28 के लाडा ने खुद नी लाडी सी तीसमेत मोंग करवु जोवे। जीसम तीहयो आह़फा ना डील ने करे। एक अदमी जे खुद नी लाडी ने मोंग करे तीहयो आह़फा सी मोंग करे। 29 काहाके काना बी आह़फा ना डील ह़ाते रीह नी राखे पण तीने पाळे-पोहे, जीसम मसी बी मंडळी ह़ाते करे। 30 आनीन करते के आमु तीना डील नो वाटो से। 31 "जीसम के सास्‌तर केय, अदमी आह़फा ना आय्‌ह-बाहा ने सोड़ीन आह़फा नी घोरवाळी ह़ाते मेळीन रेहे, अने तीहया बेम एक डील हय जहे।"* 32 आहयी ते घण-जबर खास वात से, पण मे आञे मसी अने मंडळी ना बारा मे वात केम। 33 पण तमारी मे गेथो एक-एक जणो तमारी लाडी सी आह़फा नी तेम मोंग करवु जोवे, अने हरेक लाडी ने बी आह़फा ना लाडा नी ईज्‌जत करवु जोवे।