1 Kristo se nyɛɛli nɛ ngɛ nyɔguɛ yemi sisi ɔ, a tsu ni wawɛɛ nɛ a bu a nutsɔ ɔmɛ. A ko ha nɛ e ba mi kaa a ma de ke Kristo se nyɛɛli ɔmɛ pi ni tsuli kpakpahi, nɛ a ye Mawu biɛ ɔ kɛ e tsɔɔmi ɔ he fɛu. 2 Nɛ ke a ngɛ Kristo se nyɛɛli nutsɔmɛ ɔ, lɔ ɔ tsɔɔ we kaa a pee hejɔ, se lɔ ɔ mohu nɛ e sa kaa a tsu ni kɛ a he wami kulaa, ejakaa a nyɛmimɛ Kristo se nyɛɛli nɛ a ngɛ yee kɛ ngɛ buae ɔ nɛ.

Timoteo, moo tsɔɔ mɛ anɔkuale nɛ ɔmɛ nɛ o wo mɛ he wami nɛ a ye nɔ. 3 A ti ni komɛ ma kua Nutsɔ Yesu Kristo anɔkuale tsɔɔmi nɛ ɔmɛ mohu, se mɛ ji Mawu jami ɔ sipoku. 4 Nɛ nɔ fɛɛ nɔ nɛ maa tsɔɔ tsɔɔmi kpa ko ngɛ enɛ ɔ se ɔ, he nɔ wolɔ kɛ kuasia ji lɛ. E ji nɔ ko nɛ nui Kristo munyu ɔ sisi, nɛ e woɔ nya sami, hunga jemi kɛ muklii mi la womi nɛ kɛ he fɛu yemi, nɔ nya pomi kɛ nihi a he susumi yaya baa. 5 Kikɛmɛ a nya sali nɛ ɔmɛ ji nihi nɛ yayami ye a juɛmi nɔ nɛ a tui anɔkuale. A susumi ji Manye Munyu ɔ tsɔɔ ni nami. O kɛ mɛ nɛ ko bɔ.

6 Anɛ o ngɛ hlae kaa o ma na ni kpɔtɔɔ lo? Ke o bua jɔɔ o he nɛ o peeɔ kpakpa a, lɛɛ o na ni momo. 7 E fɔɔ si paa kaa waa kɛ nɔ́ ko bɛ je nɛ ɔ mi, nɛ wa be nyɛe nɛ waa kɛ pɛsua tete po maa ya gbeje. 8 Enɛ ɔ he je ɔ, ke wa be sika se wa naa wa nya mi ngma kɛ he hami níhi bɔ nɛ sa kɛkɛ ɔ, e sa kaa wa bua nɛ jɔ wa he. 9 Se nihi nɛ nyɛɛ ɔ ni nami se ɔ, a peeɔ ni yaya slɔɔtohi, nihi nɛ puɛɔ mɛ nɛ haa a naa susumi yaya, nɛ nyagbe mi ɔ, e kɛ mɛ yaa hɛ mi kpatami mi. 10 Ejakaa sika suɔmi ji yayamihi kulaa a sipoku. Ni komɛ suɔ ni nami he je ɔ a kpale ngɛ Mawu se nɛ a ngɔ aywilɛho babauu kɛ fɔ mɛ nitsɛmɛ a nɔ.

11 Oo Timoteo, moo lɛɛ Mawu nɔmlɔ ji mo. Moo tu yayami ni nɛ ɔmɛ kulaa a nya fo, nɛ o di dami kɛ kpakpa peemi se; nɛ o kase e nɔ hemi kɛ yemi kɛ nyɛmi suɔmi kɛ tsui si tomi kɛ kpoo peemi. 12 Moo ya nɔ nɛ o hwu Mawu ta a, nɛ o pɛtɛ neneene wami nɛ Mawu kɛ ha mo ɔ mi wawɛɛ, nɔ́ nɛ he nɛ o jaje o he yayami ngɛ odase yeli fuu a hɛ mi ɔ.

13 I ngɛ mo fae ngɛ Mawu hɛ mi, nɔ nɛ haa nihi kulaa wami ɔ, kɛ wa Nutsɔ Yesu Kristo, nɔ nɛ ye Manye Munyu ɔ he odase ngɛ Pontio Pilato hɛ mi nɛ e yi gbeye ɔ, 14 kaa o ye níhi kulaa nɛ e de mo ɔ a nɔ, konɛ a ko na piami ko ngɛ o he kɛ ya si wa Nutsɔ Yesu Kristo maa kpale kɛ ba. 15 Ejakaa e be kɛe nɛ Mawu Ope, nɔ nɛ a gbaa lɛ ɔ, nɛ lɛ pɛ ji Mawu he wamitsɛ kɛ Matsɛmɛ a matsɛ kɛ Nutsɔmɛ a nutsɔ ɔ, ma je Kristo kpo paa kɛ je hiɔwe, 16 lɛ Mawu nɔ nɛ pe nɛ gbo we gblee ɔ, nɛ e hii la nɛ he ngɛ gbeye mi ɔ. Nɔ nɛ nɔmlɔ adesa ko be nyɛe e he maa su ɔ, nɔ nɛ nɔmlɔ ko nɔmlɔ ko nɛ lɛ hyɛ, nɛ a be lɛ nyɛe maa na gblee ɔ. Lɛ ji nɔ nɛ sa yi jemi kɛ neneene he wami kɛ matsɛ yemi. Amen.

17 Mo de niatsɛ ɔmɛ ke a ko fĩa, nɛ a ko ngɔ a hɛ kɛ fɔ a sika amɛ nɛ se be kɛe ɔ nɔ, se mohu a ngɔ a hɛ kɛ fɔ Mawu hɛ kalɔ ɔ nɔ, nɔ nɛ haa wɔ wa hiami níhi kulaa, bɔ nɛ pee nɛ wa na bua jɔmi ɔ. 18 Mo de mɛ ke a pee kpakpa nɛ a plɛ niatsɛmɛ ngɛ kpakpa peemi mi; nɛ a ye kɛ bua nihi nɛ ngɛ hiami mi, 19 konɛ a na june nitsɛ ngɛ hiɔwe, he nɛ a yi ma na neneene wami ngɛ ɔ. Nɛ a hi Kristo se nyɛɛli a si himi kpakpa ngɛ hiɛ ɔ hulɔ.

20 Oo Timoteo! Mo tsu ni tsumi nɛ ɔmɛ nɛ Mawu to kɛ wo o dɛ ɔ. Nɛ o kɛ o he nɛ ko wo nihi nɛ fĩaa kɛ toɔ a nile nɔ ɔ a yakayaka nya sami ɔmɛ a mi. 21 Nɔ́ nɛ he hia ngɛ je nɛ ɔ mi pe kulaa ji Mawu lemi, nɛ enɛ ɔ laa a ti ni komɛ. Mawu nɛ na mo mɔbɔ.