1 ए ईस्रायली, आहयो बोल ह़मळो जे यहोवा तमारा बारा मे मतलब तीहया आखा कुळ ना बारा मे केदलो से जीने में मीस्र देस मे गेथो लावलो से: 2 "धरती ना आखा कुळ मे गेथो में तमारी पोर एतरोत मन लगाड़लो से, आहया कारण सी में तमारा आखा पापु नो डंड आपही।
भगवान वगे गेथी वात केवा वाळा नु काम
3 "कदीम बे माणेह पुरा राजी नी हय; ता ह़ु तीहया भेळा चाल सकहे ह़ु? 4 ह़ु नाहर सीकार हात कर्या वगर जंगल मे डोखारे ह़ु? जुवान नाहर कंय बी धर्या वगर आह़फा ना दोर मे रीन गुंगारे? 5 ह़ु चड़ा फांद मेक्या वगर फसहे? ह़ु कंय बी फस्या वगर जाळ ने ह़ेमटे? 6 ह़ु काना बी ह़ेर मे फेपार्यु वगाड़वा पोर माणहु थोरो-थोरो नी कापे? ह़ु यहोवान मोकल्या वगर काना बी ह़ेर मे कानी गरा आवहे? 7 आहयीत भात्ये मालीक यहोवा आह़फा ना चाकर्या भगवान वगे गेथी वात केवा वाळा पोर आह़फा नी ह़तायली वात उजन्ती कर्या वगर कंय बी नी करे। 8 नाहर गुंगारे; कोय नी बीहे? अने भगवान यहोवा केदो; कोय से जे भगवान भणी गेथी वात नी केय?"
सामर्या राज्य नु खत्तम हयणु
9 असदोद ना घोर अने मीस्र देस ना राजा ना कीला मे परच्यार करीन केवो: "सामर्या ना बड़ा पोर एक्ठा हय्न देखो के तीनी मे केवी घणी कचाट अने तीनी वच मे केवा वेला पाड़वा ना काम हय र्या!"
10 यहोवा आसम केय, "जे माणहु आह़फाम ना कीला मे वेला पाड़ीन अने लुट-पाट नु धन एक्ठु करीन राखे, तीहया भलाय सी काम करवा जाणेत नी।" 11 आहया कारण सी भगवान यहोवा आसम केय: "देस ने घेरव्वा वाळो दुस्मन रेहे, अने तीहयो तारी ताखत ने तोड़हे, अने तारा कीला लुटाय जहे।"
12 यहोवा आसम केय: "जे भात्ये चारवा वाळो नाहर ना मोडा मे गेथो बे पोगु नीता कान्टा नो एक टुकड़ो छोड़ावे, तेमेत ईस्रायली माणहु, जे सामर्या मे गोदड़ु ना एक खुणे नीता रेसमी गादी पोर बह्या करे, तीमने बी छोड़ाय लेहे।" 13 सेनाम नो भगवान, मालीक यहोवा आसम केय, "देखो, अने याकुब ना घोराणा ना वीरोद मे आहयी वात चेतावीन केवो: 14 जे टेमे में ईस्रायल ने तीना गुना नो डंड आपही, तीहयीत टेमे में बेतेल नी वेदीम ने बी डंड आपही, अने वेदीम ना ह़ींगड़ा टुटीन भोयमे पड़ जहे। 15 में टाड ना घोर ने अने उनाळा ना घोर, बेम ने ओदारही; अने हाती ना दात वेर बणला घोर बी खत्तम हयहे, अने मोटा-मोटा घोर खत्तम हय जहे," यहोवा आहयु केदलो से।