1 Anyɛmimɛ nɛ a suɔ, nyɛ ko he nɔ́ tsuaa nɔ nɛ nɔ ko ma de nyɛ be fɛɛ be kaa e je Mawu ngɔ ɔ kɛkɛ nɛ nyɛɛ ye. Nyɛɛ hyɛ mi ha kekle kaa e ji anɔkuale lo. Ejakaa lakpa tsɔɔli fuu ngɛ je ɔ mi. 2 Bɔ nɛ nyɛ maa pee kɛ le ke ji a munyu ɔ je Mumi Klɔuklɔu ɔ ngɔ ɔ ji, anɛ e tsɔɔ kaa Yesu Kristo Mawu Bi ɔ ba ngɛ nɔmlɔ su mi lo? Ke e tsɔɔ ja a, lɛɛ munyu ɔ je Mawu ngɔ. 3 Ke pi ja a, lɛɛ munyu ɔ ji Mawu ngɔ, se mohu e je lakpa Kristo ɔ ngɔ, nɔ nɛ nyɛ nu e he kaa e maa ba, se amlɔ nɛ ɔ, e ngɛ je ɔ mi momo ɔ.

4 Ye bimɛ nɛ i suɔ, Mawu nihi ji nyɛ, nɛ nyɛ ye nihi nɛ te si kɛ wo Kristo ɔ nɔ kunimi momo, ejakaa nɔ nɛ ngɛ nyɛ mi ɔ e he wa pe tsɔɔlɔ yayami ko nɛ ngɛ je nɛ ɔ mi. 5 Nimli nɛ ɔmɛ je je nɛ ɔ mi, lɔ ɔ he je ɔ, je nɛ ɔ mi níhi a he munyu nɛ a tuɔ, nɛ je ɔ buɔ mɛ tue. 6 Se wɔɔ lɛɛ Mawu bimɛ ji wɔ. Nɔ fɛɛ nɔ nɛ le Mawu ɔ, e buɔ wɔ tue, nɛ nɔ nɛ li Mawu ɔ, e bui wɔ tue. Kɛ gu enɛ ɔ nɔ ɔ, wa leɔ ke munyu ɔ je Mawu ngɔ niinɛ. Ejakaa ke e je Mawu ngɔ ɔ, lɛɛ je ɔ be munyu ɔ tue bue.

7 Anyɛmimɛ, nyɛ ha nɛ waa suɔ wa he, ejakaa suɔmi je Mawu ngɔ, nɛ nihi nɛ suɔmi ngɛ a mi nɛ a mi mi jɔ ɔ, e tsɔɔ kaa a ji Mawu bimɛ nɛ a le Mawu. 8 Se ke nɔ ko be suɔmi nɛ e mi mi jɔɛ ɔ, e tsɔɔ kaa e li Mawu, ejakaa Mawu ɔ suɔmi i.

9 Mawu tsɔɔ wɔ e suɔmi nɛ e ngɛ kɛ ha wɔ kɛ gu e Bi kake too ɔ nɛ e tsɔ kɛ ba je ɔ mi ɔ nɔ, nɛ e ngɔ neneene wami kɛ ba ha wɔ kɛ gu e gbenɔ ɔ nɔ. 10 Ngɛ enɛ ɔ mi ɔ, wa na bɔ nɛ anɔkuale suɔmi ngɛ ha. Tsa pi wɔ nɛ wa suɔ Mawu, se lɛ nɛ e suɔ wɔ, nɛ e tsɔ e Bi ɔ kɛ ba kaa bɔ sami nɔ, nɛ e kɛ je wa he yayami ɔmɛ kɛ ho.

11 Ye suɔli, si abɔ nɛ Mawu suɔ wɔ ja a, e sa nɛ wɔ hu waa suɔ wa si bi. 12 Wa nɛ Mawu hyɛ mohu, se ke wa suɔ wa si bi ɔ, Mawu maa hi wa mi nɛ e suɔmi ɔ hu maa wa ngɛ wa mi. 13 Nɛ e ngɔ lɛ nitsɛ e Mumi Klɔuklɔu ɔ kɛ wo wa tsui mi, nɛ e kɛ tsɔɔ kaa waa kɛ lɛ ngɛ, nɛ lɛ hu e kɛ wɔ ngɛ. 14 Jehanɛ ɔ hu wa na kɛ wɔ nitsɛmɛ wa hɛ ngmɛ, nɛ wa de je ɔ tsuo kaa Mawu tsɔ e Bi ɔ kɛ ba nɛ e ba he a yi wami. 15 Nɔ tsuaa nɔ nɛ heɔ yeɔ, nɛ e deɔ ke Yesu ɔ Mawu Bi ji lɛ ɔ, Mawu ngɛ e mi, nɛ lɛ hu e ngɛ Mawu mi.

16 Lɔ ɔ he je ɔ, wa le nɛ wa heɔ Mawu suɔmi nɛ e ngɛ kɛ ha wɔ ɔ yeɔ. Mawu ɔ suɔmi i, nɛ nɔ nɛ ngɛ suɔmi ɔ, e ngɛ Mawu mi, nɛ Mawu hu ngɛ e mi. 17 Nɛ akɛnɛ waa kɛ Kristo ngɛ he je ɔ, wa suɔmi ɔ waa nɛ e hii kɛ pii si. Lɔ ɔ he je ɔ, wa hɛ mi be si puee, nɛ wa be haoe ngɛ kojomi ligbi ɔ nɔ. Se wa maa da si ngɛ e hɛ mi kɛ hɛ nɔ kami kɛ bua jɔmi, ejakaa e suɔ wɔ nɛ wɔ hu wa suɔ lɛ.

18 E sɛ kaa waa ye nɔ ko nɛ suɔ wɔ kɛ pi si ɔ gbeye; e suɔmi nɛ hi kɛ pi si ɔ jeɔ gbeye nɛ wa maa ye lɛ, kaa e maa pee wɔ nɔ ko ɔ. Ke wa ngɛ gbeye yee ɔ, eko ɔ, wa ngɛ nɔ nɛ e maa pee wɔ ɔ gbeye yee; nɛ tsɔɔ kaa wa be nɔ mi mami pɔtɛɛ kaa e suɔ wɔ anɔkuale mi. 19 Wa suɔ lɛ, ejakaa lɛ kekle nɛ e suɔ wɔ.

20 Ke ji nɔ ko ke, "I suɔ Mawu," se e ngɛ e nyɛmi nyɛe kɛ sa a, lakpatsɛ ji lɛ. Ejakaa, ke e sume e nyɛmi nɛ e ngɛ hyɛe ɔ, kɛ e ma plɛ kɛ suɔ Mawu nɛ enɛ lɛ hyɛ ɔ kɛɛ? 21 Nɛ Mawu nitsɛ wo kita kaa, pi lɛ kɛkɛ nɛ e sa nɛ a suɔ, se nɔ nyɛmi hulɔ.