1 पतरस अने युहन्‌नो माणहु ने केवा बाज रेला, ता पुंजारो, मंदीर रखवाळ्‌यो डखी, अने सदुकी पंथवाळा माणहु तीमनीन्‌तां जोर करीन आय लाग्‌या। 2 पतरस अने युहन्‌नो ईसु मर्‌या-ह़र्‌या मे गेथो जीवतो हय ज्‌यो करीन मर्‌या-ह़र्‌या मे गेथो जीवतो हय्‌न बठो हयवान बारा मे ईसु नो दाखलो देखाड़ीन परच्‌यार करता हता। एतरे तीहया घण-जबर रीहवाय र्‌या हता। 3 एतरे तीहया पतरस अने युहन्‌ना ने धरीन बीजा दाड़े लग कुंड़वाड़ा मे कुंड देदा, काहाके ह़ांज हय जेली हती। 4 पण जे तीमनी ह़ीकापण ह़मळी र्‌या हता, तीमनी मे गेथा ढेरेत जणा ईसु पोर भरहो कर्‌या, अने ईसु पोर भरहो करन्‌या अदमड़ा-अदमड़ा पांचेक हजार हय जेला।

5 बीजा दाड़े यरुसलेम मे राज करन्‌या मुखी नी, अने पुडारी नी, अने युहदी-धरम ह़ीकाड़न्‌या नी बठक हयी। 6 अने ता ह़ारीक भगवान नो डायलो पुंजारो हन्‌ना, अने केफा, अने युहन्‌नो, अने सीकंदर अने मुखी पुंजारा ना घोरल्‌या बी आखा यरुसलेम मे भेळा हया। 7 तीहया चेला ने आखा ना वच मे उबा करीन पुछवा बाज ज्‌या "तमु काना हक सी अने काना नाम सी आहयु करला से?"

8 तत्‌यार पतरस चोखली आत्‌मा ना कब्‌जा मे हय्‌न तीमने केदो, ए माणहु ना मुखी अने डायला! 9 एक लंगड़ा माणेह नु भलु हयलु से, ईना बारा मे आज आमने तमु पुछवा बाज र्‌या के आहयो कीसम आरगो हयलो से, 10 ता तमु आखा ने अने ईस्‌रायली जाती ना माणहु ने मालम हय जवा जोवे के आहयो लंगड़ो माणेह ईसु मसी नासरी ना नाम सी आरगो हय्‌न तमारी अगळ उबो हय र्‌यो। जीने तमु तीहया कुरुस पोर चड़ावीन खुटा ठोकीन मार नाखला, अने भगवान तीने मर्‌या-ह़र्‌या मे गेथो पासो जीवतो कर्‌यो। 11 आहयो ईसु तीहयो दगड़ो से, जे दगड़ा ने राज मीसतर्‌या रीकामो ह़मजीन बारथो काड देदा,

तीहयो दगड़ोत घोर ना नीव नो,

खुणे वाळो दगड़ो बण ज्‌यो।

12 एतरे ईसु ने सोड़ीन काना बी बीजा माणेह ना लारे पाप नो छुटकारो नी जड़े, काहाके ह़रग ने हेटु आहयी आखी कळी मे ईसु ने सोड़ीन बीजु नामेत नी हय, तीहया नाम सी आपणु ने पाप मे गेथो छुटकारो जड़ सके।

13 जत्‌यार युहदी मुखी पतरस अने युहन्‌ना नी हीम्‌मत देखीन वहराय ज्‌या, काहाके आहया ते भणला नी हता अने ह़ुदला माणहु से, पण अळतेण मालम पड़्‌यु के आहया ते ईसु ह़ाते रेला हता। 14 बाखीन आरगो हयला माणेह ने तीमनी भेळतो उबो हय रेलो देखीन, तीमने जपाप मे कंय नी केवायु। 15 पण तीहया पतरस अने युहन्‌ना ने बठक मे गेथा बारा मोकली देदा अने आह़फा-आह़फात आहयो वीच्‌यार काड्‌या, 16 के "आमु ईमने ह़ु करया ने ह़ु नी? काहाके यरुसलेम मे रेण्‌या आखा माणहु ने आहयो पतो हय जेलो से के आहया एक घणा जुदा-काम नी सेलाणी देखाड़ला से; अने आपणु ने आहया काम नो नीकारो करते नी बणे। 17 पण ते बी आहयी वात नो वदु परच्‌यार माणहु मे नी हयवा जोवे, करीन आपणु ईमने धमकाय देता, के तमु आहया ईसु नु नाम लीन कोय ह़ाते वात ना करो।"

18 ता तीहया पतरस अने युहन्‌ना ने अळी बोलाव्‌वा मोकल्‌या अने तीमने हुकम आपीन केदा, के तमु ईसु नु नाम लीन कोय ह़ाते वात बी नी करजो, अने कोयने ह़ीकाड़जो बी नी। 19 पण पतरस अने युहन्‌नो तीमने आहयो जपाप आप्‌या, "तमु ते नीयाव करीन केवो, आमने भगवान नी नींगा मे, भगवान नी ह़मळवा रेवा दीन तमारी ह़मळवा ताले रेहे ह़ु? 20 काहाके आमु जे देखला अने ह़मळ्‌ळा से, तीना बारा मे नी कीया, आसम हय नी सके।" 21 तत्‌यार तीहया अळी पतरस अने युहन्‌ना ने धमकाय्‌न सोड़ देदा, काहाके तीमने डंड आपवा नु कंय बी बोनु नी जड़्‌यु, एतरे जे घटना हयली हती तीना कारण सी आखा माणहु भगवान नी बड़ाय करता हता। 22 काहाके तीहया जुदा-कामु नी सेलाणी ना लारे जे माणेह ने अरगाय जड़ली हती, तीनी उमर चाळीह साल गेथी वदु हती।

23 जत्‌यार तीहया पतरस अने युहन्‌ना ने सोड़ देदा, ता पतरस अने युहन्‌ना तीमना ह़ातीन तां आया, अने जे कंय पुडार्‌या अने भगवान ना डायला पुंजारा केदला, तीहयु आखु तीमने की देदा। 24 आहयु ह़मळीन पतरस अने युहन्‌ना अने तीमना ह़ाती आखा मेळीन एकीत रींग मे भगवान सी आहयी वीन्‌ती कर्‌या, ए मालीक, तुत ह़रग अने धरती, अने दर्‌या अने दर्‌या मे जे कंय से, तीहयु आखु बणावलो से। 25 तु चोखली आत्‌मान लारे आह़फा ना पावर्‌या दावुद ना मोडे आहयु केदलो हतो,

बीजी जाती ना माणहु फालतुत कुहराये काहा आड़े?

आखा देसु ना माणहु फाल्‌तु वीच्‌यार काहा कर र्‌या।

26 धरती ना राजा अने देस-देस मे राज करन्‌या आखा भेळा हया,

तीहया मालीक भगवान भणी

अने तीना टाळला राजा भणी जोर करे।

27 ✝ 4:27 लुका 23:7-11; मत्‌ती 27:1,2; मरकुस 15:1; लुका 23:1; युहन्‌ना 18:28,29 काहाके तीहया ह़ाचलीन, तारा चोखला पावर्‌या ईसु ना वीरोद मे हय्‌न जाळसादी बणाय र्‌या, जीने तु टाळलो से, हेरोद अने पुन्‌तीयुस पीलातुस, अने आड़जात्‌या अने ईस्‌रायली जाती ना माणहु ह़ेर मे भेळा हय र्‌या। 28 हाव तीहया आनीन करते भेळा हय र्‌या के जे कंय तारी ताखत अने मरजी सी पेले गेथुत ठेरावलु से, तीहयु पुरु करो। 29 ए मालीक हाव, तु ईमनी धमकी ने देख, अने तारा गुलाम पावर्‌या ने आहयो वाटो आप के तीहया तारा बोलु ने बीह्‌या वगर पुरु मन लगाड़ीन ह़मळावे तेम। 30 अने तु माणहु ने आरगा करवा करीन आह़फा नो हात अगो कर; अने तारा चोखला पावर्‌या ईसु ना नामे, सेलाणी अने सेल-भात्‌या जुदा-कामु देखाड़।

31 तत्‌यार तीहया भगवान ह़ाते वीन्‌ती करीन नवराय ज्‌या, ता तीहयो जागो, जां तीहया भेळा हय रेला, हील पड़्‌यो, अने चोखली आत्‌मा तीमनी मे पुरीन-पुरी भराय्‌न तीमने कब्‌जा मे कर लेदी, अने तीहया हीम्‌मत सी भगवान ना बोल माणहु ने ह़मळावा बाज ज्‌या।

32 ✝ 4:32 नेवताळा ना काम 2:44,45 ईसु पोर भरहो करन्‌या माणहु एक-मन्‌या अने एक जीव्‌या रीन रेता हता। कोय बी आपणा धन ने आपणु नी ह़मजत्‌ला। जे कंय तीमनी पांह रेत्‌लु, तीनी मे आखा नो साजो हतो। 33 ईसु ना नेवताळा पुरो जोर लगाड़ीन मालीक ईसु मर्‌या-ह़र्‌या मे गेथो जीवतो हय्‌न बठो हयवा नी गवा देत्‌ला, अने तीहया आखा पोर भगवान नी मोट्‌ली दया हती। 34 अने तीमनी मे कोय बी गरीब नी हतो, काहाके तीमनी पांह खेतर नीता घोर हतु, तीने तीहया वेच देत्‌ला। 35 अने तीमनो दाम लावीन ईसु ना नेवताळा ना पोगुन तां लावीन मेक देत्‌ला; अने जीने जे जोवत्‌लु तीहयु तीमने वाट देत्‌ला।

36 युसुफ नाम नो एक लेवी हतो, तीहयो कुपरुस मे पयदा हयलो हतो, तीनु नाम ईसु ना नेवताळा बरनाबास पाड़ला हता। बरनाबास नु मतलब सांती आपण्‌या नो बेटो। 37 तीनी थोड़ीक जागा हती तीने तीहयो वेच्‌यो, अने कीमत ना पय्‌हा लाय्‌न नेवताळा ना पोगु मे मेल देदो।