ईस्रायल नु खत्तम हयणु
1 "गरा तीमनी पोर जे सीय्योन ना चोखला जागा मे सुख सी रेय, अने तीमनी पोर गरा जे सामर्या ना मोट्ला बड़ा पोर बेफीकर्या रेय, तीहया जे वारला राज्य मे नामह़ाद्या से, जीमनी पांह ईस्रायल नु घोराणु आवे। 2 कलने ह़ेर ने जाय्न देखो, अने तां गेथा हमात नाम ना मोट्ला ह़ेर मे जावो; अळतेण पलीस्तीम ना गत ह़ेर मे जावो। ह़ु आहयु तमारा बे राज्य सी वारु से? ह़ु तीमनी काकड़ तमारी काकड़ गेथी मोटी से? 3 तमु बुरा दाड़ा ने सेटो कर देवो, अने बुराय नी गादी ने ह़ाते ली आवो।
4 "तमु हाती दात ना पलंगु पोर ह़ुवो, अने आह़फा-आह़फाम ना गोदड़ा पोर पोगु नाम्बा करीन ह़ुवो, अने गाडरा-बोकड़ा मे गेथा गाडरा अने ढुरु मे गेथा वाछड़ा ने खावो। 5 तमु फेपार्या नी ह़ाते गीत गावो, अने दावुद ने तेम भाती-भाती नी वाजा नी अवाज अक्कल सी नीकाळो? 6 अने कटवरा मे गेथो अंगुर नो माणलो रोह पीवो, अने वारु-वारु तेल लगड़ो, पण युसुफ पोर आव्वा वाळी गरा ना बारा मे ह़मळीन बी दुखी नी हयो। 7 आहया कारण सी तीमने पेले आह़फाम ना देस मे गेथा नीकाळ देहे, अने जे पोग नाम्बा करीन ह़ुवता हता, तीमनी मोटाय जत रेहे।"
8 भगवान यहोवा आह़फा नीत ह़ाम खाय्न केदलो से: "जीनी पोर याकुब घमंड करे, तीनी सी में ह़ीगी, अने तीमना राजाम ना घोरु सी दुस्मनी राखु; अने में आहया ह़ेर ने तीहया आखा भेळ जे तीनी मे से, दुस्मन ना हक मे कर दीही।"
9 कदीम काना घोर मे दह अदमी जीवत्ला बचला रेय, ते बी तीहया मर जहे। 10 जत्यार कोयनो काको, जे तीने धपाड़वा वाळो हय, तीना धोड़ ने घोर मे गेथो नीकाळवा करीन उचलहे, अने जे घोर ना खुणा मे ह़तायलो तीने पुछे, "ह़ु तारी पांह कोय अळी से?" तत्यार तीहयो केहे, "कोय नी हय," तत्यार तीहयो केहे, "होगो रे। आपणु ने यहोवा नु नाम नी लेवा जोवे।"
11 काहाके यहोवा ना हुकम सी मोट्लु घोर ओदरी जहे, अने नान्ला घोर मे चीह पड़ जहे। 12 ह़ु घोड़ा चाफर्या पोर दवड़े? ह़ु कानो आसवा जागा मे बोळद्या वेर जोपे जां तमु नीयाव ने जेहेर मे, अने सच्चाय ना फोळ ने कड़वला फोळ मे बदली देदला से?
13 तमु आसवी चीज ना कारण खुसी मनावो जे फालतु से; अने केवो, "ह़ु आपणु आपणीत ताखत सी करनीम ह़ेर ने नी जीक्या?"
14 आहया कारण सेनाम ना भगवान यहोवा नो आहयो बोल से, "ए ईस्रायल ना घोराणा देख, में तमारा वीरोद मे एक आसवु देस उबु करही, जे हमात नी घाटी गेथा अराबा नी नंदी लग तमने वेला मे नाखहे।"