नेवताळा ना काम 25

फेस्‌तुस नी अगळ पोलुस

1 फेस्‌तुस ते परगणा मे पुगीन तीन दाड़ान अळतेण केसर्‌या गेथो यरुसलेम पुग्‌यो। 2 तां मंदीर नो डायलो पुंजारो अने युहदी माणहु ना नेता आवीन पोलुस पोर गुनो लगाड़्‌या। 3 अने तीहया माणहु फेस्‌तुस पांह आहयी वीन्‌ती कर्‌या के तु पोलुस ने यरुसलेम बोलाव। काहाके तीहया वाट्‌येत पोलुस ने मार नाखवा हींडता हता। 4 बाखीन फेस्‌तुस आहयो जपाप आप्‌यो, "पोलुस केसर्‌या ह़ेर नी जेल मे से। अने मे खुद तां छोटोत जही। 5 एतरे तमु तमारा अदीकार्‌या ने मारी ह़ाते मोकली देवो अने कदीम तीहयो माणेह कंय गुनो कर्‌यो हहे, ता तीहया तां तीनी पोर गुनो लगाड़े तेम।"

6 अने फेस्‌तुस तीमनी वच मे आंठ दह दाड़ा रीन पासो केसर्‌या ज्‌यो, बीजा दाड़े फेस्‌तुस नीयाव नी गादी पोर बहीन सीपायड़ा ने हुकम आप्‌यो के "पोलुस ने बोलाय लावो।" 7 जत्‌यार पोलुस आयो, ता यरुसलेम गेथा आवला युहदी अदीकार्‌या, तीनी च्‌यारो-मेर उबा हय्‌न तीनी पोर ढेरेत गुना लगाड़्‌या। जीनो पुरावो तीहया दी नी सकता हता। 8 पण पोलुस जपाप आप्‌यो, "मे युहदी कायदा ना बी, अने मंदीर ना बी, अने राजा केसर ना बी वीरोद मे कंय गुनो नी कर्‌यो।"

9 बाखीन फेस्‌तुस युहदी माणहु ने खुस करवा करीन पोलुस ने पुछ्‌यो, "तु यरुसलेम जवा तीयार से ह़ु, जीनी सी तां मारी अगळ आहयी वात नो नीयाव हये तेम?"

10 पोलुस जपाप आप्‌यो, "मे राजा केसर नीयाव करे, तीहयी गादी अगळ उबो हय र्‌यो, एतरे मारो नीयाव आञेत हयवा जोवे। जीसम तने मालम से के मे युहदी माणहु नु कंय बी गलत नी कर्‌यो। 11 कदी मे गुनाळ्‌ळो हय, अने मोत नो डंड जड़े एसवो गुनो कर्‌यो हय, ता मे मरवा तीयार से; पण कदीम जे वात मे आहया मार पोर गुनो लगाड़ र्‌या, तीहयी वात ह़ाची नी हय ता, कोय बी मने हीमना सुपरत नी कर सके: मे केसर राजा अगळ नीयाव जुगु उबो हयवा नी वीन्‌ती करु।"

12 फेस्‌तुस बठक ना मंतर्‌या ह़ाते वीच्‌यार काडीन पोलुस ने आहयो जपाप आप्‌यो, "तु केसर राजा अगळ नीयाव जुगु उबो हयवा नी वीन्‌ती करलो से, एतरे तने केसर राजान तांत पुगाड़ देहु।"

अगरीपा अने तीनी बेनेह बीरनीके अगळ पोलुस

13 थोड़ाक दाड़ा वीतवान अळतेण राजो अगरीपा, तीनी बेनेह बीरनीके ह़ाते नवला राजा फेस्‌तुस ने भेटवा करीन केसर्‌या आया। 14 तीहया तां ढेरेत दाड़ा री लेदा अने अळतेण फेस्‌तुस राजो पोलुस ना बारा मे अगरीपा राजा ने आहयु केदो, "फेलीक्‌स आञे एक अदमी ने जेल मेत रेवा दीन जत रेलो से। 15 जत्‌यार मे यरुसलेम मे हतो, ता पुंजारा अने युहदी माणहु ना पुडार्‌या तीनी पोर गुनो लगाड़्‌या, अने केदा के हीने डंड आप। 16 पण मे तीमने जपाप आप्‌यो, के ‘रोमी माणहु नी आहयी रीती नी हय के गुनो लगाड़न्‌या ने अने गुनो करन्‌या ने आंबा-सांबा उबा करीन तीमनी सुनवाय कर्‌या वगर डंड आप देय।’ 17 एतरे जत्‌यार तीहया भेळा हये, ता जादा वार नी लगाड़्‌यो, पण बीजा दाड़े नीयाव नी गादी पोर बह ज्‌यो, अने तीहया माणेह ने लाव्‌वा नो हुकम आप्‌यो। 18 बाखीन गुनो लगाड़न्‌या उबा हय्‌न तीनी पोर गुनो लगाड़्‌या, ता तीहया बुरी वात नो गुनो नी लगाड़्‌या जीसम मे ह़मजी रेलो। 19 पण तीहया तीमना भरहान धरम ना बारा मे अने ईसु नाम ना माणेह ना बारा मे वात मे जखड़ी पड़ीन गुनो लगाड़ र्‌या हता, काहाके ईसु नाम नो माणेह जे मर जेलो तीने पोलुस मरला मे गेथो जीवतो हय ज्‌यो करीन केतो हतो। 20 तीमनी वात नी झटा-पटी ह़मळीन मने ह़मज मे नी पड़्‌यु के आहयी वात नो पतो कीसम लगाड़ु? एतरे मे तीने पुछ्‌यो, तु यरुसलेम जही ह़ु, तां आहयी वात नो नीयाव हय सके तेम? 21 बाखीन पोलुस केदो, के ‘मे मोट्‌ला राजा अगळ नीयाव जुगु उबो हयवा नी वीन्‌ती करु।’ ता मे सीपायड़ा ने हुकम आप्‌यो के जत्‌यार लग मे आने केसर ने तां नी मोकली देम, तां लग तमु आनी रखवाळी करो।"

22 ता अगरीपा फेस्‌तुस ने केदो, "मे हीय्‌या माणेह नी वात ह़मळवा हींडु।" तीहयो केदो, "तु काले ह़मळ लेजे।"

23 बीजा दाड़े अगरीपा अने तीनी बेनेह बीरनीके रोमो-झोमो हय्‌न सीपायड़ा ना सुबेदार अने ह़ेर ना डायला माणहु ह़ाते तां आय लाग्‌या। ता फेस्‌तुस सीपायड़ा ने हुकम आप्‌यो, "पोलुस ने ली आवो।" 24 फेस्‌तुस केदो, "ए राजा अगरीपा, अने आखा माणहु जे हजुर से। तमु आहया माणेह ने देख र्‌या, जीना बारा मे आखा युहदी माणहु यरुसलेम ह़ेर मे अने आञे बी आड़ी-आड़ीन मारी सी रावण्‌या करीन केदा, ‘आने मार नाखो। आने जीवत्‌लो रेवा वारु नी हय। 25 पण मे जाण लेदो के आहयो मोत नो डंड जड़े एसवो कंय बी गुनो नी कर्‌यो पण ते बी तीहयो आफोत आसम वीन्‌ती कर्‌यो के मे मोट्‌ला राजा अगळ नीयाव जुगु उबो हयवा से।’ ता मे आने मोट्‌ला राजान तां मोकलवा नो फेसलो कर्‌यो। 26 पण मोट्‌ला राजा ने आना बारा मे लीखीन ली मोकलवा जुगु कंय पुरावो नी जड़्‌यो। एतरे मे हीने तारी अगळ अने खास करीन ए राजा अगरीपा तारी अगळ लावलो से। आनी पारख करवा ना अळतेण लीखवा जुगु कंय ने कंय पुरावो जड़े तेम। 27 मारो वीच्‌यार से के जे माणेह ने गुनाळ्‌ळो ह़मजीन धरीन हातकड़ी लगाड़ला से, तीना बारा मे ‘आहयो ह़ाचलीन गुनाळ्‌ळो से’ करीन चीट्‌ठी लीख्‌या वगर मोट्‌ला राजान तां मोकलवा वारु नी हय।"