1 Imi Paulo, nɛ ji Kristo sɔmɔlɔ ɔ, i ngɛ tsu mi ngɛ hiɛmɛ nɛ ɔ ngɛ nyɛ he je, ejakaa i fiɛ ke nyɛ ma je li ɔmɛ hu Mawu we bimɛ ji nyɛ. 2 I he ye kaa nyɛ le momo kaa Mawu ha mi ni tsumi pɔtɛɛ nɛ ɔ kaa ma fiɛ nɛ ma tsɔɔ e dloomi nɛ e kɛ ha nyɛ ma je li ɔmɛ ɔ, 3 kaa bɔ nɛ i de kuku ngɛ ye womi ɔmɛ kake mi be ko ɔ. Mawu nitsɛ nɛ e je e laami blɔ nya tomi nɛ ɔ kpo kɛ tsɔɔ mi kaa e dloomi ɔ ngɛ kɛ ha ma je li ɔmɛ hu. 4 I ngɛ nyɛ enɛ ɔ dee nɛ ma kɛ tsɔɔ bɔ nɛ i plɛ kɛ le ni nɛ ɔmɛ ha. 5 Mawu ha we nɛ nimli a bimɛ nɛ a le kikɛmɛ a laami sane nɛ ɔ ngɛ blema be ɔmɛ a mi; se amlɔ nɛ ɔ, a je kpo ngɔ tsɔɔ e bɔfo ɔmɛ kɛ gbali ɔmɛ kɛ gu Mumi Klɔuklɔu ɔ nɔ.

6 Nɛ laami sane ɔ ji kaa ma je li ɔmɛ maa piɛɛ Yuda bi ɔmɛ a he nɛ a ma gba Mawu weto ni nɛ ngɛ kɛ ha e bimɛ ɔ pɛpɛɛpɛ; nɛ e ma tsɛ mɛ tsuo kɛ ba e jami mi, nɛ jɔɔmi nguahi nɛ e wo he si nɛ e ma ha kɛ gu Kristo nɔ ɔ, e maa pee mɛ hu a nɔ́ ke ji a ngɔ Kristo he Manye Munyu ɔ kɛ nɔ́ nɛ e ba tsu kɛ ha mɛ ɔ. 7 Mawu ha mi kikɛmɛ a nyakpɛ he blɔ nɛ ɔ nɛ ma jaje e blɔ nya tomi nɛ ɔ kɛ de nɔ tsuaa nɔ. Nɛ e ha mi he wami kɛ nyɛmi pɔtɛɛ ko nɛ ma kɛ tsu he ni saminya.

8 Nyɛɛ hyɛ ha kaa i pee we nɔ ko nɛ sa kaa a ha mi kikɛmɛ a he blɔ nɛ ɔ, ami nɔ́ nɛ he be se nami pe kulaa ngɛ Kristo se nyɛɛli a kpɛti ɔ, ami mohu ji nɔ nɛ a hla kɛ ha ni tsumi titli nɛ ɔ, kaa ma de ma je li ɔmɛ bua jɔmi munyu nɛ ji weto ni nɛ ngɛ kɛ ha mɛ ngɛ Kristo mi nɛ se be poe ɔ. 9 Nɛ ma ha nɔ tsuaa nɔ nɛ le kaa Mawu ji ma je li ɔmɛ hu a Yiwamihelɔ, kaa bɔ nɛ nɔ nɛ bɔ nɔ́ tsuaa nɔ ɔ to he blɔ nya ngɛ laami mi kɛ je sisije ɔ.

10 E pee enɛ ɔ nɛ e kɛ ha nɛ nɔ yeli nɛ ngɛ hiɔwe ɔ a na nɛ a le bɔ nɛ e juɛmi mi kuɔ ha, kaa e bua e we bimɛ, Yuda bi ɔmɛ kɛ ma je li ɔmɛ tsuo a nya kɛ wo e jami ɔ mi. 11 Mawu pee enɛ ɔ ngɛ yi mi nɛ e to kɛ gu wa Nutsɔ Yesu Kristo nɔ ɔ nya.

12 Jehanɛ ɔ wa ma nyɛ ba Mawu hɛ mi nɛ wa be gbeye yee, nɛ wa ngɛ hɛ nɔ kami kaa e ma nya wa he, ke wa ba ngɛ Kristo biɛ mi nɛ wa he e nɔ ye ɔ.

13 Enɛ ɔ he je ɔ, i ngɛ nyɛ pɛɛ kpae kaa nyɛ na tsui ngɛ nɔ́ nɛ a ngɛ mi pee ngɛ hiɛ ɔ he je. Nyɛ he je nɛ i ngɛ nɔ́ nae ngɛ, nɛ e sa nɛ nyɛɛ na kaa a wo nyɛ hɛ mi nyami, konɛ nyɛ he mi nɛ wa nyɛ. 14,15 Ke i susu e nile kɛ e blɔ nya tomi ɔ he ɔ, i kplaa si nɛ i sɔleɔ kɛ haa Mawu we bihi, ni nɛmɛ nɛ ngɛ hiɔwe momo ɔ, kɛ ni nɛmɛ nɛ ngɛ zugba a nɔ tsuo a Tsɛ ɔ, 16 kaa e je e anunyami blɔ nya tomi babauu ɔmɛ a mi nɛ e wo nyɛ he wami kɛ Mumi Klɔuklɔu ɔ. 17 Nɛ i sɔleɔ hu kaa Kristo nɛ hi nyɛ tsui mi be fɛɛ be, nɛ nyɛ hemi kɛ yemi nɛ pi si ngɛ Mawu nyakpɛ suɔmi ɔ mi; 18,19 konɛ nyɛ, kaa Mawu bimɛ ɔ, nyɛɛ nu he ngɛ nyɛ mi nɛ nyɛɛ nu Kristo suɔmi ɔ, e kami kɛ e mi blimi kɛ e mi kuɔmi kɛ e nɔ kuɔmi bɔ nɛ e ngɛ tutuutu ɔ sisi. E suɔmi ɔ kle bɔ nɛ nyɛ be e nyagbe nae, nɛ nyɛ be e sisi hu nue kɛ pi si. Se nyagbe mi ɔ, Mawu nitsɛ ma hyi nyɛ mi obɔ.

20 Jehanɛ ɔ, a ngɔ anunyami kɛ ha Mawu nɔ nɛ kɛ gu e he wami babauu nɛ ngɛ ni tsue ngɛ wa mi ɔ nɔ́ ɔ, e pee níhi fuu kɛ ha wɔ pe bɔ nɛ wa ma bi lɛ aloo wa ma susu ɔ. 21 A ngɔ anunyami kɛ ha lɛ kɛ ya neneene kɛ yi nɔhi kulaa ngɛ asafo ɔ yi wami hemi he blɔ nya nɛ e to kɛ gu Kristo nɔ́ ɔ he.