1 Yesu kalola wega zoseri, kawawona wantu walunda pawatula mafupu gawu mulisanduku lya luhanja Mnumba nkulu ya Mlungu, 2 vira virii kamwoniti mkenja muhushu nentu pakatula senti ndidika mbili zya mpiya. 3 Kawagambira, "Nukugambirani kuwera nakaka mkenja muhushu ayu kalaviya zivuwa kuliku woseri wamonga. 4 Wamonga walaviyiti mafupu gawu galii gagasigaliti muulunda wawu, kumbiti muhushu ayu kwa uhushu wakuwi kalaviya vyoseri vyakalitumbiriti."

5 Wantumini wamu waweriti wankutakula kuusu Numba nkulu ya Mlungu, ntambu yawaherepeziya kwa mabuhi gaherepa na mafupu wagalaviyiti kwa Mlungu. Yesu kawagambira, 6 "Goseri aga gamgalola, shaka shankwiza peni hapeni lisigali libuwi limu pahala pakuwi, kila shintu hashiharibisiwi."

7 Womberi wamkosiyiti, "mfunda, visoweru avi havilawili ndii? Hashilawiri shishi kutulanguziya kuwera shaka ashi shankwiza?"

8 Yesu kawankula, "Mliloli weri, nawawazyangani. Wantu wavuwa hawizi pawatakula shisoweru shangu, hawizi na kulonga, ‘Neni ndo mweni!’ Na ‘Shaka hashizi!’ Kumbiti namuwafata. 9 Namtira pampikanira ngondu na ndewu, vintu vyoseri avi mpaka vilawiri kwanja, kumbiti upeleru wa vitwatira avi wankali."

10 Yesu kendereya kutakula, "Isi yimu hailikomangi na isi yimonga, na ufalumi umu haulikomi na ufalumi umonga. 11 Hakuweri na malendemeru makulu ga isi na hakuweri na njala na ulweri wa tawuni pahala poseri, hakuweri na vitwatira vya kutiliziya na lilangaliru likulu kulawa kuliyera. 12 Pamberi pagalawira goseri aga, hawawabati na kuwatabisiya na hawawajegeni munumba za Mlungu na kuwatula muvibetubetu, hawawajegeni kulongolu kwa wafalumi na wakulu toziya munjimira neni. 13 Ayi hayiweri lupenyu lwenu kuvibwera visoweru viwagira. 14 Kumbiti muvimani mumyoyu mwenu, namlihola ntambu ya kujiteteya, 15 toziya Namweni neni hanuwapanani mwenga lulimi na luhala vyeni wangondu wenu woseri hapeni wawezi kusindana naga na kugalema gamtakula. 16 Hagugalambukwi na mawu na tati gwaku, na walongu waku, na waganja waku, na wamonga pakati penu hawawalagi. 17 Wantu woseri hawawakalalirani mwenga toziya ya litawu lyaneni. 18 Kumbiti hapeni luagamili ata luvili lumu mumituwi mwenu. 19 Muweri pamgangamala mumoyu, hamliponiziyi weni.

20 "Pamwona Yerusalemu guzyengetwa na wangondu, su hamvimani kuwera shaka shisoka peni isi ayi hayiharabisiwi. 21 Woseri yawalikala Muyudeya watugili mulugongu, woseri yawawera mulushi wawuki, na woseri yawawera mumalambu nawawuya mulushi. 22 Toziya mashaka aga hagaweri ‘Mashaka ga kutoza,’ kulanguziya koseri kwakulembitwi mumalembu Mananagala gatimii. 23 Shondi shondi wamawu yawawera na yinda na walii yawanoniziya mumashaka galii! Toziya hakuweri na malweri gavuwa muisi, na utoza wa Mlungu hawuwayizili wantu awa. 24 Wamonga hawawalagi kwa ligumba, na wamonga hawawatuli muvibetubetu muisi zoseri, na hawawatoli lopola muisi zoseri na Yerusalemu hayitimbwi na wantu yawamumana ndiri Mlungu mpaka shaka shawu pashimalilika.

25 "Hakuweri na lilangaliru mumshenji, na mulyezi, na muntondu. Pasipanu wantu woseri yawaweriti muisi zoseri hawaweri na uhushu, lyoga lya kulishera kwa mtukuliru gwa makupala ga bahari na mihenyuhenyu yakuwi. 26 Wantu pawafuwa myoyu kwa lyoga, pawalola vitwatira vyeni havilawili pasipanu, makakala ga kumpindi hagatikinyiki. 27 Shaka shilii Mwana gwa Muntu hakalawili, pakiza mumahundi pakawera na makakala pamuhera na ukwisa mkulu. 28 Vintu avi pavyanja kulawira, mkalamuki na mnyasuli mituwi yenu kumpindi toziya ulopoziwu wenu wapakwegera."

29 Yesu kawagambiriti mfanu agu, "Mguloli mtera gwa mkuyu na mitera yamonga yoseri. 30 Pamuwoniti mihamba yankwanja kumera, muvimana kuwera shaka sha kutowa vula shapakwegera. 31 Ntambu iraa ayi, pamwona vitwatira avi vyankulawira, muvimani handa Ufalumi wa Mlungu wapakwegera.

32 "Mliholi kuwera vintu vyoseri havilawili huti pamberi pa wantu woseri yawalikala vinu kuhowa. 33 Kumpindi na pasipanu hazipiti, kumbiti visoweru vyangu hapeni vipiti.

34 "Mliloleri weri! Namuwera vyambojola bojola, na lukologelu na lyaliya, ama pamlilola weri ndiri lishaka lilii halikwizireni vumu hera, 35 gambira mgomiziwu. Toziya haguwayizili kwa wantu woseri yawalikala pahala poseri pasipanu. 36 Mwenga mulikali masu na mumluwi Mlungu mashaka goseri su mpati makakala ga kugenda weri muvitwatira vyoseri vyeni ndo havilawili na kugoloka kulongolu kwa Mwana gwa Muntu."

37 Mashaka goseri paluwala, Yesu kaweriti kankufunda Mnumba nkulu ya Mlungu, na pamihi kaweriti kankugenda kulikala mulugongu lwa Mizeyituni. 38 Kila pamandawila wantu woseri wagenditi Kunumba nkulu ya Mlungu kumpikinira.