1 अने अराम नो दाड़ो खत्‌तम हय ज्‌यो, अने ह़ांती टेमे मरीयम मगदलीनी, सलोमी, अने याकुब नी आय्‌ह मरीयम, गंदाण्‌यो मसालो ईसु ना धोड़ पोर चोपड़वा करीन वेचातो लेदी। 2 अने ह़वारे वेगात, हप्‌ता ना पेल्‌ना दाड़े, आहया बयरा दाहड़ु उगतेत मड़ाट्‌यान्‌तां ज्‌या। 3 अने बयरा आहयी वात केता-केता जता हता, "के अमारी वाटु मड़ाट्‌या ना झापला पोर लगाड़लो मोट्‌लो दगड़ो कोय ढबळावीन सेटो करहे?" 4 जत्‌यार तीहया मड़ाट्‌यान्‌तां पुग्‌या ता तीहया घण मोटा दगड़ा ने मड़ाट्‌या ना झापला पोर गेथो सेटो ढबळाय मेकलो देख्‌या! 5 अने जत्‌यार तीहया मड़ाट्‌या मे ज्‌या, ता तीहया ह़रगदुत ने धोळ्‌ळा लुगड़ा मे जुवान्‌या माणेह नी तेम जमणी धेड़े बह रेलो देख्‌या। अने तीहया बीही ज्‌या!

6 तीहयो तीमने केदो; बीहो ना, तमु ते नासरत वाळा ईसु ने ह़ोदवा बाज र्‌या, जीने कुरुस पोर चड़ावला हता! तीहयो पासो जीवतो हय जेलो से; तीहयो आञे नी हय; देखो, तीहयो आहयो जागो से, जां ह़ारीक तीने वगे करला हता। 7 ✝पण तमु हाव जावो अने पतरस ने अने ईसु ना बीजा चेला ने केवो, के तीहयो ईसु तमारी गेथो पेले गलील जीला मे जहे; जीसम तीहयो तमने केदलो हतो, "तीहयो तमने गलील जीला मे भेटहे।"✝

8 आहयु आखु देखीन अने ह़मळीन, तीहया बयरा घण-जबर बीही ज्‌या, अने तीहया कापता अने घबरायता जीन मड़ाट्‌या मे गेथा नाह ज्‌या, अने वाट्‌ये कोयने कंय नी केदा।

9 हप्‌ता ना पेल्‌ना दाड़े ह़वारे वेगोत ईसु जीवतो हय्‌न मरीयम मगदलीनी ने देखाव पड़्‌यो जीनी मे गेथो तीहयो ह़ात भुत नीकाळ्‌ळो हतो। 10 हाव ईसु ना चेला वीखा मे हय्‌न रड़वा बाज र्‌या हता। तीहयीत टेमे मरीयम मगदल्‌नी तीमनीन्‌ता जीन ईसु जीवतो हय ज्‌यो करीन केदी; 11 पण ईसु जीवत्‌लो से अने तीहयी तीने देखली से, ईसम ह़मळीन बी तीहया भरहो नी कर्‌या।

12 अळतेण तीहया चेला मेना बे जणा गाम भणी जवा बाज रेला, तत्‌यार ईसु आह़फा नो वेह़ बदलीन तीमने देखाव पड़्‌यो। 13 तीहया बे जणा बीजा चेला ने आहयी वात नी खबर कर्‌या। पण ते बी बीजा, तीमनी वात पोर बी भरहो नी कर्‌या।

14 अळतेण जत्‌यार तीहया ग्‌यारे नेवताळा खाणु खावा बाज रेला ता ईसु तीमने बी देखाव पड़्‌यो, अने ईसु तीमनो वण-भरहो अने मन नी ठटाय देखीन वडतो जाय्‌न केदो, "जे मने जीवतो हय्‌न बठो हयलो देखला, तमु तीमनी वात पोर भरहो काहा नी कर्‌या?" 15 ✝तत्‌यार ईसु तीमने हुकम आपीन केदो, "तमु आखी कळी मे जाय्‌न, आखा माणहु ने बमदीन खुस-खबर ह़मळावो।✝ 16 जे भरहो करहे अने बपतीस्‌मा नी रीती लेहे तीने पाप ना डंड मे गेथो छुटकारो जड़हे। पण जे भरहो नी करे, तीने भगवान गुनाळ्‌ळो ठेरावीन डंड आपहे। 17 जे मारी पोर भरहो करहे, तीमनी लारे ढेरेत जुदा-काम नी आहयी सेलाणी देखाव पड़हे: तीहया मारा नामे भुतड़ा काडहे, नवली-नवली बोली बोलह़े, 18 कदीम तीहया गड़हा ने उचली लेहे, नीता तीहया भुल सी जेहेर बी पी लेहे, ते बी तीमने कंय बी नुकसान नी हये। तीहया मांदला पोर हात मेकहे अने तीहया वारु हयहे।"

19 ✝ईसम करीन मालीक ईसु तीमनी ह़ाते वात कर लेदो, अने अळतेण तीहयो ह़रग मे उचलाय ज्‌यो, अने भगवान नी जमणी धेड़े जाय्‌न बह ज्‌यो।✝ 20 अने अळतेण ईसु ना चेला आखे जाय्‌न ईसु नु परच्‌यार कर्‌या, अने मालीक ईसु तीमनी ह़ाते काम करतो र्‌यो, अने मालीक ईसु ढेरेत जुदा-काम ना सेलाण्‌या नी लारे, आह़फा ना केदला बोल नो पुरावो देतो हतो। आमीन।