1 Sa a, nyɛ ji nihi nɛ Mawu gbiɛ nyɛ, nɛ a ngɔ nyɛ kɛ ha neneene hɛ mi kpatami ngɛ nyɛ yayami ɔmɛ a he. 2 Jamɛ a be ɔ mi ɔ, nyɛɛ kɛ je mi bi ɔmɛ nɛ yaa, nɛ nyɛ ngɛ kaa mɛ pɛpɛɛpɛ kɛ yayami peemi. Nyɛ ngɔ nyɛ he kɛ ha Abosiami, kɔɔhiɔ he wamitsɛ ɔ, nɔ nɛ ngɛ ni tsue ngɛ nihi nɛ tsɔ Mawu hɛ mi atuã a tsui mi amlɔ nɛ ɔ. 3 Wɔ tsuo wa gbo tue kaa mɛ ngɛ be ko nɛ be ɔ mi. Wa si himi tsɔɔ kaa nimli yayamihi ji wɔ. Wa tsu yi mi wami nihi nɛ he lo kɛ juɛmi suɔ ɔ. Wa je sisi kɛ yayami peemi, ejakaa a fɔ wɔ kɛ yayami, nɛ lɔ ɔ he je ɔ, Mawu gbiɛmi ngɛ wa nɔ kaa ni kpa amɛ nɔuu.

4 Se Mawu mɔbɔ nami hiɛ babauu, nɛ e suɔ wɔ saminya. 5 Lɔ ɔ he je ɔ, benɛ wa gbo ngɛ mumi mi nɛ wa ngɛ kɛ ha hɛ mi kpatami, ejakaa wa pee yayami ɔ, e ha nɛ wa hɛ ka ekohu benɛ e tle Kristo si kɛ je gbeje ɔ, nɛ e kɛ he wa yi wami ngɛ e mɔbɔ nami ɔ nya. 6 E tle wɔ si kɛ je gbogboe muɔ mi kɛ ba anunyami mi, kɛ Kristo nɛ waa kɛ lɛ tsuo hii si ngɛ hiɔwe matsɛ yemi ɔ mi ngɛ nɔ́ nɛ Kristo Yesu tsu ha wɔ ɔ he je. 7 Amlɔ nɛ ɔ, Mawu maa ngɔ wɔ kɛ pee nɔ hyɛmi nɔ́ be fɛɛ be kɛ tsɔɔ bɔ nɛ e mi mi jɔmi ɔ hiɛ fuu ha, kaa bɔ nɛ e je kpo kɛ tsɔɔ wɔ ngɛ nɔ́ nɛ e pee ha wɔ kɛ gu Yesu Kristo nɔ ɔ.

8 Ngɛ e mi mi jɔmi ɔ he je ɔ, e he nyɛ yi wami kɛ gu Yesu Kristo nɔ hemi kɛ yemi nɔ; nɛ yi wami hemi ɔ tsa pi nyɛ dɛ mi nɛ e je, se Mawu nɔ́ke nɔ i. 9 Nɛ yi wami hemi ɔ pi ni tsumi kpakpa ko nɛ wa tsu ɔ e he hiɔwo, bɔ nɛ pee nɛ wa ti nɔ ko nɛ ko fĩa. 10 Mawu nitsɛ nɛ pee wɔ bɔ nɛ wa ngɛ ɔ, nɛ e ha wɔ wami he nɛ je Kristo Yesu mi ɔ; nɛ kɛ je blema lokoo nɛ e to kaa waa ngɔ wa wami ɔ kɛ ye kɛ bua ni kpahi.

11 Nyɛ hɛ ko je nɔ kaa sa a, wɔ jali ji nyɛ, nɛ Yuda bi ɔmɛ tsɛɔ nyɛ nihi nɛ li Mawu kɛ nihi nɛ a "he tsɔ we." Se mɛ hu a he tsɔ we, tsɛ be ɔ, a peeɔ kusumihi nɛ nihi nɛ le Mawu ɔ peeɔ, ejakaa a woɔ a he nyumu mi kɛ tsɔɔ kaa a le Mawu. 12 Nyɛ kai kaa jamɛ a be ɔ mi ɔ nyɛɛ kɛ Kristo bɔɛ kulaa, nɛ Mawu bi ɔmɛ pee nyɛ he nyɛli, nɛ nyɛ be yemi kɛ buami he si womi. Nyɛ laa, ejakaa Mawu be nyɛ se nɛ nyɛ be he nɔ kami ko.

13 Se amlɔ nɛ ɔ, nyɛ peeɔ Kristo Yesu níhi. Kekle ɔ, nyɛɛ kɛ Mawu he kɛ, se amlɔ nɛ ɔ a sɔ̃ nyɛ kɛ su e he haa ngɛ nɔ́ nɛ Yesu Kristo ngɔ e muɔ ɔ kɛ tsu ha nyɛ ɔ he je.

14 Ejakaa Kristo nɔ nɛ wa maa gu kɛ na he jɔmi. E ngɔ wɔ Yuda bi ɔmɛ kɛ nyɛ ma je li ɔmɛ tsuo kɛ pee kake nɛ e kɛ he jɔmi ba wa kpɛti. Nɛ e je ninyɛ nɛ ngɛ wa kpɛti ɔ. 15 Kɛ gu e gbenɔ ɔ nɔ ɔ, e je hetsɛ nɛ Yuda bi ɔmɛ a mlaa amɛ wo kɛ ba Yuda bi kɛ ma je li a kpɛti nɛ haa nɛ Yuda bi ɔmɛ yeɔ a he ɔ, ejakaa e gbo konɛ e kɛ gu jamɛ a mlaa amɛ kulaa. Kɛkɛ nɛ e ngɔ nimli enyɔ ɔmɛ nɛ a ke a he yi ɔ nɛ e kɛ mɛ pee lɛ nitsɛ e he níhi; nɛ kɛ gu enɛ ɔ nɔ́ ɔ, e bua wɔ kɛ pee kake nɛ tue mi jɔmi ba wa kpɛti. 16 Akɛnɛ wa plɛ nɔmlɔ tso kake he nihi jehanɛ ɔ he je ɔ, pɛ nɛ ngɛ wa kpɛti ɔ jɔ, ejakaa a dla wɔ tsuo waa kɛ Mawu kpɛti kɛ gu Sɛumi Tso ɔ nɔ. 17 Nɛ Kristo ba ba fiɛ he jɔmi Manye Munyu ɔ ngɔ tsɔɔ ma je li nɛ a kɛ Mawu kpɛti kɛ lokoo ɔ, kɛ wɔ Yuda bi ɔmɛ nɛ su e he ɔ. 18 Jehanɛ ɔ, wɔ tsuo, ma je li jio, Yuda bi jio, wa ma nyɛ ba Mawu nɛ ji Tsɛ ɔ ngɔ kɛ gu Mumi Klɔuklɔu ɔ yemi kɛ buami nɔ, ngɛ nɔ́ nɛ Kristo tsu kɛ ha wɔ ɔ he je.

19 Enɛ ɔ he je ɔ, amlɔ nɛ ɔ, tsa pi nibwɔhi ji nyɛ ngɛ Mawu hɛ mi hu, nɛ nyɛ pi ma setsɛmɛ hulɔ ngɛ hiɔwe, se mohu Mawu nitsɛ weku mi bimɛ kɛ e we bi.

20 Nɛ nyɛ ji nihi nɛ a fia ngɔ ma bɔfo ɔmɛ kɛ gbali ɔmɛ a sisi tomi ɔ nɔ, nɛ nyɛ kɔ̃ nya tɛ ji Kristo Yesu nitsɛ. 21 Wɔ nihi nɛ wa heɔ e nɔ yeɔ tsuo ɔ, a pee wɔ kɛ Kristo kake kaa Mawu Sɔlemi We he afɛu níhi nɛ ngɛ wae. 22 Nɛ nyɛ hu a ngɔ nyɛ kɛ piɛ a he, nɛ Mumi ɔ pee nyɛ kake nɛ nyɛ peeɔ Mawu we ɔ mi bimɛ.