1 Shipinga shoseri wagolokiti, wamjega Yesu kulongolu kwa Pilatu, 2 Wanja kumsitaki, pawalonga, "Tumwoniti muntu ayu kankuwasongiziya wantu wetu, na kuwaberiziya wantu kumupanana kodi Kayisari, pakawagambira Kristu mweni ndo, mfalumi."

3 Pilatu kamkosiyiti yomberi, "Hashi, gwenga ndo Mfalme gwa Wayawudi?"

Yesu kamuwankula, "Gwenga gulonga."

4 Pilatu kawagambira watambika wakulu wa numba ya Mlungu na lipinga lya wantu, "Mona likosa ndiri lyoseri kwa muntu ayu."

5 Kumbiti womberi wanjiti kulonga kankuwazongiziya, "Kwa mafundu gakuwi kanjiti kutenda ndewu pakati pa wantu woseri mu Yudeya. Kanjiti mu Galilaya na vinu kiza panu."

6 Pilatu pakapakiniriti aga, kakosiya, "Hashi, muntu ayu ka mwenikaya gwa Galilaya?" 7 Pakavimaniti handa Yesu kalawiti lushi lwalukolitwimlima na Herodi, su kamjegiti kwa Herodi, ndo mweni yakaweriti mu Yerusalemu shaka shilii. 8 Herodi kanemeleriti nentu pakamwoniti Yesu, toziya kapikaniriti kala visoweru vyakuwi, su kaweriti kankuhepera kumwona yomberi kwa shaka shivuwa. Kaweriti kankutumbira kawoni Yesu pakatenda mauzauza. 9 Su Herodi kamkosiyiti Yesu makosiwu gavuwa, kumbiti Yesu kamwankula ndiri. 10 Mtambika mkulu gwa numba ya Mlungu na wafunda wa Malagaliru walawiriti pawulongoru, walaviyiti masitaka gawu kwa makakala nentu. 11 Herodi pamuhera na wanjagila wakuwi, wamuwanganiti Yesu na kumtendera lidufiya, shakapanu wamvalisiya nguwu ya shifalumi, na wamuwuziya kwa Pilatu. 12 Kwanjira lishaka lilii, Herodi na Pilatu wawera waganja, pamberi pa shaka shilii waweriti wangondu.

13 Su Pilatu kawashemiti pamuhera, watambika wakulu wa numba ya Mlungu, na walongoziya wantu 14 kawagambira, "Mumjega muntu ayu kwaneni pamlonga kaweriti kawasongiziya wantu wawulemi ufalumi wa Rumi. Vinu mpikiniri! Pandoliti kala weri shitwatila ashi pawulongolu penu, mona ndiri likosa lyoseri kwa masitaka genu kwakuwi. 15 Wala Herodi kawoniti ndiri likosa, su kamuwuziyiti kwa twenga. Kwahera likosa lya kumtenda muntu ayu kahowi. 16 Su hanuwalongeri wamsyatangi ntomondu, hanumleki kagendi zakuwi." 17 Kila Mumsambu gwa Pasaka Pilatu kamlekiziyaga mtatilwa yumu pakati pawu.

18 Lipinga lyoseri wabotanga pawalonga, "Gumlagi ayu! Gutuvuguliri Baraba!" 19 Baraba wamtuliti mushibetubetu toziya ya kutenda ngondu mlushi lulii, viraa kalagiti wantu.

20 Pilatu kafiriti kumlekeziya Yesu, su katakula kayi nawomberi. 21 Kumbiti womberi watenditi umatu, "Gumkong'onderi misumali mulupingika! Gumkong'onderi misumali mulupingika!"

22 Pilatu kawagambira mala ya tatu, "Ashi katenda shidoda gaa? Mona ndiri likosa kwakuwi limtendi yomberi wamlagi, su hanumsyatangi viboku, su hanumlekeziyi."

23 Kumbiti womberi wendereyiti kutenda umatu kwa kubotanga kuwera Yesu mpaka kakong'onderwi misumali palupingika, na upeleru wawu wa kutenda umatu ukanga. 24 Su Pilatu kaamuwiti ntambu yawafira womberi gatendeki. 25 Kamvugulira kulawa mushibetubetu muntu ulii yawamfiriti, ndomweni yawamtuliti mushibetubetu toziya ya ngondu yakuwi na kulaga wantu, su kamlaviyiti Yesu kwa womberi wamtenderi ntambu yawafira.

26 Pawaweriti wankumjega, waliwoniti na muntu yumu yawamshema Simoni gwa Kureni, kaweriti kankulawa muisi na kwingira mlushi. Su wambata, wamtwika lupingika lulii kalutoli kumbeli kwa Yesu.

27 Lipinga likulu lya wantu limfatiti, mngati mwawu waweriti wadala wankudaya na kumlilira. 28 Yesu kawagalambukira, kawagambira, "Mwenga washina mawu wa Yerusalemu! Namundilira neni, kumbiti mulililiri maweni na wana wenu. 29 Toziya mashaka gankwiza, wantu hawalongi, ‘Mbaka kwa walii wagumba, yawaleriti ndiri ama kunonisiya wana!’ 30 Hashiweri shaka wantu pawayigambira migongu, ‘Gutuguwiri!’ Na kuvigambira vigongu, ‘Gutugubiki!’ 31 Kwa mana, handa wantu wankugutendera mtera muwisi ntambu ayi, hayiweri hashi kwa mtera guyuma?"

32 Wawatoliti viraa wantu wamonga wawili, wadoda wawalagi pamuhera na Yesu. 33 Pawasokiti kala pahala pawapashema, "Shipalakasa sha mtuhi," Yesu ndo wamkong'onderiti misumali palupingika pamuhera na walii wadoda wawili, yumu uwega wakuwi wa kumliwu na yumonga uwega gwakuwi gwa kumshigi. 34 Yesu kalonga, "Tati guwalekeziyi toziya wavimana ndiri vyawatenda."

Shakapanu wagawana nguwu zyakuwi kwa kugalambula simbi. 35 Wantu wawagolokiti palii pawamlola. Na walongoziya wamtendera lidufiya pawalonga, "Kawalopoziya wamonga, vinu kalilopoziyi mweni, handa mweni ndo Kristu, msyagula gwa Mlungu!"

36 Wanjagira wamtenderiti vira lidufiya, wamgenderiti wamupa icheshema 37 pawalonga, "Handa nakaka gwenga ndo Mfalumi gwa Wayawudi, gulilopoziyi gumweni."

38 Vira vilii malembu aga wagatula kumpindi kwakuwi, "Ayu ndo Mfalumi gwa Wayawudi."

39 Yumu gwa walii wadoda yawampingikiti palupinjika, kamwigilanga Yesu pakalonga, "Hashi, yanakaka ndiri gwenga ndo Kristu? Su gulilopoziyi gumweni, gutulopoziyi na twenga viraa."

40 Kumbiti mdoda gwingi ulii kamkalipira muyaguwi pakalonga, "Gwenga gumtira ndiri Mlungu ata kidogu? Gwenga gupata azabu iraa ayi. 41 Gwenga na neni tustahili, mana aga ndo malipu ya galii gatutenditi. Kumbiti muntu ayu katenda ndiri shidoda shoseri." 42 Shakapanu kalonga, "Gwenga Yesu! Gunholi shaka pagwingira muufalumi waku."

43 Yesu kamwankula, Nukugambira nakaka, lelu haguweri pamuhera na neni muparadisu.

44 Iweriti yapata saa sita paliwala, mshenji guleka kuwala, luwindu lugubikiti muisi yoseri mpaka saa tisa, 45 lipaziya lya numba nkulu ya Mlungu lipantika vipandi viwili. 46 Yesu kalila kwa liziwu likulu, Tati, mumawoku gaku nuyitula rohu yangu. Pakalongiti hangu kahowa.

47 Paliya, mkulu gwa wanjagila pakawoniti kala galii gatendikiti kamkwisa Mlungu pakalonga, "Nakaka ayu kaweriti muntu muheri."

48 Wantu woseri walii waweriti wajojinika toziya ya shitwatila ashi, pawawoniti galii gatendikiti, wawuyiti ukaya kwawu pawahinginitiki. 49 Waganja wakuwi pamuhera na wadala walii wamfatiti kulawa Galilaya, wagolokiti kwa kutali kulola shitwatila shiliya.

50 Kuweriti na muntu yumu litawu lyakuwi Yosefu, mwenikaya gwa shijiji shimu sha Wayawudi shawashishema Arimatayu. Kaweriti muntu muheri yakapananwa ligoya. 51 Yomberi kaweriti kankulolera kwiza kwa ufalumi wa Mlungu. Tembera kaweriti mjumbi gwa shyoteramotu shikulu sha Wayawudi, kajimiliti ndiri nawomberi majimiranu na matendu gawu. 52 Yomberi kagenditi kwa Pilatu, kaluwa kamupananiti nshimba ya Yesu. 53 Su kasulusiya nshimba ilii kulawa mulupingika, kayizyengititi sanda ya shitani, kayitula mulipumba lyaliweriti walisongola mulitalawu, lyeni alyenitenderwi. 54 Lishaka lilii liweriti Ijumaa, na matandiru ga lishaka lya kwoyera liweriti lyankuyanja. 55 Wadala walii waweriti wafatana na Yesu kulawa Galilaya wamfatiti Yosefu, waliwona lipumba lilii ntambu yawatula nshimba yakuwi. 56 Shakapanu wawuyiti ukaya, watanditiri uturi na malashi ga kuswaga nshimba ya Yesu.

Lishaka lya kwoyera woyeriti gambira malagaliru gagalagaliti.