ ji lɛ, ejakaa Abosiami pee yayami kɛ je sisije. Se Mawu Bi ɔ ba konɛ e ba puɛ Abosiami ni tsumi ɔmɛ. 9 Nɔ nɛ a fɔ lɛ ngɔ wo Mawu weku ɔ mi ɔ, e pee we yayami, ejakaa Mawu wami ngɛ e mi jehanɛ. Lɔ ɔ he je ɔ, e be nyɛe maa hi yayami pee, ejakaa a ngɔ kikɛmɛ a wami he nɛ ɔ kɛ wo e mi nɛ e ngɛ e nɔ yee; nɛ tsɔɔ kaa a fɔ lɛ ehe.

10 Enɛ ɔ ji slɔɔto nɛ ngɛ nɔ nɛ ji Mawu bi kɛ nɔ nɛ ji Abosiami nɔmlɔ kpɛti. Nɔ tsuaa nɔ nɛ ngɛ yayami peemi si himi mi nɛ e sume e nyɛmi ɔ, e sume Mawu; 11 ejakaa munyu nɛ a kɛ ha wɔ kɛ je sisije ji kaa waa suɔ wa si bi.

12 Wa ko pee kaa Kain nɔ nɛ ngɛ Abosiami mi nɛ e gbe e nyɛmi ɔ. Mɛni ba nɛ e gbe lɛ? Ejakaa Kain peeɔ yayami, nɛ e le klɛdɛɛ kaa e nyɛmi ɔ hi pe lɛ. 13 Lɔ ɔ he je ɔ, anyɛmimɛ, e ko pee nyɛ nyakpɛ ke ji nihi sume nyɛ.

14 Ke ji wa suɔ wa nyɛmimɛ Kristo se nyɛɛli kpahi ɔ, e tsɔɔ kaa a he wɔ kɛ je gbenɔ mi nɛ a ha wɔ neneene wami. Se nɔ nɛ be suɔmi kɛ ha ni kpahi ɔ, e nɔ ji neneene gbenɔ. 15 Nɔ tsuaa nɔ nɛ sume e nyɛmi ɔ, nɔ gbelɔ ji lɛ, nɛ nyɛ le kaa nɔ gbelɔ ko be neneene wami ngɛ e mi. 16 Kɛ gu Kristo e gbenɔ nɛ e gbo kɛ ha wɔ ɔ mi ɔ, wa le nɔ́ nɛ ji suɔmi pɔtɛɛ. Lɔ ɔ he je ɔ, e sa kaa wɔ hu wa gbo ngɛ wa nyɛmimɛ Kristo se nyɛɛli a he.

17 Ke Kristo se nyɛɛlɔ ko ngɛ ní bɔ nɛ sa, nɛ e na e nyɛmi ngɛ fimi mi se e yi kɛ bua we lɛ ɔ, anɛ Mawu suɔmi maa hi e mi lo? 18 Bimɛ tsɔwi, nyɛ ha nɛ wa kpa demi kɛ wa nya kɛkɛ ke wa suɔ nihi. Nyɛ ha nɛ waa suɔ mɛ ngɛ anɔkuale mi, nɛ waa kɛ wa ni peemi níhi nɛ tsɔɔ. 19 Kɛkɛ ɔ, wa maa le tutuutu kɛ gu wa ni peemi ni ɔmɛ a mi kaa wa ngɛ Mawu blɔ fa mi, nɛ wa he nile be wɔ fɔ bue, ke ji wa daa si ngɛ Nutsɔ ɔ hɛ mi tete. 20 Ke wa he nile ngɛ wɔ fo bue, nɛ wa nu he kaa wa pee yayami ɔ, niinɛ, Nutsɔ ɔ maa nu he pe wɔ, ejakaa e leɔ nɔ́ fɛɛ nɔ nɛ wa peeɔ ɔ.

21 Se, anyɛmimɛ suɔli, ke wa he nile bui wɔ fɔ ɔ, wa ma nyɛ ba Nutsɔ ɔ ngɔ kɛ hɛ nɔ kami 22 nɛ wa nine maa su nɔ́ tsuaa nɔ nɛ wa bi ɔ nɔ, ejakaa wa ngɛ lɛ tue bue nɛ wa ngɛ e suɔmi nya ni pee. 23 Nɛ enɛ ɔ ji kita nɛ Mawu wo wɔ kaa, wa he e Bi Yesu Kristo ɔ nɔ waa ye, nɛ waa suɔ wa si bi. 24 Nɔ tsuaa nɔ nɛ yeɔ Mawu kita amɛ a nɔ ɔ, e kɛ Mawu ngɛ, nɛ lɛ hu e kɛ lɛ ngɛ. Wa le enɛ ɔ kaa e ji anɔkuale, ejakaa Mumi Klɔuklɔu ɔ nɛ e kɛ ha wɔ ɔ deɔ wɔ ja.