Marcos 11

यरुसलेम मे जीक आवी

1 अळतेण ईसु अने चेला, अने ह़ाते चालन्‌या माणहु यरुसलेम ह़ेर धेड़े जेतुन नाम ना बड़ा पोर बेतफगे अने बेतन्‌या गाम धेड़े पुग्‌या, ता ईसु आह़फा ना चेला मे गेथो बे चेला ने ईसम कीन मोकल्‌यो, 2 "तमु ह़ेलु ह़ाम्‌बु देखाये, तीना गाम मे जावो, अने गाम मे पुगतेत तमने एक एवु पाठड़ु गदड़ु बांद मेकलु देखाव पड़हे; तीनी पोर हजु लग कोय नी बह्‌यु। तीहयु पाठड़ु गदड़ु ने सोड़ लावो। 3 कदीम कोय तमने पुसे के ईने ह़ु करवा सोड़ र्‌या? ता तमु केजो, मालीक ने आहयु पाठड़ु गदड़ु जोवे; अने मालीक आहयु गदड़ु ने छोटोत पासु ली मोकल्‌हे।"

4 अने तीहया बे चेला जाय्‌न तीहया पाठड़ा गदड़ा ने वाट धेड़े आंगणा नी वाड़ी ना झापला पोर बांद मेकलु देखीन सोड़वा बाज ज्‌या। 5 अने तां उबा हय र्‌या हता, तीमनी माय्‌न काना केवा बाज ज्‌या, "पाठड़ा गदड़ा ने सोड़ीन ह़ु करवा हय र्‌या?"

6 जीसम ईसु तीमने केदलो तेमेत तीमने की देदा; अने तीहया चेला ने पाठड़ु गदड़ु लीजवा देदा 7 अने तीहया बे चेला पाठड़ु गदड़ु ने ईसुन्‌तां ली ज्‌या अने तीहया आह़फा ना लुगड़ा गदड़ु पोर नाख देदा। अने ईसु तीहयु पाठड़ु गदड़ु पोर बह ज्‌यो। 8 अने घणा ढेरका माणहु आह़फा ना लुगड़ा ईसु अगळ वाट पोर आथरी देदा अने बीजा माणहु खेतर ना ह़ेडे गेथा पान्‌टा वाळा डाळ्‌या वाडीन लाया अने आथरी देदा। 9 जे बी ईसु ना अगळ-अगळ अने पसळ-पसळ जता हता, तीहया आड़ी-आड़ीन केता हता, "होसन्‌ना, बरकत वाळो से तीहयो, जे मालीक भगवान ना नामे आवे!✝11:9 भजन सहीता 118:25,26 10 जुगाळो से आपणा डायला बाह दावुद नु राज जे आव्‌वा बाज र्‌यो। आखा मे उचा ह़रग मे होसन्‌ना।"

11 अने ईसु यरुसलेम पुगीन मंदीर मे ज्‌यो; अने च्‌यारो-मेर भाळीन तां वाळु आखु चीज ने देख्‌यो, ता दाहड़ु डुबवात वाळु हतु, एतरे ईसु चेला ह़ाते बेतन्‌या गाम मे जत र्‌यो।