1 जत्‌यार यरुसलेम नो राजो अदोनीसेदेक ह़मळ्‌यो के यहोसु ए ह़ेर ने हक मे कर लेदो, अने तीने खत्‌तम कर देदलो से, अने जेम तीहयो यरीहो अने तीना राजा ह़ाते करलो तेमेत ए ह़ेर ह़ाते अने तीना राजा ह़ाते बी कर्‌यो, अने आहयु बी ह़मळ्‌यो के गीबोन ना रेवा वाळा ईस्‌रायल ना माणहु नी ह़ाते मळ जेला से, अने तीमनी ह़ाते रेवा बाज ज्‌या, 2 ता तीहया घणा बीह ज्‌या, काहाके गीबोन मोट्‌लु ह़ेर अने तीनी मे बी राजो राज करतो हतो अने ए ह़ेर गेथु बी मोटु हतु, अने तीनी मे रेवा वाळा आखा झुमायण्‌या सीपायड़ा हता। 3 करीन यरुसलेम नो राजो अदोनीसेदेक हेब्‌रोन ना राजा होहाम, यर्‌मुत ना राजा पीराम, लाकीस ना राजा यापी, अने एग्‌लोन ना राजा दबीर ने तां आहयु की मोकल्‌यो: 4 "मारीन्‌तां आवीन मारी मदत करो, अने चालो आपणु गीबोन ह़ेर ने हरावता; काहाके गीबोन ना रेवा वाळा यहोसु अने ईस्‌रायली ह़ाते मेळ कर लेदला से।" 5 करीन यरुसलेम, हेब्‌रोन, यर्‌मुत, लाकीस, अने एग्‌लोन ना पांचोव एमोरी राजा आह़फा-आह़फाम ना आखा झुमायवा वाळा टोळा एक्‌ठा करीन तीमनी भणीन जी लाग्‌या, अने गीबोन ह़ेर अगळ पड़ावा नाखीन तीमनी ह़ाते झुमायवा करीन चालु कर देदा।

6 ता गीबोन ना रेवा वाळा गीलगाल ना पड़ावा मे यहोसुन्‌तां आहयु की मोकल्‌या, "तारा चाकर्‌या भणीन गेथो तारो हात सेटो नी करजे; साटोत अमारीन्‌तां आवीन आमने बचाड़ ले, अने अमारी मदत कर; काहाके बड़ा पोर रेवा वाळा एमोरी ना आखा राजा अमारा वीरोद मे एक्‌ठा हयला से।" 7 ता यहोसु आखा टोळा ने अने आखा ताखत वाळा झुमायण्‌या ने ह़ाते लीन गीलगाल गेथो चाल पड़्‌यो। 8 अने यहोवा भगवान यहोसु ने केदो, "तीमनी सी ना बीहे, काहाके मे तीमने तारा हात मे कर देदलो से; तीमनी मे गेथो एक अदमी बी तारी अगळ टेकी नी सके।" 9 ता यहोसु गीलगाल गेथो रात भर चालीन आयो अने उचकालेत तीमनी पोर हमलो कर देदो। 10 ता यहोवा भगवान आसम कर्‌यो के तीहया ईस्‌रायल ना माणहु ने देखीन घबराय ज्‌या, अने ईस्‌रायल ना माणहु तीमने गीबोन ह़ेर मे घणा ठोक्‌या, अने बेथोरोन ना चड़ाव पोर तीमनी पसळ जाय्‌न अजेका अने मक्‌केदा तक तीमने ठोकता ज्‌या। 11 अळतेण जत्‌यार तीहया ईस्‌रायल ना माणहु नी अगळ गेथा नाहीन बेथोरोन ना उतार पोर आया, ता अजेका पुगते तक यहोवा भगवान तीमनी पोर वादळा मे गेथा मोट्‌ला-मोट्‌ला गारा पाड़्‌यो, अने तीहया मर ज्‌या; जे गारा सी मरला माणहु ईस्‌रायल ना माणहु नी तलवार सी मारला तीमनी गेथा जादा हता।

12 तीहयी टेमे, मतलब जे दाड़े यहोवा भगवान एमोरीयो ने ईस्‌रायलीम ना हक मे कर देदो, तीहया दाड़े यहोसु यहोवा भगवान ने ईस्‌रायल ना माणहु नी देखणते आहयी रीते केदो, "ए दाड़ु, तु गीबोन पोर, अने ए चांद, तु अय्‌यालोन नी घाटी पोर उबो री रे।" 13 अने दाड़ु तीहयी टेमे तक उबु री र्‌यु, अने चांद तीहयी टेमे तक उबो हय र्‌यो, जत्‌यार तक तीहयी जाती ना माणहु तीना वेरी ह़ाते बदलो नी ली लेदा। ह़ु आहयी वात यासार नाम नी कीताप मे नी लीखली हय के दाड़ु वादळु नी वचा-वच उबु री ज्‌यु, अने तीहयु आखी दाड़ो तक नी डुब्‌यु?✝ 14 नी ते ईनी गेथो पेले आवो दाड़ो आयो अने नी आनीन अळतेण, जीनी मे यहोवा भगवान काना माणेह नी वात ह़मळ्‌यो हय; काहाके यहोवा ते ईस्‌रायल ना माणहु नी भणी गेथो झुमायतो हतो।

15 ता यहोसु आखा ईस्‌रायल ना माणहु भेळ गीलगाल ना पड़ावा मे पासो जत र्‌यो।

16 तीहया पांचोव राजा नाहीन मक्‌केदान्‌तां वाळा दोर मे जाय्‌न ह़ताय ज्‌या। 17 ता यहोसु ने आहयी खबर जड़ी, "पांचोव राजा मक्‌केदान्‌तां वाळा दोर मे ह़ताय रेला आमने जड़ला से।" 18 यहोसु केदो, "दोर ना मोडा पोर मोट्‌ला-मोट्‌ला दगड़ा गबड़ाय्‌न तीमनी देख-रेख करवा करीन थोड़ाक माणहु ने तां बहाड़ देवो; 19 पण तमु ना रेवो, तमारा वेरीम नी पसळ जाय्‌न तीमनी मे गेथा जे पसळ री जेला से तीमने मार देवो, तीमने तीमना ह़ेर मे जवा नो मोखो ना आपो; काहाके तमारो भगवान यहोवा तीमने तमारा हात मे ह़ोप नाखलो से।" 20 जत्‌यार यहोसु अने ईस्‌रायल ना माणहु तीमने मारीन खत्‌तम कर देदा, अने तीमनी मे गेथा जे बच जेला तीहया आह़फा-आह़फाम ना कीला वाळा ह़ेर मे भराय ज्‌या, 21 ता आखा माणहु मक्‌केदा ना पड़ावा मे यहोसुन्‌तां पासा वारला आवती‌ र्‌या; अने ईस्‌रायल ना माणहु ना वीरोद मे कोय बी एक सब्‌द तक नी बोल्‌या।

22 ता यहोसु हुकम आप्‌यो, "दोर नु मोडु उगाड़ीन तीहया पांचोव राजा ने मारीन्‌तां नीकाळ लावो।" 23 तीहया तेमेत कर्‌या, अने यरुसलेम, हेब्‌रोन, यर्‌मुत, लाकीस, अने एग्‌लोन ना तीहया पांचोव राजा ने दोर मे गेथा तीनीन्‌तां नीकाळीन ली आया। 24 जत्‌यार तीहया ते राजाम ने यहोसुन्‌तां नीकाळ लाया, ता यहोसु ईस्‌रायल ना आखा अदमी ने बोलावीन आह़फा नी ह़ाते चालवा वाळा झुमायवा वाळा ना मुख्‌या ने केदो, "ह़ाते जाय्‌न आह़फा-आह़फाम ना पोग आहया राजाम ना बोचा मे मेको।" अने तीहया ह़ाते जाय्‌न आह़फा-आह़फाम ना पोगु तीमना बोचा मे मेक्‌या। 25 ता यहोसु तीमने केदो, "बीहो ना, अने तमारु मन काचु ना करो; हीम्‌मत राखीन वातड़ा रेवो; काहाके यहोवा तमारा आखा वेरी ह़ाते जीमनी ह़ाते तमु झुमायवा वाळा से आसमेत करहे।" 26 आनीन अळतेण यहोसु तीमने मराय नाख्‌यो, अने पांच झाड़का पोर टांग देदो। अने तीहया ह़ांता तक झाड़का पोर टंगायला र्‌या। 27 दाहड़ु बुडते-बुडते यहोसु पांह गेथो हुकम मांगीन माणहु तीमने झाड़का पोर गेथा उतारीन तीहयात दोर मे जां तीहया ह़ताय जेला हता घाल देदा, अने तीहया दोर ना मोडा पोर मोट्‌ला-मोट्‌ला दगड़ा मेक देदा, तीहया आज तक तांत मेकला से।

28 तीहयात दाड़े यहोसु मक्‌केदा ह़ेर ने हराय नाख्‌यो, अने तीनी मे रेवा वाळा ने अने तीना राजा ने खत्‌तम कर देदो; अने जेतरा जीव तीनी मे हता तीमनी मे गेथा कोय ने बी जीवत्‌ला नी सोड़्‌यो; अने जेम तीहयो यरीहो ना राजा ह़ाते करलो तेमेत मक्‌केदा ना राजा ह़ाते बी कर्‌यो।

29 ता यहोसु आखा ईस्‌रायली माणहु भेळ मक्‌केदा गेथो चालीन लीब्‌ना ह़ेर भणी ज्‌यो, अने लीब्‌ना ह़ेर वाळा ह़ाते झुमायो; 30 अने यहोवा लीब्‌ना ह़ेर ने बी राजा भेळ ईस्‌रायल ना माणहु ना हात मे कर देदो; अने यहोसु तीहयु ह़ेर ने अने तीनी मे ना आखा जीव ने तलवार वेर मार्‌यो; अने एक ने बी जीवत्‌लु नी सोड़्‌यो; अने तीना राजा ह़ाते तेमेत कर्‌यो जेम तीहयो यरीहो ना राजा ह़ाते करलो।

31 अळतेण यहोसु आखा ईस्‌रायल ना माणहु भेळ लीब्‌ना गेथो चालीन लाकीस ह़ेर ज्‌यो, अने तीना वीरोद मे पड़ावा नाखीन झुमायो; 32 अने यहोवा भगवान लाकीस ह़ेर ने ईस्‌रायल ना हक मे कर देदो, अने बीजा दाड़े तीहयु ह़ेर यहोसु जीक लेदो; अने जेम तीहयो लीब्‌ना ना आखा जीव ने तलवार वेर मारलो हतो तेमेत तीहयो लाकीस ह़ेर वाळा ह़ाते बी कर्‌यो।

33 ता गेजेर ह़ेर नो राजो होराम लाकीस ह़ेर वाळा नी मदत करवा करीन आय लाग्‌यो; अने यहोसु तीना माणहु भेळ तीने बी आसम मार्‌यो के तीनी जुगु कोय ने जीवत्‌लो नी छोड़्‌यो।

34 अळतेण यहोसु आखा ईस्‌रायल ना माणहु भेळ लाकीस ह़ेर गेथो जाय्‌न एग्‌लोन ह़ेर ज्‌यो; अने तीना वीरोद मे पड़ावा नाखीन झुमायवा बाज ज्‌यो; 35 अने तीहयात दाड़े तीहयो ते ह़ेर ने हक मे कर लेदा, अने तीनी मे रेवा वाळा ने तलवार वेर मार्‌यो; अने तीहयात दाड़े जेम तीहयो लाकीस ना आखा जीव ने खत्‌तम कर देदलो हतो तेमेत तीहयो एग्‌लोन ना रेवा वाळा ह़ाते बी कर्‌यो।

36 अने यहोसु आखा ईस्‌रायल ना माणहु भेळ एग्‌लोन गेथो चालीन हेब्‌रोन ह़ेर ज्‌यो, अने तीहया ह़ेर वाळा ह़ाते झुमायवा बाज ज्‌यो; 37 अने तीहया तीहयु ह़ेर ने हक मे कर लेदा, अने तीहयु ह़ेर ने अने तीना आखा राजा ने अने आखा गामु ने तीमनी मे गेथा आखा जीव ने तलवार वेर मार नाख्‌यो; जेम यहोसु एग्‌लोन वाळा ह़ाते कर्‌यो तेमेत तीहयो हेब्‌रोन मे बी कोय ने जीवत्‌ला नी रेवा देदो; तीहयो ह़ेर ने अने तीनी मे ना आखा जीव ने खत्‌तम कर देदो।

38 ता यहोसु आखा ईस्‌रायल ना माणहु भेळ फीरीन दबीर ह़ेर मे ज्‌यो, अने तीमनी ह़ाते झुमायवा बाज ज्‌यो; 39 अने राजा भेळ तीने अने तीना आखा गाम ने हक मे कर लेदो; अने तीहया तीमने तलवार वेर मार्‌यो, अने जेतरा जीव ह़ेर मे हता तीमने आखा ने खत्‌तम कर देदो; कोय ने बी जीवत्‌ला नी छोड़्‌यो, जेम यहोसु हेब्‌रोन अने लीब्‌ना अने तीना राजा ह़ाते करलो हतो तेमेत तीहयो दबीर अने तीना राजा ह़ाते बी कर्‌यो।

40 आहयीत रीते यहोसु तीहया आखा देस ने, मतलब बड़ा मे वाळु देस, दखणाव देस, हेट्‌लु देस, चवगान मेना देस ने, तीमना आखा राजा भेळ मार्‌यो; अने ईस्‌रायल ना भगवान यहोवा ना हुकम नी अनसारे कोय ने बी जीवत्‌ला नी छोड़्‌यो, अने जेतरा जीव हता आखा ने खत्‌तम कर देदो। 41 अने यहोसु कादेसबर्‌ने ह़ेर गेथो गाजा तक, अने गीबोन तक ना आखा गोसेन देस ना आखा माणहु ने मार्‌यो। 42 आहया आखा राजा ने तीमना देस भेळ यहोसु एकीत टेम मे हक मे कर लेदो, काहाके ईस्‌रायल नो भगवान यहोवा ईस्‌रायल ना माणहु भणी गेथो झुमायतो हतो। 43 ता यहोसु आखा ईस्‌रायल ना माणहु भेळ गीलगाल ना पड़ावा मे पासो आवती र्‌यो।